“Puta y’uma le ongenyi”

ƆPƆSTƆLƆ Paulo akɛnyi ohomba wa mbisha Akristo wa lo ntambe ka ntondo wa la Ngalatiya alako amɔtshi l’oyango wa mangola. Ondo dia mbewɔ akambo wa lonyangu tshɛ, nde akambola ate: “Okone dimi lambuyala utunyi anyu, ne dia lakanyutela aui wa mete uka?”​—Ngalatiya 4:16.

Lo ‘mbatɛ akambo wa mɛtɛ,’ Paulo kokoma otunyi awɔ. Nde akatshaka kɛnɛ kɔtɔnɛ la dui nɛ dia lo Bible diata ɔnɛ: “Puta y’uma le ongenyi, yatushikikeka kolamelu.” (Tukedi 27:6) Nde akeyaka dia lotamanya longa l’anto wambotsha kɔlɔ kokaka mpomuya mpota. Koko, nde akeyaka dia naka nde tona dia mbisha onto lambotsha kɔlɔ wongwelo wende l’ohomba, kete ayonga oko nde ambɛnya dia Jehowa Nzambi hakoke mboka onto lambotsha kɔlɔ ngandji. (Heberu 12:5-7) Ɔnkɔnɛ, oko wakinde ɔngɛnyi wa kɔlamelo wakayashaka l’otema ɔtɔi l’etshumanelo, Paulo komengenga dia mbasha alako dia mangola.

Ɛlɔ kɛnɛ, Ɛmɛnyi wa Jehowa wekɔ lo kotsha ɔkɛndɛ awɔ wa ‘mbetɛ anto wa lo wedja tshɛ ambeki, . . . lo mbaetsha dia vɔ sɛdingola akambo tshɛ wakadjanga [Yeso Kristo].’ Lo sala ngasɔ, Akristo asɔ w’etema ɔlɔlɔ hawɔnyɔla akambo wa mɛtɛ wa lo Bible watondja wetshelo wa kashi sɛkɛ ndo wânya lɔkɛwɔ lahɔtɔnɛ la l’Akristo. (Mateu 15:9; 23:9; 28:19, 20; 1 Koreto 6:9, 10) Ɔnkɔnɛ, anto akina hawohombe mbaɔsa oko atunyi l’ɔtɛ watondjawɔ wetshelo wa kashi sɛkɛ, nɛ dia vɔ wekɔ lo kɛnɛmɔla ngandji konga l’angɛnyi wa mɛtɛ.

L’ekimanyielo ka yimba y’oma le Nzambi, omembi w’esambo akafunde ate: “Untu ololo ankomole, laso kawo; ndi ampangweli, ku laso ndjalaka uku iso l’ote ami. Ote ami tatunaki, ne dia layokolamela mbalombela ne dia kolo yawo.”​—Osambu 141:5.