Vɔ sambishaka lokumu l’ɔlɔlɔ le akanga a mpoke

“VƆ NYELAKA awui wa lo nyuma!” Atete edja, kɛsɔ mbakate ɔnɔmbɔdi ɔmɔtshi wa luudu lakokɛwɔ esombe w’anto l’osomba wa Navalcarnero, la Madrid, lo wodja w’Espagne lo dikambo dia Ɛmɛnyi wa Jehowa wakatshu tembola dihole diande sɔ. Kakɔna kakotshutshuya dia mbuta ngasɔ?

Efula k’anto wodjashi lo dihole dielɛwɔ Rosas del Camino center wekɔ akanga a mpoke. Koko, lam’ele Ɛmɛnyi wa Jehowa wakadje welo dia mbeka Ɔtɛkɛta w’akanga a mpoke w’ase Espagne, vɔ wakakoke sawola l’anto asɔ waki lo mvudu shɔ. Ɔnɔmbɔdi wa dihole sɔ akândola Ɛmɛnyi wa Jehowa lo woho wakawetawɔ mbetsha wenya awɔ aha la nɔmba falanga dia mbetsha anto waki la mposa ka awui wa lo nyuma awui akɔ. Nde akɛnyi etombelo w’ɔlɔlɔ waki la lokumu l’ɔlɔlɔ la Diolelo le anto wa lo dihole sɔ. Ndo anto asɔ, djekoleko wanɛ waki komɛnaka ndo kombokaka dimɛna wakangɛnangɛna efula oyelo wa Ɛmɛnyi wa Jehowa le wɔ.

Eulogio, ɔmɔtshi l’atei w’anto asɔ lele tshungu ndo lohoke, ekɔ lo mbeka kakianɛ Bible la Ɛmɛnyi wa Jehowa. Lushi lɔmɔtshi, etena kakatatetemalaka wekelo dimɛna, pami kɛmɔtshi k’osombe akasukana suke l’Ɔmɛnyi ɔmɔtshi ndo akawosha pɔɛmɛ kɛmɔtshi kakafunde anto wa lo luudu lɔsɔ dia mɛnya lowando lawɔ. Pɔɛmɛ kakɔ kaki l’ɔtɛ a dui ɔnɛ: “Dia monga Ɔmɛnyi wa Jehowa.” Lo etenyi kɛmɔtshi, pɔɛmɛ kakɔ mbutaka ɔnɛ: “Vɔ nsɛnaka yoho ya lɔsɛnɔ y’ɔlɔlɔ ndo yokongɛmi dimɛna ndo Jehowa mbashaka lomba l’ɔngɛnɔngɛnɔ. Vɔ membolaka anto mbala la mbala nɛ dia vɔ ndjaɛkɛka le Jehowa.”

Wɛkamu waki lawɔ le Jehowa ɔsɔ mbakatshutshuya Ɛmɛnyi wa Jehowa efula wa lo andja tshɛ dia mbeka ɔtɛkɛta w’akanga a mpoke lo wedja awɔ. Lo yoho shɔ, vɔ sambishaka anto asɔ losango l’elongamelo lakeketsha lele lo Bible.