“Pami k’ɔngɛnɔngɛnɔ kotshuki wadi l’ɔlɔlɔ”

LO TENA DIMƆTSHI, anto amɔtshi mbutaka ɔnɛ Ɛmɛnyi wa Jehowa tadiakaka awala akana. Koko, awala efula wele l’ɔngɛnɔngɛnɔ, lɛnɛ ele wadi kana omi ndamɛ oto kele Ɔmɛnyi wa Jehowa mɛnyaka ɔnɛ dikambo sɔ diekɔ kashi ka mamba. Awala mongaka l’ɔngɛnɔngɛnɔ etena kakitanyiya atshukanyi alako wa lo Bible lo nkumbo. Kɛsɔ mbɛnya mukanda ɔnɛ wakatombe lo jurunalɛ mɔtshi la France.

“Aya suke l’ɛnɔnyi 28 wemi pami k’ɔngɛnɔngɛnɔ kotshuki wadi l’ɔlɔlɔ lele Ɔmɛnyi wa Jehowa. Wadiɛmi ambombodiɛ anami atanu, wele ahende l’atei awɔ kema anande hita. Nde akâkokɛka ndo akâlangaka woho akɔ wâmɛ. L’etena kɛnɛ kemi owandji wa société kele l’ase olimu 45, dimi kokaka nyoshikikɛ nte wadiɛmi ambokimanyiya efula dia dimi pama l’olimu ami. Diɔ diakɔ diele, lam’akamɛnyi sawo dimɔtshi lo jurunalɛ yatomadiaka mbala efula, sawo diakataka ɔnɛ Ɛmɛnyi wa Jehowa wekɔ wâle ɔmɔtshi lo prɔvɛnsɛ ka Lot-et-Garonne, dimi lakɔshi yɛdikɔ ya nyɛnya mɛtɛ ka dikambo.”

Mukanda waki pami kɛsɔ mbutaka nto ɔnɛ: “Vɔ hawɔnɔ nfɔka kana mbidjɔ wanu. Onde ɔsɔ ekɔ wâle ɔmɔtshi? Vɔ wekɔ Akristo wakikanɛ ndo hawofundɛ ndoko onto dia ndjela ɛlɛmbɛ ɛnɛ wayelawɔ. Koko, vɔ wekɔ bɛnyɛlɔ di’ɛlɔlɔ l’akambo efula . . . Vɔ hawove falanga ya lɛɛta kana munda ekanda wa didjoyadjoya. Vɔ hawolake alaka w’ɔnɛ hatotshukanaki pondjo, ndo dimi kokaka nyoshikikɛ nte, vɔ sɛnaka lɔsɛnɔ la dimɛna efula. . . .

“Ondo nyu mbeyaka mimbolami lâsɔ ɔnɛ: Wɛ ɔsɔ ata ngasɔ, ko lande na eyɛ kema Ɔmɛnyi wa Jehowa? Naka dimi bu Ɔmɛnyi wa Jehowa ele nɛ dia dikambo sɔ nɔmbaka di’onto monga la mbetawɔ k’Okristo ndo mamema wolo lo ɛlɛmbɛ wendana la lɔkɛwɔ l’ɔlɔlɔ, koko ekɔ wolo di’anto efula ntsha dikambo sɔ.”