Mukanda otsha le Nɔa

“ƆNALENGO la ngandji Nɔa, aya mbala efula yamomadia dikambo diayɛ lo Bible ndo woho wakayasɛlɛ wato wa luudu lɛnɛ akayashimbamɛ wɛ la nkumbo kayɛ k’otondo lam’akalɔ Mvula k’Elola.”

Ɔsɔ ekɔ ɛtɛkɛta wa mbɔtwɛlɔ wa mukanda waki y’ana mɔtshi ya womoto yele l’ɛnɔnyi 15 yelɛwɔ Minnamaria yakɔtɔ lo kɛnyɔ mɔtshi ya lofunda yaki lam’asa ambeki wele l’ɛnɔnyi 14 polo 21. Kɛnyɔ ya lofunda shɔ yakalɔngɔswama oma le tshunda dimɔtshi diendana l’otomelo wa mikanda, nɛ diendana l’Embetsha w’Ɔtɛkɛta wa Lôtɔ la nɛ diendana l’Otondjelo w’Ekanda wa la Finlande. Akɛnyi wa kɛnyɔ shɔ wakalɔmbama dia funda mukanda wendana la dibuku dimɔtshi. Onto akakokaka fundɛ ofundji wa dibuku kana onto ɔmɔtshi lɔtɛkɛtami lo dibuku diakɔ. Embetsha wakasɔnɛ mikanda olekanyi 1 400 oma le ambeki awɔ ko vɔ tomɛ wanɛ wakahombe tadia mikanda akɔ. Ambadi asɔ wakasɔnɛ mikanda esato wakaleke ekina tshɛ. Minnamaria akangɛnangɛna dia mukanda ande wakatombe lo dihole dia sato.

Lande na kakafundɛ Minnamaria ɔna la dikɛnda ɔsɔ Nɔa pami kakasɛnɛ aya ɛnɔnyi oko 5 000 mukanda? Nde mbutaka ate: “Bible ekɔ ɛngɔ ka ntondo kakandjɛ lo yimba. Lambekesanɛ efula la anto wɔtɛkɛtshiwɔ dikambo diawɔ lo Bible. Dimi lambadia akambo efula lo kɛnɛ kendana la wɔ ndo talohɛ awui asɔ. Lakasɔnɛ dia funda dikambo dia Nɔa nɛ dia lɔsɛnɔ lande lekɔ dimɛna efula ndo lɔ tshikitana la lami.”

Mukanda waki Minnamaria otsha le Nɔa komɛka l’ɛtɛkɛta ɛnɛ: “Wɛ ayotshikalaka ɛnyɛlɔ k’ɔlɔlɔ ka mbetawɔ ndo k’okitanyiya. Yoho yayɛ ya lɔsɛnɔ keketshaka anto tshɛ wanɛ wadia Bible dia sala akambo lo ndjela mbetawɔ kawɔ.”

Mukanda ɔsɔ w’ombadi wa Bible wa dikɛnda ɔsɔ mɛnyaka dia Bible ekɔ mɛtɛ la ‘lɔsɛnɔ ndo la nkudu koleki’ le anto tshɛ, oyadi akɛnda kana epalanga.​—Heberu 4:12.