Vɔ ‘wakokaka Nzambi ka mɛtɛ wɔma’
LAM’AKI Ase Isariyɛlɛ lo lɔhɔmbɔ l’Edjibito, ambotshotshi w’Ase Hɛbɛru, Shifira nde la Pua, wakayala l’asa lɔkɔnga la pakahaka. Di’aha angɛndangɛnda fulanɛ esadi esadi ɔnkɔnɛ akawatafulanɛka, Farawɔ akadjangela wamato asɔ ate: “Lam’ayunyutshaka amantu w’asi Heberu, naka nyambena ona pami, kanyûdiaki; keli naka ona umuntu, ku nyu mbutshika la lumu.”—Etumbelu 1:15, 16.
Lam’ele Shifira nde la Pua ‘wakokaka Nzambi ka mɛtɛ wɔma,’ vɔ wakonge la dihonga ko “kuntsha uku akawatela khum’ekanga k’Edjibitu.” Lo dihole dia vɔ ndjakaka ana w’apami wakotɔka, vɔ wakâtshikaka la lɔsɛnɔ, kânga mbele dui sɔ diakawasalaka la dihonga diakakoke mbakonya lo wâle. Jehowa ‘akasalɛ ambotshotshi asɔ ɔlɔlɔ,’ ndo akâfute l’ɔtɛ wa kɛnɛ kakawasale dia nshimbɛ nsɛnɔ y’anto.—Etumbelu 1:17-21.
Ɔkɔndɔ ɔsɔ mɛnyaka ɔnɛ Jehowa mandolaka wanɛ wôkambɛ. Nde akakoke mɛna ɔnɛ kɛnɛ kakasale Shifira nde la Pua, kânga mbakawakisale la dihonga, aki paka dia mɛnya otema awɔ w’ɔlɔlɔ otsha le anyawɔ anto, nɛ dia ndooko womoto ɔtɔi mɛtɛ lele la wɔɔngɔ w’ɔlɔlɔ lakoka ndjaka ana w’ashashi! Koko, ndooko tâmu dia Jehowa kombohɛ dui di’ɔnɛ, oma lo wɔma w’anto, anto amɔtshi ntshanelaka awui wa kɔlɔ ka tshɛ. Nde akeyaka ɔnɛ ambotshotshi asɔ kotshutshuyama paka l’otema w’ɔlɔlɔ w’onto oto koko wakatshutshuyama ndo la wɔma wakawokaka Nzambi la woho wakawômamemaka.
Ande ɔlɔ wakokaso mboka dia kambɛ Nzambi kalembetɛ akambo wasalaso la kɔlamelo lee! Eelo mɛtɛ, ondo ndooko ɔtɔi l’atei aso lambohomanaka la dikambo diadja mbetawɔ kaso l’ohemba oko nɛ diakahomana la Shifira nde la Pua. Koko, lam’ashikaso ekolo dia ntsha kɛnɛ kele ɔlɔlɔ, oyadi la kalasa, lo dihole di’olimu, kana lo dihole dikina, Jehowa hɔshi ngandji kaso ka kɔlamelo oko vuiwui y’anyanya lo washo ande. Nde ‘mfutaka wanɛ wôyanga l’otema ɔtɔi.’ (Heberu 11:6) Eelo mɛtɛ, ‘Nzambi bu kanga akambo esekeseke, dia nde mbohɛ lotumu lanyu la ngandji kɛnyanyu l’ɔtɛ wa lokombo lande, lo woho wakanyakambɛ ekilami ndo watetemalanyu mbakambɛ.’—Heberu 6:10.