“Uma lu usasi aye mbatutenaka usasi”

OSASE ekɔ ɛngɔ kɛmɔtshi kele mbala efula sho ndjeyaka ohomba awɔ paka kura ambotshɔ kana asukanyi aso waya lo wodjima. Diɛsɛ ko, ɛngɔ “katotomɛ esase” oma l’olongo, mbut’ate wonya, hahekɔki toma esase pondjo. Diɛsɛ oma l’esase wa wonya, sho koka mɛna, ndɛ, pɛnga, ndo sɛna.

Lam’ele osase wekɔ ohomba efula lo lɔsɛnɔ, hatokoke mamba dia mbadia lo dibuku di’Etatelu di’osase wakatongama lo lushi la ntondo l’etongelo. “[Nzambi akati ati: Usasi ayali. Ku usasi akayala.” (Etatelu 1:3) Anto woka Nzambi wɔma oko Nkumekanga Davidi woketawɔka nshi tshɛ dia Jehowa mbele kiɔkɔ ya lɔsɛnɔ ndo y’osase. Davidi akafunde ate: “Eteko ka lumu keko lasuki la ye. Uma lu usasi aye mbatutenaka usasi.”​—Osambu 36:9.

Ɛtɛkɛta waki Davidi mendanaka l’osase wa mɛtɛ mɛtɛ ndo wa didjidji. Dibuku (Encyclopædia Britannica) mbutaka ɔnɛ: “Osase kimanyiyaka washo dia mɛna.” Diɔ mbutaka nto ɔnɛ: “Oleki tenyi dikina dia demba diendana l’awoki, washo mbaleka toma awui otsha lo wɔɔngɔ w’onto.” Lam’ele efula k’akambo wekaso nemanɛka la washo wakatakondja oko woshasha, Afundelo kambaka nto l’osase lo yoho ya didjidji.

Diakɔ diakatɛ Yeso ambeki ande ate: “[Osase w]a wa la kete mbemi. One landjela, hakendakenda lu udjima, keli ndi ayuyala la [osase w]a lumu.” (Joani 8:12) Osase wa didjidji wakatɛkɛta Yeso lanɛ aki losango l’akambo wa mɛtɛ lakandasambishaka, lakakokaka ngamula timba ndo etema w’ampokami ande. L’ɔkɔngɔ wa vɔ tshikala ɛnɔnyi efula lo wodjima wa lo nyuma, ambeki waki Yeso wakayokokaka shihodia sangwelo diaki Nzambi diendana l’anto ndo l’elongamelo ka Diolelo. Ɔsɔ aki mɛtɛ ‘Osase wa lomu,’ nɛ dia ewo kɛsɔ akakoke mbakonya lo lɔsɛnɔ la pondjo. Lam’akandalɔmbaka She lele l’olongo, Yeso akate ate: ‘Lɔsɛnɔ la pondjo lɔnɛ, weke dia keya wɛmɛ Nzambi ɔtɔi ka mɛtɛ, la Yeso Kristo lakayatome.’ (Joani 17:3) Tatɔnyɔlake pondjo osase ɔsɔ wa lo nyuma!