Bonde Katetemala Ɛmɛnyi wa Jehowa Ndja Ndjokenda?

L’andja w’otondo, etete kele l’Ɛmɛnyi wa Jehowa l’olimu awɔ w’esambishelo ka lo luudu la luudu mbeyamaka dimɛna efula. Anto amɔtshi ndjambolaka bonde katetemala Ɛmɛnyi wa Jehowa ndja ndjowaenda, djekoleko etena kɛnyawɔ paka yema ya wahɔ tshitshɛ tsho lo losango lawɔ. Mikanda ehende w’oma la Russie kimanyiyaka dia nembetshiya ɔkɔkɔ watetemalawɔ sala dikambo sɔ.

Masha, osekaseka ɔmɔtshi w’ɛnɔnyi 19 wa l’osomba wa Khabarovsk mbutaka ate: “Lo mbuta mɛtɛ, nshi ya ntondo dimi lakêwɔka Ɛmɛnyi wa Jehowa watekana oko onto lewɔ hemɔ kɛmɔtshi.” Koko, l’ɔkɔngɔ wa nde mbadia numɛlɔ mɔtshi ya periodikɛ yatondja Ɛmɛnyi wa Jehowa, nde akatshikitanya dionga diande. Masha mbutaka ate: “Periodikɛ tshɛ yakamadia yaki mɛtɛ l’awui w’amɛna efula, koko kɛnɛ koleki tshɛ ohomba ele yɔ tshutshuyaka onto dia mɛna akambo wa l’andja ɔnɛ lo yoho yotshikitanyi. Lakatatɛ shihodia yema yema bonde kele anto amɔtshi wekɔ la lɔsɛnɔ lele l’oyango.”

Svetlana, mama kɛmɔtshi ka l’osomba wa Ussuriysk, wele lo yɛdikɔ ya kilɔmɛtɛlɛ 80 lo nɔrdɛ ka Vladivostok lo wodja wa Russie, akafunde ate: “Atete edja kotatemi la mbadia Tshoto y’Etangelo la Réveillez-vous! Periodikɛ nyɛ yekɔ ohomba efula lo nshi yaso nyɛ. Dimi ngɛnangɛnaka asawo tshɛ wa lɔkɔ. Vɔ mbishaka onto wetshelo ndo wekɔ l’awui w’oshika ndo wakimanyiya onto. Losaka! Losaka efula lo woho wenyu l’andja ɔnɛ ndo l’olimu w’ɔlɔlɔ ndo w’ohomba wakambanyu.”

Ɛmɛnyi wa Jehowa wa l’andja w’otondo mbɔsaka wombola waki ɔpɔstɔlɔ Paulo watshutshuya onto dia kana yimba la nɛmɔ di’efula. Wombola akɔ mbutaka ɔnɛ: “Ukundi eyawo mbuka, lam’ahawo la usambisha?” (Romo 10:14) Bonde kahayɔshi kanga minitɛ ngana tsho dia mpokamɛ Ɛmɛnyi wa Jehowa mbala kekina kayowoya dia ndjokenda? Wɛ lawɔ koka ngɛnangɛna losango l’ekeketshelo lele lo Bible, Ɔtɛkɛta wa Nzambi.