Wekɔ lo kamba la lokombo laki Nzambi lo Afrikɛ wa l’atei atei
EFULA k’anto wa l’Afrikɛ wa l’atei atei wekɔ la mbetawɔ le Nzambi. Vɔ hawame dia nde mbele Otungi wa diangɔ tshɛ. (Enyelo 4:11) Koko, l’ɛnyɛlɔ k’anto efula wa l’ahole akina, tena efula vɔ hawodje yimba lo lokombo lande hita, Jehowa.
Anto wa l’Afrikɛ wa l’atei atei ndo wa l’ahole akina wa l’andja ɔnɛ tɛkɛtaka dikambo dia lokombo laki Nzambi etena katawɔ vate “lukumbu laye lalemiami” lo Dɔmbɛlɔ dia Shɛso. (Mateu 6:9) Koko, l’etena k’otale efula, anto yema tshitshɛ tsho mbakeyaka lokombo lakɔ. Ɔnkɔnɛ, l’ɔkɔngɔ w’ɛnɔnyi efula, olimu w’esambishelo wa l’ohetoheto waki Ɛmɛnyi wa Jehowa amboyotshikitanyaka kanyi y’anto lo kɛnɛ kendana l’okambelo wa la lokombo laki Nzambi. Ɛlɔ kɛnɛ, lokombo laki Nzambi lambeyama efula ndo lambetawɔma l’ɛtɛkɛta efula wa l’Afrikɛ, ɛnyɛlɔ oko lo Zulu (uJehova), Yoruba (Jehofah), Xhosa (uYehova) ndo lo Kisahidi (Yehova). Koko, efula ka Bible yakadimɔma l’ɛtɛkɛta ɛsɔ hayokambe la lokombo laki Nzambi.
Ekadimwelo kɛmɔtshi ka Bible ka dimɛna kakamba la lokombo laki Nzambi ko Bible ka l’ɔtɛkɛta wa Zande, ɔtɛkɛta ɔsɔ tɛkɛtamaka lo tenyi dimɔtshi dia lo République centrafricaine, lo Soudan, ndo lo République démocratique du Congo. L’etenyi kɛsɔ ka l’andja, anto kambaka la lokombo laki Nzambi ndo lifundaka Yekova l’ɔtɛkɛta awɔ wa lotɔ. Oyadi woho akɔna wafundawɔ lokombo laki Nzambi l’ɔtɛkɛta ɔmɔtshi, ekɔ ohomba efula kamba lalɔ. Lande na? Nɛ dia “untu tshe latetaka lukumbu la [Jehowa], ayushimbamela.”—Romo 10:13.
[Kartɛ/Osato wa lo lɛkɛ 32]
(Dia mbeya awui tshɛ enda l’okanda)
SOUDAN
RÉPUBLIQUE CENTRAFRICAINE
RÉPUBLIQUE DÉMOCRATIQUE DU CONGO
[Efundelo wɛnya kanga]
The Complete Encyclopedia of Illustration/J. G. Heck