Lomba laki Nzambi ngande wɛnamalɔ na?

‘ANTO watɔnyɔlaka yimba y’ose wola, ndu hawotolangaka awui ande.’ La ɛtɛkɛta ɛsɔ mbakakumiya Nkumekanga Sɔlɔmɔna ɔkɔndɔ wa kanga wola laki la lomba, ɔnɛ lakakokɛ wodja w’otondo oma l’elanyelo. Lonyangu ko, ‘ndoko onto lakohɔ ose wola akɔ.’​—Undaki 9:14-16.

Anto wekɔ la mbekelo ka mɔnyɔla anto wele bu l’ekondjelo k’efula, oyadi kânga ase wola asɔ kotshaka akambo w’amɛna. Kɛsɔ mbakakomɛ Yeso. Isaya akatatshi lo dikambo diande ate: ‘Nde akɔnywama, anto wakolawɔ, nde akahombe sowa ndo mbeya elɛwɔ hemɔ.’ (Isaya 53:3) Anto amɔtshi wakɔnyɔlaka Yeso paka l’ɔtɛ wakinde komonga la lokumu kana ɔngɔnyi oko ewandji wa lo nshi yande. Koko, nde aki la lomba lakaleke anto tshɛ wele kema kokele la fwa. Anto wa l’osomba wakotɔ Yeso kombetawɔ di’‘ɔnaki otshudi w’abaya’ kokaka monga la lomba la ngasɔ ndo ntsha akambo wa diambo. Ko tete le wakayakesaka efula, nɛ dia ɔkɔndɔ mbutaka dia Yeso ‘kotsha akambo efula wa weke lɛkɔ l’ɔtɛ wa lonyu lawɔ l’etema.’ Anto asɔ mɛtɛ wakashisha!​—Mateu 13:54-58.

Aha sho lawɔ kesama ngasɔ. Yeso akate ate: ‘Lomba latɛnamaka oma l’etsha alɔ.’ Wanɛ wakamba olimu waki Nzambi ndo watasha anto lomba l’oma l’olongo tshikitana l’anto akina aha l’ɔtɛ wa lokumu kana l’onto lele lawɔ, koko oma l’‘elowa w’ɔlɔlɔ’ wɛnyawɔ, mbut’ate oma lo mbetawɔ kawɔ koki edio lo Bible ndo oma l’etsha awɔ.​—Mateu 7:18-20; 11:19.