Ɛkɔndɔ w’apandjudi a diolelo

Ehamelo ka teokrasi lo wodja wa Namibie

LOKUMU l’ɔlɔlɔ la Diolelo diaki Nzambi lakakome ntondo lo wodja wa Namibie oya l’ekomelo k’ɛnɔnyi wa 1920. Tatɛ oma k’etena kɛsɔ, nkama y’anto wele l’etema wosembwe wekɔ lo mbetawɔ losango laki Nzambi la panda. Ɛkɔndɔ wofundami lanɛ l’ɛse mɛnyaka woho ɔnɛ watshumanya Jehowa diangɔ sɔ di’amɛna efula oya lo lokoto lande l’ɛkɔkɔ.​—⁠Hangai 2:⁠7.

◻ Yɔnɛ Paulus, lakamba dikambɔ dia ndjâleshaka, mbidjasɛ lo nɔrdɛ-ɛsta ka wodja wa Namibie. Nde akɛnana l’Ɛmɛnyi wa Jehowa mbala ka ntondo lam’akandatshu la Windhoek, osomba w’owandji. Paulus akayoshikikɛ esadi eto ɔnɛ lamboshola akambo wa mɛtɛ. Nde akakalola lakande la dibuku dia Kokaka We Monga la Loseno la Pondjo lo Paradiso ka la Kete. L’ɔkɔngɔ wa lâsɔ, lam’akandatandaka lɔkɛndɔ lɔmɔtshi otsha la Rundu, osomba woleki sukana la ngelo kande, lɛnɛ aki Mbalasa ka Diolelo kɛmɔtshi, Paulus akatɛna Ɛmɛnyi wa Jehowa ko akâsɛngasɛnga dia vɔ ndja ndjowenda.

Koko, ngelo kakadjasɛka Paulus mangana etale ka mamba la lɛnɛ aki Ɛmɛnyi wa Jehowa ko kokoka dia vɔ ntshɔ dia towetshaka Bible lomingu la lomingu. Paulus kɔkɔmɔ otema koko akatatɛ mbeka Bible lo yoho yande ndamɛ. Ndo nto, nde aki l’ohetoheto lo sambisha anto akina akambo wakandekaka. L’ɔkɔngɔ wa nshi mɔtshi, djui mɔtshi y’anto weka Bible yakayotongamaka. Lam’akoke djui y’anto shɔ l’aradiyo ɔnɛ Ɛmɛnyi wa Jehowa wayɔtɔ losanganya la woke l’osomba wa Rundu, vɔ wakatshumanya tokutakuta tawɔ ndo wakayâlɔngɔsɔla dia futa mutuka dia tɔɔtɔ lo losanganya lakɔ.

Ande ɔlɔ wa mamba wakawoke dia tosangana l’Ɛmɛnyi wa Jehowa mbala ka ntondo! Tɛdikɔ takɔsama aha la tshimbatshimba di’anangɛso amɔtshi wa tomanamana ntshɔ dia tembolaka djui shɔ y’anto esangɔ l’esangɔ. Ɛlɔ katɛkɛtaso kɛnɛ, apandjudi asamalo waya lo ngelo kodjashi Paulus.

◻ Kɛnɛ kakayokutshumbola mposa ka womoto ɔmɔtshi lelɛwɔ Johanna ka mbeya lokombo la Nzambi aki etena kakandoke onto ɔmɔtshi atɛkɛta kɔlɔ lo lokombo l’Ɛmɛnyi wa Jehowa. Johanna ekɔ lo mbohɔ ate: “Mbala ka ntondo kakamoke lokombo la Jehowa, lɔ lakakakatɛ oko olembo lo wɔɔngɔ ami ko lakayotatɛ ndjambola nte: ele Jehowa na? Nshi shɔ, lakadjasɛka dimi l’omɛmi suke l’osomba wa Walvis Bay, l’ɔkɛngɛ w’ashi a wake. Lushi lɔmɔtshi, takatshu l’osomba ko lakɛnyi Ɛmɛnyi wa Jehowa watakahanɛ tojurunalɛ ta Tshoto y’Etangelo l’otadimbo. Wakambisha Tshoto y’Etangelo mɔtshi ko lakâlɔmbɛ dia vɔ ndjombetshaka Bible nɛ dia laki la wembola efula. Lakatondɔ la delo lam’akawambutɛ ɔnɛ hawotokoka ndja dikambo mutuka awɔ ambolana. Kombeta ndoko edja l’ɔkɔngɔ wa lâsɔ, omɛmi akayovɔ ko dimi ndjotshɔ dia todjasɛ l’osomba wa Keetmanshoop. Ombatshi mboka ɔmɔtshi wa lânde akatomama dia tosambishaka l’osomba akɔ ko nde akayombisha dibuku dia La vérité qui conduit à la vie éternelle. Oma k’etatelo, dimi lakɛnyi nte mɛtɛ tɔ kɛnɛ.

“L’edjedja ka wonya, wakayɔnɔmba dia ndo dimi sambishaka, koko lakokaka wɔma w’anto. Lam’akamatatshɔka lo soko la soko, lakalɔmbaka Jehowa nte: ndeka dimɛna wɛ tshikami dimi mvɔ la ntondo ka mbishami ɔkɛndɛ wa sambisha. Lam’akamatombe mbala ka ntondo l’otadimbo dia tasambishaka, lakayashɛ lo vioka mɔtshi ya tshitshɛ nte kele aha onto mɛnami. Lakayokomɛka lo ndjokeketsha otema nte womoto kemi ko dimi ndjɔlɛkɛ onto ɔmɔtshi lakatetaka jurunalɛ. L’etena kɛsɔ keto mbakamasale tshɛ dia mbuta dui dimɔtshi. Lushi lɔsɔ, Jehowa akakimanyiya ko lakewoya anto efula elongamelo kami ka lo Bible.

“Ɛlɔ kɛnɛ, l’ɔkɔngɔ w’ɛnɔnyi 12, kânga mbemi ose wola lo demba, dimi mbɔsaka diɛsɛ dia kamba olimu w’ombatshi mboka la nɛmɔ efula ndo lekɔ lo tetemala kondja ɔngɛnɔngɛnɔ wa mamba oma l’olimu wa mbewoya anto akina akambo wa mɛtɛ wa Diolelo.”