Lɔkɛndɔ l’otale lakonge la difuto

ALAPƆLƆ ɔnɛ ndja oma lo wodja wa République démocratique du Congo ndo vɔ mendanaka la akadiyɛso ahende wa lo nkumbo ɔtɔi wakɔshi yɛdikɔ ya munda lɔkɛndɔ l’otale lo ɛtshi ka nkɛtɛ kakalɔmaka ta dia tɔtɔ lo Losanganya la distrikɛ laki la ɔtɛ a dui ɔnɛ: “Tosha Nzambi lotombo” la Lisala. Lâdiko dia wetshelo wa lo nyuma ndo lɔngɛnyi l’Akristo lakawalongamɛka dia tokondja lo losanganya lɔsɔ, vɔ wakalongamɛka nto l’asolo walomɔlomɔ dia tohomana la anangɛso watotomamaka oma lo biro ka filialɛ k’Ɛmɛnyi wa Jehowa, mbuta ate oma la Kinshasa. L’ɔtɛ wa ta diaki lo ndɔma lo wodja, ɛnɔnyi efula wakete aha la vɔ mɛna ndoko ɔnangɛso ɔtɔi lakatomama oma lo biro ka filialɛ, ɔnkɔnɛ vɔ wakalongamɛ dia tɛnana la wɔ lo diaaso sɔ.

Akadiyɛso ahende asɔ wakamɔ oma lo ngelo kawɔ ka lôtɔ, mbuta ate oma la Basankusu otsha la Lisala lo wato, lɔkɛndɔ la suke la kilɔmɛtɛlɛ 300 lo ngamba ndo lo lushi la woke. Lɔkɛndɔ lɔsɔ lakawaɔsɛ mingu shato. Lam’ele vɔ akɔ ahende wekɔ lo kamba olimu wa lo tena tshɛ, ɔmɔtshi lo edja ka ɛnɔnyi 3 ndo okina ɛnɔnyi 19, vɔ wakakambe la diaaso sɔ dia dianganya lokumu l’ɔlɔlɔ la Diolelo. Vɔ waketsha wenya 110 lo sambisha anto wakahomana la wɔ lo lɔkɛndɔ lɔsɔ, wakakahanya traktɛ 200 ndo periodikɛ 30.

Lo ɛtshi ka nkɛtɛ kɛsɔ, lushi lɔsɔ mongaka mbala efula la waa nguwo ndo la kɔndɛ. Takawakokaka duka wato awɔ l’ashi asɔ l’otsho, mbuta ate ndoko wato waketetaka naka wonya ambodja! Vɔ wakatenyanya nto bariyɛlɛ efula ya asɔlayi.

Kânga mbele ɔsɔ aki lɔkɛndɔ l’otale efula ndo l’ɔkɔmwɛlɔ, akadiyɛso waki l’ɔngɛnɔngɛnɔ dia mbidja welo ɛsɔ. Vɔ akɔ ahende waki la lowando ndo l’ɔngɛnɔngɛnɔ w’efula dia monga lo losanganya lɔsɔ lakasalema la Lisala. Etema awɔ wakalole l’ɔngɛnɔngɛnɔ dia akambo wa mɛtɛ, ndo vɔ wakakeketshama oma lo lɔngɛnyi la l’anangɛso la akadiyɛso 7 000 waki lo losanganya lɔsɔ. L’ɔkɔngɔ wa losanganya, vɔ wakahombe ndɔshana l’ekakatanu akɔ wâmɛ dia kalola lakawɔ, lɛnɛ akawatane nkumbo yawɔ tshɛ ki ndo la alemba w’ɔlɔlɔ.