Onde sho koka ndjâsukanya la Nzambi kahɛnama?

Sho mbeyaka ndjambola ɔnɛ: “Ngande wakokaso monga la diɔtɔnganelo di’oshika l’onto lahatɛnyi na?” Ɔsɔ ekɔ mɛtɛ wombola w’oshika. Ko ohonyɛsɔ tokanyiya yema. . .

ONDE di’anto monga la diɔtɔnganelo dioludi la ngandji ndo dia wolo washo wekɔ ohomba? Shi ndo kɛnɛ kahɛnama mbele l’ohomba, mbala mɔtshi ohomba woleki? Ɔsɔku mbediɔ! Dikambo sɔ nembetshiyaka dia onto kokaka mbɔtɔnɛ l’onto ɔmɔtshi oma lo fundanɛka ekanda mbala la mbala, ekanda wele onto l’onto ayotɛka onyande kɛnɛ kalangande, kahandalange, eyango ande, ɛlɛmbɛ ande, dionga diande dia shɛkɛsɛkɛ, ndo waonga akina wendana la lonto lande kana awui walekande ndjasha.

Ɛnyɛlɔ k’akanga wa totshungu mɛnyaka nto dia washo bu ohomba di’onto mbɔtɔnɛ l’onto okina dimɛna. Ɛnyɛlɔ kaki Éric nde la Gwenaëlle,a atshukanyi wambôlɛka washo nembetshiyaka dikambo sɔ. Vɔ ahende wakahomana lo kalasa kakawetshaka epalanga wa totshungu. Éric akangɛnangɛnaka waonga waki Gwenaëlle, djekoleko mɛtɛ, losembwe, ndo etete kande l’olimu. Ko naa waonga waki Éric wakangɛnangɛnaka Gwenaëlle lawɔ na? Nde ate: “Lo ndjela woho wakamodiama, waonga waki lande tshɛ waki ohomba.” Vɔ wakamɛ mɛnyanya ngandji, ndo l’ɔkɔngɔ w’ɛnɔnyi esato, vɔ wakayotshukanaka.

Éric ekɔ lo mbuta ate: “Etena kenyu kâmɛ, mbolɛ washo hakoke monga wekamu le nyu dia monga la diɔtɔnganelo di’ɔlɔlɔ. Mɛtɛ nyu hanyɛnana, koko aha ndo nsaki yanyu mbele totshungu.” Ɛlɔ kɛnɛ, l’ɔkɔngɔ w’ɛnɔnyi 57, Éric nde la Gwenaëlle wekɔ paka wadi l’omi. Ele sapi ka diokanelo diakiwɔ na? Sho mbeyaka shila akambo anɛi anɛ w’ohomba: (1) onto l’onto mɛnaka waonga w’osekande; (2) onto l’onto kanaka yimba la waonga w’osekande ndo kotwamaka la waonga akɔ; (3) vɔ sawolaka mbala la mbala; (4) vɔ kambaka elimu kâmɛ.

Akambo anɛi asɔ wekɔ ohomba dia monga la diɔtɔnganelo di’ɔlɔlɔ oyadi lam’asa angɛnyi, atshukanyi, djekoleko lam’asa anto vɔ la Nzambi.

[Nɔtɛ ka l’ɛse ka dikatshi]