Wembola w’oma le ambadi

Onde kɛnɛ kata Nzambi lo Jeremiya 7:16 nembetshiyaka ɔnɛ Akristo hawokoke nɔmba dikambo di’onto lakawatshanya oma l’etshumanelo k’Akristo l’ɔtɛ wende bu la ndjatshumoya?

L’ɔkɔngɔ wa nde mbuta dilanya diakandahombe mbisha ase Juda waki komonga la kɔlamelo, Jehowa akatɛ Jeremiya ate: “Tolombelaki wudja one, tediaki diui dia mbalelela, kana mbasengesengela, kuyanga mbateketela la ntundu kami, ne dia dimi halukukela.”​—Jeremiya 7:16.

Lande na kakashimbe Jehowa Jeremiya dia nde nɔmba dikambo di’ase Isariyɛlɛ na? Mbokɛmaka hwe dia aki nɛ dia vɔ wakasekola Ɛlɛmbɛ ande l’okonda tshɛ. Lo washo w’anto tshɛ ndo aha la mboka sɔnyi, vɔ ‘wakavaka ndo wakadiakaka anto, wakasalaka loseka, wakatshibaka otshibatshiba, wakalambolaka Baala elambo wa lotshumba ndo wakayelaka ditɛmɔlatɛmɔla dikina.’ Diakɔ diele, Jehowa akatɛ ase Juda waki komonga la mbetawɔ asɔ ate: “Dimi layunyutshanya uma la ntundu kami, uku akamatshanya anengenyu tshe, tukanula tshe ta Efarayima.” Mbokɛmaka dia komonga dimɛna le Jeremiya kana le onto okina dia nɔmba Jehowa diaha Nde mbasha dilanya.​—Jeremiya 7:9, 15.

Lo dikambo sɔ, ɔpɔstɔlɔ Joani akafunde lo kɛnɛ kendana la dɔmbɛlɔ di’oshika di’otsha le Nzambi. Ntondotondo, nde akashikikɛ Akristo ate: “Naka shu tayolomba engo uku lulangu landi, ndi ayutukela.” (1 Joani 5:14) Oma lâsɔ, lo kɛnɛ kendana la nɔmba dikambo di’anto akina, Joani akatetemala la mbuta ate: “Naka untu ambena unyandi atsha kolo kaha ka nyoi, ndi alombe, ku [Nzambi] ayuwukela, dia mbisha wane wahatshi kolo ka nyoi lumu. Dikambu dia kolo dia nyoi dieko. Dimi halati nti: Ndi alombe dia dikambu diako.” (1 Joani 5:16) Yeso akatɛkɛta nto dia woho wa pɛkato ‘wahonga edimanyielo,’ mbut’ate, pɛkato otsha le nyuma k’ekila​—Mateu 12:31, 32.

Onde kɛsɔ mɛnyaka ɔnɛ anto tshɛ wakatshanyema oma l’etshumanelo l’ɔtɛ wakawatshe pɛkato ko hawoyatshumoya wakasale pɛkato ya “nyoi” ndo yahatakoke sala dɔmbɛlɔ dikambo diawɔ? Aha ɔsɔku mbahomba dikambo sɔ monga, nɛ dia tena dimɔtshi munga shɔ kema pɛkato ya nyɔi. Koko, ekɔ wolo dia mbeya dikambo sɔ. Manase laki Nkumekanga ka Juda ekɔ ɛnyɛlɔ k’oshika. Nde akakɛ nzambi ya kashi ediakelo, akalambola ɔnande hita, akonge la diɔtɔnganelo l’ɛdiɛngɛ, ndo akakitsha dikishi dia lɔsɛla lo tɛmpɛlɔ ka Jehowa. Bible mbutaka dia Manase nde l’ase wodja wakasale ‘kɛnɛ kaki kɔlɔ efula oleki wedja wakalanya Jehowa la ntondo k’ana w’Isariyɛlɛ.’ L’ɔtɛ w’akambo asɔ tshɛ, Jehowa akasha Manase dilanya lo mbotoma l’ɛkɔdi oko fumbe otsha la Babilɔna.​—2 Khumi ya Dikanga 21:1-9; 2 Ekondo 33:1-11.

Onde pɛkato yaki Manase yaki weke oko nyɛ yakonya lo nyɔi? Ondo bu, nɛ dia ɔkɔndɔ ɔsɔ tetemalaka la mbuta dikambo diande ate: “Lam’akindi lu pa, ndi akasengasenga [Jehowa, Nzambi k]andi, akayakitshakitsha efula la ntundu ka [Nzambi k]a washi. Ndi akolombe, ku [Jehowa] akawukela, aketawo osengosengo andi, akûkaluya uya la Jerusalema lu diulelu diandi. Ku Manase akalimbitela ate: [Jehowa] keli [Nzambi ka mɛtɛ].”​—2 Ekondo 33:12, 13.

Ɔnkɔnɛ, hatokoke koma dia mbuta esadi eto ɔnɛ onto kapanda akasale pɛkato ka nyɔi paka l’ɔtɛ w’ɔnɛ wakawawotshanya oma l’etshumanelo. Nshi efula mbeyaka mbeta la ntondo ka kɛnɛ kele l’atei w’otema w’onto ndjeyama. Koko, mbutamaka mbala efula dia, oyango ɔmɔtshi watshanyawɔ onto oma l’etshumanelo ele dia kimanyiya kanga pɛkato dia nde kana yimba l’elongamelo ka nde ndjatshumoya ndo kalola oya l’etshumanelo.

Lam’ele onto aya kema to l’atei w’etshumanelo, woho tshɛ wayondotshikitanya otema ande ndo dionga diande mbeyaka mɛnama ntondo le wanɛ wasɛna la nde kamɛ, ɛnyɛlɔ oko olonganyi kana ase nkumbo kande. Wanɛ wɛna etshikitanu ɛsɔ koka shikikɛ ɔnɛ onto lakatshe munga ɔsɔ kosala pɛkato ka nyɔi. Vɔ koka tshutshuyama dia nɔmba dikambo diande dia nde kondja wolo w’oma l’Ɔtɛkɛta wa Nzambi ndo dia Jehowa salɛ onto lakasale pɛkato ɔsɔ kɛnɛ kɔtɔnɛ la lolango lakinde.​—Osambu 44:21; Undaki 12:14.

Kânga mbele anto amɔtshi koka monga l’akoka wa mɛna shikaa ɔnɛ onto lakatshe pɛkato amboyatshumoya, aha anto tshɛ wa l’etshumanelo mbakoka mɛna dikambo sɔ. Ɔnkɔnɛ, vɔ koka monga l’okandokando, tshimba wɔɔngɔ, ndo kânga takana lo dikambo sɔ naka vɔ mboka onto ɔmɔtshi alɔmba lo sɛkɛ dikambo di’onto lakatshanyema oma l’etshumanelo. L’ɔtɛ wa dikambo sɔ, wanɛ walanga nɔmba dikambo di’atshi wa kɔlɔ wa woho ɔsɔ pombaka sala dikambo sɔ paka lam’ewɔ vamɛ ato ndo mbewoyaka dikumanyi dia l’etshumanelo etshikitanu w’otema ndo wa dionga wasala onto lakasale kɔlɔ.

[Osato wa lo lɛkɛ 30]

Pɛkato ya weke yaki Manase yakadimanyiama lam’akandayakitshakitsha la ntondo ka Jehowa

[Efundelo wɛnya kanga osato wa lo lɛkɛ 29]

Mbɔsama oma lo Illustrirte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s