Wakatshikala la kɔlamelo le Jehowa

KƆLAMELO, ekɔ dionga di’ohomba efula diahaleke tanema ɛlɔ kɛnɛ le anto dieyama ekambi wa Jehowa, Nzambi ka mɛtɛ. Kanga kɔlamelo shikaka ekolo l’atei w’ehemba ndo tshikalaka nge kânga mbatete nshi kana mbaviya ehemba akɔ. Tɔshi ɛnyɛlɔ ka Hezekiya Nkumekanga k’ɔlɔlɔ. Bible mbutaka ɔnɛ “nduku khum’ekanga kaki la ntundu kana l’okongo andi kaki uku ndi.” Kakɔna kakatshikitanya Hezekiya la nkumi ya dikanga kina na? Nde ‘akatetemala mamema Jehowa,’ kânga mbakandadingama l’atɛmɔdi wa jambizambi ya kashi yakawelɛka Mɔlɛka. Eelo, Hezekiya “kunkimo [ndjela Jehowa], ndu akalamaka elembe [ande].”​—2 Khumi ya dikanga 18:1-6.

Ɔpɔstɔlɔ Paulo aki onto okina lakatshikala la kɔlamelo otsha le Jehowa. Ɔkɔndɔ w’olimu ande watanema l’Afundelo wa Ngirika w’Akristo mɛnyaka l’ɔlɔlɔ tshɛ dia Paulo akatetemala kambɛ Nzambi l’anima ande tshɛ. Oya l’ekomelo ka lɔsɛnɔ lande la la nkɛtɛ, Paulo akakoke mbuta ate: “Dimi lakalo ta di’ololo, lambushidiya esakelu ka luwangu, lakalami mbetawo.”​—2 Timote 4:7.

Hezekiya la Paulo wekɔ mɛtɛ bɛnyɛlɔ di’ɛlɔlɔ di’anto waki la kɔlamelo. Nyɛsɔ tokoya mbetawɔ kawɔ lo tshikala la kɔlamelo otsha le Jehowa, Nzambi kaso ka Woke.​—Heberu 13:7.