Onde Nzambi mbele kiɔkɔ y’ekakatanu aso?

LAM’AKANDAMA ɔnaki Marion la womoto laki aya opalanga la hemɔ ka wolo ka l’ɔtɛ, Marion akasale tshɛ kotosala efula ka l’atei aso.a Nde akalɔmbɛ Nzambi dia mbokimanyiya. Marion mbutaka ate: “Dimi halohɔ di’ekɔ etena kɛmɔtshi kakamayaoke oko wakamayaoke l’etena kɛsɔ.” L’ɔkɔngɔ diko, hemɔ k’ɔnande la womoto kakaleke monga wolo, ko Marion akatatɛ mbɔsa diele oko Nzambi bu. Nde akambolaka ate: “Lande na kambokomɛ dikambo nɛ?” Nde kokoka mboka bonde kakakoke Nzambi ka ngandji ndo kakanɛ anto mbokalɛ ngasɔ.

Kɛnɛ kakakomɛ Marion kɛsɔ ekɔ dui diakomɛ anto efula. L’andja w’otondo, lo tena dia pâ anto efula ndjaokaka diele oko Nzambi ambâkalɛ. L’ɔkɔngɔ w’odiakelo w’okana ande, Lisa akate ate: Dimi lakatetemala “ndjambola nte bonde ketawɔ NZAMBI di’akambo wa kɔlɔ komɛ anto. Dimi talashisha mbetawɔ kami tshɛ le Nzambi, koko ekɔ mɛtɛ dia mbetawɔ kami kaya bu nto wolo oko wakitɔ ntondo.” Woho akɔ wâmɛ, l’ɔkɔngɔ wa nde pomana la mpokoso kɛmɔtshi ka kɔlɔ kakakomɛ ɔnande l’ashashi, mama kɛmɔtshi akate ate: “Nzambi kosambami ndoko yema lo kɛnɛ kakakomɛ. Nde kokanɛmi kana mbokami kɛtshi kânga yema.” Nde kotshaka ate: “Dimi halodimanyiyaki Nzambi pondjo.”

Anto akina mongaka la kɛlɛ otsha le Nzambi lo menda akambo watomba l’ahole wasɛnawɔ. Vɔ mɛnaka woho wadiɛnɛ anto la wola ndo la ndjala, woho watshika anto ngelo yawɔ l’ɔtɛ w’ata ndo lo menda efula k’ana kambotshikala tshike l’ɔtɛ wa SIDA ndo miliyɔ y’anto yavɔ la hemɔ kina. Lo menda akambo asɔ tshɛ ndo mpokoso ya woho ɔsɔ, anto efula mbishaka Nzambi onongo; lo woho wahandekɛ lonya lande.

Koko kɛnɛ kele mɛtɛ ele, Nzambi bu lo kiɔkɔ y’ekakatanu wadiɛnɛ anto lawɔ. Ɔnkɔnɛ, tekɔ l’ɛkɔkɔ wa shikaa wa mbetawɔ dia Nzambi ayanga minya akambo tshɛ wambela nkumbo k’anto asui. Tambokɔlɔmba dia wɛ mbadia sawo diayela dia wɛ mɛna dia Nzambi tokanɛka mɛtɛ.

[Nɔtɛ ka l’ɛse ka dikatshi]