Wɔladi wa l’andja w’otondo wayoya oma lende?

ONDE etena ka wɔladi mbɔtɔ l’andja w’otondo kaya suke? Efula ka wanɛ wakafɔnyaka ngasɔ, hawoyɔfɔnya woho akɔ nto. Alapɔlɔ ɔmɔtshi wendana l’ekakatanu wa nshi yaso yayaye, wakawatondja lo jurunalɛ mɔtshi ya l’Afrique du Sud yelɛwɔ Daily Mail & Guardian mbutaka ɔnɛ: “Awui wakawate ambeta paka ɛnɔnyi 10 eto wa shikikɛ dikongɛ dia pɔlitikɛ ndo tshunda di’anto di’oyoyo ɛnamaka ɛlɔ kɛnɛ dia dikambo sɔ aya wolo diɔ salema.”

Afundji wa jurunalɛ shɔ wekɔ lo kanyiya elongamelo kaki l’anto l’ɛnɔnyi dikumi wêke kambeta ɛnɛ. Lâsɔ ko Ta di’Edimidimi dieke kashila, ndo ata wa lam’asa wedja woleki wolo. Anto efula wakɔsaka dia etena k’oyoyo kambomɛ, ndo wakalongamɛka di’anto wayanga tatɛ sala la wolo dia minya wola, hemɔ, l’ekakatanu wendana l’elanyelo k’ahole wadjasɛ anto. Alapɔlɔ ɔsɔ mbutaka ɔnɛ: “Akumi wakawakambe wambɔtɔ tshɛ l’ashi. Ata akina wakayɔlɔma l’ahole wakiwɔ konongamɛka, ndo anto wekɔ lo tatamanya ndjala wola. Tekɔ kakianɛ la wedja ehende wele la waa bɔmbɛ atomikɛ ya welo efula. O.N.U. ambɔtɔ mɔnyɔ nɛ dia vɔ wambohekɔ dia kandola ekakatanu wele l’anto kana shidiya awui w’ata. Tokanyi taki l’anto ɔnɛ O.N.U otsha kandola ekakatanu tshɛ tambokadimɔ etshuletshule.”

Ambeki wa Bible mbeyaka ɔnɛ oyadi weolo akɔna wayodja anto, vɔ hawotondoyaki pondjo. Lande na na? Nɛ dia oko wata Bible: “Wa la kete tshe weko lu wulu wa kanga kolo.” (1 Joani 5:19) Edja tshɛ kêke andja ɔnɛ l’ɛlɔmbwɛlɔ kaki Satana, vɔ hawokomaki pondjo Paradiso, oko wakitɔ lam’akakitonge Nzambi.

Kânga mbediɔ ɔsɔku, tekɔ l’ɔkɔkɔ w’oshika wa monga l’elongamelo. Jehowa Nzambi ekɔ lo ndaka dia mbela wɔladi l’andja w’otondo, aha lo nɔngɔsɔla dikongɛ nɛ di’akambo oko onto lamamasanya emongo w’ahɔndɔ, koko lo tonga “kete y’uyuyu” lɛnɛ ‘ayodjasɛ losembwe.’ (2 Petero 3:13) Eelo, l’ekimanyielo ka Diolelo diaki Nzambi, okama wakiso wa nkɛtɛ ɔnɛ wayokadimɔ dihole dioludi la wɔladi, ndo l’ɔngɛnɔngɛnɔ, lɛnɛ ele lɔsɛnɔ ndo olimu w’anto tshɛ wele l’okitanyiya wayongaka paka ɔngɛnɔngɛnɔ oto. Ndo nto, Nzambi ekɔ lo ndaka dia “kitula asoi tshe lu ashu [w’anto]; nyoi hayuyala ntu, delu hadiuyuyala ntu, kuyanga ndjawi, kuyanga kandji.” Alaka asɔ hawoye oma lo ditakataka di’anto diaheyama ɔtɛ l’ekolo. Koko, vɔ ndja oma l’Ɔtɛkɛta wahetaka pa waki Otungi ɔnɛ lahataka kashi pondjo.​—Enyelo 21:4; Tito 1:2.