Onde wɛ ‘ndjatshungwɛka etena k’ɔlɔlɔ’?

Ɔpɔstɔlɔ Paulo akalake Akristo wa lo ntambe ka ntondo wa l’Ɛfɛsɔ ate: “Nyewo ololo uku akendakendanyu, aha uku dinginya keli uku akanga a yimba. Nyuyatshungweli etena, ne dia nshi nye yeko kolo.” (Efeso 5:15, 16) Lande na kele dako sɔ diakikɔ ohomba na? Okadimwelo wa wombola ɔsɔ nɔmbaka dia mbeya akambo waki l’Akristo l’osomba ɔsɔ w’edjedja.

Ɛfɛsɔ akeyamaka oma l’ɔngɔnyi awɔ, awui wa mindo wa dieyanelo woleki tshɛ, diakatanelo diakakokanɛ l’ahole tshɛ, ndo oma l’akambo akina w’ɛdiɛngɛ. Ndo lâdiko dia lâsɔ, Akristo wa lɛkɔ wakahombe ndɔshana la dietawɔ di’akambo wa filozofi wendana la etena. Apanganu w’ase Ngirika waki l’Ɛfɛsɔ kombetawɔka ɔnɛ etena kekɔ lo tatshu paka otsha la ntondo. Filozofi k’ase Ngirika kakâlakanyaka ɔnɛ lɔsɛnɔ lekɔ paka lo tshimba l’otshimbedi wamɛ wele kema la ekomelo. Onto laketsha etena kande wetshetsha lo otshimbedi ɔtɔi wa lɔsɛnɔ akakokaka ndjokikondja lam’ayokalola etena kakɔ ɛkɔngɔkɔngɔ otsha l’otshimbedi okina. Weho wa tokanyi ta ngasɔ takakoke tshutshuya Akristo wa l’Ɛfɛsɔ dia vɔ ndjonga la dionga dia wendjodi lo kɛnɛ kendana la woho wakakongɛ Jehowa dia sala akambo, mbidja ndo ekongelo kande kendana la lushi layondela elombwelo. Omalɔkɔ, dako diaki Paulo dia ‘ndjâtshungwela etena k’ɔlɔlɔ’ diakasunganaka mɛtɛ.

Paulo kɔtɛkɛta dia etena lo woho wakieya anto tshɛ. Tshɛkɛta ya lo Ngirika yakakambe lande lanɛ nembetshiyaka etena kɛmɔtshi ka shikaa, etena k’ɔlɔlɔ ka kotsha oyango ɔmɔtshi wa shikaa. Paulo akalakaka Akristo wa lo ntambe ka ntondo dia vɔ kamba la lomba l’etena k’ɔlɔlɔ, kana etena k’ɔngɛnɔngɛnɔ, kakiwɔ oma la kondja la ntondo ka tɔ komɛ ndo la tondo ka kɛtshi kaki Nzambi ndjeta olongo swa kana vɔ ndjohandja panda.​—Romo 13:11-13; 1 Tesalonika 5:6-11.

Sho tekɔ lo sɛna popo l’etena k’ɔlɔlɔ. Lo dihole dia sho mbetsha etena kɛnɛ k’ɔngɛnɔngɛnɔ kahatakondjaki nto wetshetsha lo tayangaka ɛngɛnɔngɛnɔ wa tshenyitenyi wa l’andja ɔnɛ, Akristo wayɛnya dia wekɔ la lomba naka vɔ kamba l’etena kele lawɔ dia sala ‘akambo w’anto wamamema Nzambi’ ndo keketsha diokanelo dia lam’asawɔ l’Otungi, Jehowa Nzambi.​—2 Petero 3:11; Osambu 73:28; Filipi 1:10.