‘Otale Oko Osongo W’osase Wa La Liban’
ESONGO ɛmɔtshi welɛwɔ Arz Ar-rab, kitshimudi ate: ‘Osongo w’Osase wa Nkumadiɔndjɔ’ fukanɛka l’akona w’elangala efula wa la Liban. Lo Bible, vɔ tɛkɛtaka mbala oko 70 dikambo di’esongo ɛsɔ a weke efula w’akatshi ɛlɛsɛlɛsɛ oleki esongo ekina tshɛ.
Dia nembetshiya nɛmɔ di’esongo akɔ w’osase wa la Liban, Afundelo kambaka la tɔtɛkɛta: ‘sɔna’ ndo ‘dimɛna.’ (Limbu la Solomona 5:15; Ezekiyele 17:23) Lo menda woke w’osongo akɔ ndo woho waviya abaya awɔ, ambiki a mvudu l’asɛdi wa waato ndo wa sɛlasɛla dikina wakakambaka awɔ olimu. Opumu wa dimɛna watondjawɔ ndo beela kawɔ ka langilangi kotolaka anto efula, ndo olembo awɔ wa dimɛna efula kimanyiyaka diaha vɔ pɔnda kana mbɔtɔ loombo. Esongo akɔ wekɔ etale tshwa ndo weke, mbolaka otale polo lo mɛtɛlɛ 37, ndo woke wa mɛtɛlɛ 12, ndo edio awɔ nyɔngɔmɛ etale efula lo nkɛtɛ. Diɔ diakɔ diakate angɔlɔnɔmɛ ɔnɛ vɔ wekɔ ‘esongo w’amɛna efula oleki ekina tshɛ l’andja w’otondo’!
Lo pɔlɔfɛsi kande, Ezekiyɛlɛ akɛdinya Mɛsiya la lotahe l’osongo akɔ, lele Nzambi ndamɛ mbalionɛ. (Ezekiyele 17:22) Lo mɛtɛ, tshɛkɛta y’oma lo Hɛbɛru yokadimudiwɔ ɔnɛ “osongo w’osase” ndja oma lo etelo k’ɔnɛ: ‘shikikala.’ Ndo ambeki wa nshi nyɛ waki Mɛsiya Yeso Kristo mbahomba ‘shikikala lo mbetawɔ, . . . keketala,’ oko osongo w’osase wahɛngɛnga. (1 Koreto 16:13) Ngande akokawɔ shikikala ngasɔ na? Ele lo shika tanga wolo la ntondo ka tɔsɛngiya ta kɔlɔ ndo tetemala la nama kɔlamelo yawɔ tsha le Nzambi ndo mbomamemaka. Bible mbelɛka wanɛ watsha ngasɔ ɔnɛ ‘anto w’ɔlɔlɔ . . . [wôla] otale oko osongo wa la Liban.’—Osambu 92:12.
Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “Les Témoins de Jéhovah” mukanda lo B.P. 634 Limete, Kinshasa, République démocratique du Congo.
[Caption on page 32]
[Box on page 32]
Wɛ Nangaka Onto Ndjokenda?