Sho tshɛ tekɔ l’ohomba wa mandɔma

AKI lushi la dimɛna efula le kiɛndakɛnda ya womoto shɔ. Kânga mbakinde l’ohomba w’engwelo lo tena dikina, lushi lɔsɔ nde aki la dionga dia dimɛna efula. Koko l’otsho wa lushi lɔsɔ, l’ɔkɔngɔ wa vɔ mbolasha lo mbeto, nyango akoke ɔnande ɔsɔ alela. Lam’akawawombola bonde kakandalelaka, nde akakadimola akɛdja asɔi ate: “Onde ɛlɔ dimi hamongi ɔna l’ɔlɔlɔ?”

Wombola ɔsɔ wakasha nyango pâ l’asolo. Nshi tshɛ nde aki suke dia mbisha ɔnande engwelo. Koko lushi lɔsɔ, kânga mbakandɛnyi woho wakasale ɔnande ɔsɔ la wolo dia monga la lɔkɛwɔ la dimɛna, nyango kombotɛ kânga tshɛkɛta tshɔi dia mbândola.

Aha paka ana w’akɛnda wa wamato ato mbele l’ohomba wa lowando ndo w’ekeketshelo. Sho tshɛ tekɔ l’ohomba wa dikambo sɔ oko weso l’ohomba wa dako ndo wa engwelo.

Ngande watotoyaokaka etena katandola onto l’otema ɔtɔi na? Kema dikambo sɔ tɔngɛnyangɛnyaka ndo toshaka ɔlɔ lushi l’otondo? Sho mbokaka di’onto ɔmɔtshi akɛnyi kɛnɛ kakatasadi ndo nde todjaka yimba. Kɛsɔ toshikikɛka dia kɛnɛ kakatasadi kaki ɔlɔlɔ, ndo dui sɔ totshutshuyaka dia nyomoleka sala ɔlɔlɔ nto lo nshi yayaye. Aha la tâmu, lowando l’oma k’ɛse otema tokotolaka mbala efula oya le onto lotshungudi etena ka mbuta dikambo dimɔtshi diatokeketsha.​—Tukedi 15:23.

Yeso Kristo akeyaka ohomba wa mandola anto. Lo wɛla ande wa talata, owandji (Yeso ndamɛ) akandola as’olimu tshɛ la wangasanu ate: “We ukambi w’ololo la kolamelu.” Lowando la ngasɔ mɛtɛ ngɛnyangɛnyaka onto! Kânga mbakiwɔ l’akoka wotshikitanyi, vɔ wakalongola lowando la woho ɔtɔi.​—Mateu 25:19-23.

Lâsɔ tohɔ nyango kiɛndakɛnda ya womoto shɔ. Sho hatohombe konga dia paka anto wolela ko sho ndjowawandola. Koko, sho kokaka nyanga waaso wa mandola anto. Lo mɛtɛ, ekɔ ohomba efula dia sho mandolaka anto oma k’ɛse otema l’oseka diaaso tshɛ.