Shɔnɔdi ya nkoho y’alemba l’atei w’ɛtɛmwɛlɔ

“LAM’AKAMAYE l’États-Unis l’ɔnɔnyi wa 1978, lakafɔnyaka nte ekakatanu watomba l’ɔtɛ wa nkoho y’alemba wambotashilaka edja l’Amɛrika, ndo anto w’edima waya popo l’anto akina.” Ngasɔ mbakate Mark Mathabane, ofundji ɔmɔtshi w’ekanda lakotɔ l’Afrique du Sud, lam’akawɔkɔnyaka le ase jurunalɛ yelɛwɔ Time. “Lo weho efula, dimi lakɛnyi dia dikambo sɔ diaki mɛtɛ. États-Unis akɛnamaka oko ndeka Afrique du Sud ɛnɔnyi lokama. Koko l’ɔkɔngɔ diko, lakayosholaka la lonyangu efula dia ndoko otshikitanu w’ɔlɔ wakonge l’etema w’anto.” Kakɔna kakayôkimanyiya dia nde ndjoshola dikambo sɔ dia diambo na?

Yɔnɛ Mathabane ate: “L’Amɛrika, wonya ɔmɔtshi woleki anto ndjâkakitola ele oshidi wa 11 wa pindju wa Lushi la Lomingu.” Nde akɛnyi ɔnɛ kânga l’atei wa luudu la Nzambi, anto hawɔngɛnangɛna sangana l’anto wa woho okina wa lokoho la demba dia sambɛ la wɔ kâmɛ. Mathabane akoke dimbola nɛ ate: “Tokanyi ta woho akɔna tele la wɔ otsha le anto wa woho okina wa lokoho la demba lo nshi nkina ya lo lomingu lâsɔ na?” Lam’akandatɛkɛtaka dia kalasa ɔnɛ tɔ mbele ehomɔ ka wolo kahomba tshikitanya akambo, Mathabane akate ate: “Kalasa ayokokimanyiya dia wɛ mbɔsa anto wa lo nkɛtɛ k’otondo tshɛ ɔnɛ wekɔ popo.”

Ɛmɛnyi wa Jehowa mbetawɔka ɔnɛ kalasa kokaka shidiya okakatanu ɔsɔ, koko vɔ ndekaka keketsha anto dia mbɔtɔ kalasa k’Ɔtɛkɛta waki Nzambi. Eelo mɛtɛ, Bible mbakimanyiyaka dia vɔ mbekola wekamu wa monga la tokanyi ta kɔlɔ otsha le anto wa woho okina wa lokoho la demba​—⁠oyadi kânga lo wedja wele lohetsho hakoke lam’asa anto wa lo dibila diotshikitanyi. Lomingu tshɛ, lo Mbalasa ya Diolelo yakiwɔ, anto wa nkoho y’alemba ya weho la weho ndo w’oma lo wedja wotshikitanyi tshumanaka kâmɛ dia mbeka ɛlɛmbɛ la awui wa lo Bible, Ɔtɛkɛta waki Nzambi. Hawɔkɔngɔla ndoko ɛkɔngɔ lo nsanganya shɔ. Tayokolongola l’ɔngɛnɔngɛnɔ efula naka wɛ ndja lo nsanganya shɔ!