Wembola w’oma le ambadi
Lo menda woho wetawɔ Jehowa dimanyiyɛ anto pɛkato yawɔ oma l’olambo wa tshungo, bonde kahomba Akristo mbishola pɛkato yawɔ le dikumanyi dia l’etshumanelo na?
Oko wakokaso diɛna lo dikambo diaki Davidi nde la Batɛshɛba, kânga mbakitɔ pɛkato ka woke, Jehowa akadimanyiyɛ Davidi pɛkato kande nɛ dia Davidi akayatshumuya l’otema ɔtɔi. Lam’akaye omvutshi Natana le nde, Davidi akasuya l’otema ɔtɔi ate: “Dimi lakatshela [Jehowa] kolo”—2 Samuele 12:13.
Koko, Jehowa mbetawɔka ndjatshumuya ka mɛtɛ k’onto lambotsha pɛkato, nde mbodimanyiyɛka pɛkato kande, ndo nde ambɔsaka nto yɛdikɔ mɔtshi yoludi la ngandji dia kimanyiya onto ɔnɛ lotshe pɛkato dia nde tetemala kɔlɔngana dimɛna lo nyuma. Lo dikambo diaki Davidi, ekimanyielo kakaye oma lo tshimbo y’omvutshi Natana. Nshi nyɛ, l’etshumanelo k’Akristo, tekɔ la dikumanyi diambotshunda lo lonyuma. Ombeki Jakɔba nembetshiyaka ate: “Untu eko la hemo [lo nyuma] l’atei anyu? Ndi eti dikumanyi dia ekelizia, vo wôlombele, wukiti iso lu lukumbu la [Jehowa]. Dombelo dia mbetawo diayushimbela kanga hemo, ku [Jehowa] ayuwulula. Naka ndi akatshi kolo, kolo yandi yayudimanyema.”—Jakoba 5:14, 15.
Dikumanyi diambohokɔ akambo kokaka kimanyiya efula dia kitshakitsha pâ katongaka l’onto lambotsha pɛkato l’otema. Vɔ ndjatshutshuyaka dia mbokoya Jehowa lo yoho yawɔ ya sɛna kana ya kana la nde yimba. Vɔ hawoyange dia monga awui wolo, kânga l’etena kasungana mbisha lohango la wolo. Koko, la kɛtshi tshɛ, vɔ sɛdingolaka ehomba wele l’onto ko wonya akɔ. La solo dia lotutsha, vɔ salaka la wolo dia tshikitanya ekanelo k’onto lambotsha pɛkato l’ekimanyielo k’Ɔtɛkɛta wa Nzambi. (Ngalatiya 6:1) Kânga naka onto hashodi pɛkato kande la lolango lande ndamɛ, nde mbeyaka ndjotshutshuyama dia ndjâtshumoya etena kayoya dikumanyi le nde, oko wakasale Davidi lam’akaye Natana le nde. Ekimanyielo k’oma le dikumanyi sukɛka onto lambotsha kɔlɔ dia nde mbewɔ wâle wa nde ndjɔkɔ lo pɛkato kakɔ nto ndo mbewɔ etombelo wa kɔlɔ wakomɛ wanɛ watshininala lo pɛkato.—Heberu 10:26-31.
Kema dikambo dia tshitshɛ di’onto ndjatshumuya la ntondo k’anto oma l’etsha ande wa sɔnyi ndo nyanga edimanyielo. Dikambɔ sɔ nɔmbaka di’onto ndjakeketsha. Koko kanyiya yema lo kɛnɛ kendana l’ɔsɔnwɛlɔ wahombayɛ mbɔsa. Onto ɔmɔtshi laki kombisholɛ dikumanyi dia l’etshumanelo pɛkato ka woke kakandatshe akate ate: “Dimi laki la kandji kaki kokoka shila l’otema pondjo. Dimi lakayakimɔ efula l’olimu w’esambishelo, koko kandji kami koshila.” Nde akakanyiyaka ate naka nde amboshola pɛkato kɛsɔ la ntondo ka Nzambi lo dɔmbɛlɔ kete amboshila, ko ndete le aha ngasɔ, nɛ dia nde akoke woho wakayaoke Nkumekanga Davidi. (Osambo 51:8, 11) Ekɔ mɛtɛ dimɛna efula sho mbetawɔ ekimanyielo koludi la ngandji katosha Jehowa lo tshimbo ya dikumanyi!