Esambelo le wanɛ walela dia kondja ekimanyielo

BIBLE kema tsho dibuku diasha ekimanyielo ka lo yimba. Koko, tɔ toshaka esambelo ndo tokimanyiyaka dia sho ngɛnangɛna la lɔsɛnɔ kânga mbahomanaso l’ekakatanu. L’eshikikelo tshɛ, Afundelo mbutaka ɔnɛ: “Untu akuto uma le umuntu! Lumu landi leli mundumundu, halukimo nsutshasutshama.” (Jobo 14:1) Ekakatanu ɛmɔtshi tokomɛka l’ɔtɛ wa eongelo kaso k’anto wele kema kokele. Ko onto akɔna ele ntondotondo lo kiɔkɔ y’asui w’anto?

Bible mɛnyaka di’ekɔ etongami kɛmɔtshi ka lo nyuma ka kɔlɔ kelɛwɔ Satana Diabolo. Nde ekɔ “ukeshi a wa la kete tshe” ndo nde mbele lo kiɔkɔ y’ekakatanu efula wele l’anto. Koko Bible mɛnyaka nto ɔnɛ etena kande kayanga komɛ. (Enyelo 12:9, 12) Kem’edja nto, Nzambi ayanga komiya asui tshɛ wela Satana anto wodjashi lôkama ɔnɛ wa nkɛtɛ. Lo ndjela Bible, Nzambi ekɔ lo ndaka andja w’oyoyo wosembwe wayokumiya ɔkɔmwɛlɔ tshɛ.​—2 Petero 3:13.

Ekɔ mɛtɛ ekeketshelo dia mbeya ɔnɛ asui tshɛ wɛnya anto pâ ekɔ wa lo tshanda mɔtshi tsho! Lo ɛlɔmbwɛlɔ ka Diolelo diaki Nzambi dia l’olongo, diambokimɔma l’anya waki Yeso Kristo, awui wa wɛngiya ndo asui wayokomɛ. Lo kɛnɛ kendana la Nkumekanga kakasɔnama oma le Nzambi kɛsɔ, Afundelo mbutaka ɔnɛ: “Ndi kameli uhumbi lam’awulelelandi, ndu usi wula laha la ukimanyidi pupu. Ndi kukaki amenyi fono la asi wula ketshi, kamelaki nyumu ya amenyi fono. Ndi katshunguli nyumu yawo uma le akang’a lukesu la wa ngala. Dikila diawo diayuyala ushinga a wulu lu ashu andi.”​—Osambu 72:12-14.

Etena k’ekotshamelo k’ɛtɛkɛta wa prɔfɛsiya ɛsɔ kambosukana efula. Sho koka ndjɔngɛnangɛna la lɔsɛnɔ la pondjo lo paradiso ka la nkɛtɛ lɛnɛ ayonga akambo w’amɛna efula. (Luka 23:43; Joani 17:3) Mbeya alaka wa lo Bible washa ekeketshelo asɔ mbishaka elongamelo ndo esambelo le wanɛ walela dia kondja ekimanyielo.

[Efundelo wɛnya kanga osato wa lo lɛkɛ 32]

Dikɛnda dia womoto diambɔkɔmɔ otema: Fɔtɔ ILO/J. Maillard