Akanga a memakana wayokita nkɛtɛ
Jean-Marie Pelt, nomb’ewo kɛmɔtshi ka la France kendana l’awui w’ahole wadjasɛ anto akate ate: “Lekɔ lo kanyiya woho wayokadimɔ andja ɔnɛ. . . . Aha kakianɛ, koko edja efula lo nshi yayaye, mbuta ate etena kayonga olongo w’oyoyo la nkɛtɛ k’oyoyo.”
LONYANGU lele la anto efula lo menda woho wambolana ahole wadjasɛwɔ ndo lɔsɛnɔ la kɔlɔ lele lawɔ lanɛ la nkɛtɛ mbâkonyaka dia vɔ kombola mɛna woho wayokadimɔ nkɛtɛ kɛnɛ paradiso. Aha paka anto wa lo ntambe 21 kɛnɛ ato mbakombola dikambo sɔ. Edja efula la ntondo, Bible akalake dia nkɛtɛ kayokadimɔ Paradiso. Ɛtɛkɛta waki Yeso w’ɔnɛ: “Wane weli la memakana . . . wayukita kete” ndo w’ɔnɛ: “Lulangu laye latshami la kete uku atshamalo l’ulungu,” wekɔ l’atei w’ɛtɛkɛta wa lo Afundelo waleka mbeyama. (Mateu 5:5; 6:10) Koko ɛlɔ kɛnɛ, anto efula hawetawɔ dia nkɛtɛ kɛnɛ kayokadimɔ paradiso lɛnɛ ayodjasɛ akanga wa memakana. Efula ka wanɛ wayata ɔnɛ Akristo mbewɔ mbutaka dia Paradiso kamboshishɔka.
Jurunalɛ ya la France yatomba lomingu tshɛ yelɛwɔ ɔnɛ La Vie nembetshiyaka lande na kele aseka Mupɛ waya bu la mbetawɔ oyadi lo dikambo dia paradiso ka la nkɛtɛ kana ka l’olongo. Yɔ mbutaka ɔnɛ: “L’ɔkɔngɔ wa vɔ monga wetshelo wakaleke ndjala la shɛngiya le aseka Mupɛ lo yɛdikɔ y’ɛnɔnyi 1900, [wetshelo wendana] la paradiso hawoyoleka tɛkɛtama lam’asangana ambetawudi, oyadi lo wetshelo washama Lushi la lomingu lo mvudu ya Nzambi, lo kalasa ya teoloji kana lo wetshelo wa katakismu.” Wotaka dia tshɛkɛta paradiso yaya l’ɔnɔngɔ w’awui wele “ehekesa ndo wolo mana fundo.” Esambisha ɛmɔtshi mbewɔka dia kamba la tshɛkɛta paradiso, nɛ dia yɔ “mbelaka tokanyi efula tendana la ɔngɛnɔngɛnɔ wa la nkɛtɛ.”
Lo kanyi yaki Frédéric Lenoir, nomb’ewo kɛmɔtshi k’awui wendana la lɔsɛnɔ la lo tshunda di’anto ndo layasha l’awui w’ɔtɛmwɛlɔ, tokanyi tendana la paradiso taya oko “hamanema fundo.” Ndo Jean Delumeau, ombewi ɔmɔtshi w’ɛkɔndɔ wakafunde abuku efula lo dikambo sɔ mbutaka dia alaka wa lo Bible hawotokotshama lo yoho ya mɛtɛ mɛtɛ, koko ya didjidji. Nde akafunde ate: “Lo dimbola di’ɔnɛ: ‘Kanyi yakɔna yeke l’anto lo dikambo dia Paradiso?’ Mbetawɔ k’Okristo kadimolaka ɔnɛ: Diɛsɛ oma lo eolwelo ka Oshimbedi, mbele lushi lɔmɔtshi tayɔsɛna l’ɔngɛnɔngɛnɔ lo Paradiso.”
Onde losango lendana la paradiso lâkendana la anto? Kakɔna kayokomɛ okama aso wa nkɛtɛ ɔnɛ lo nshi yayaye na? Onde elongamelo kaso kendana la nshi yayaye kekɔ wodjima oto, ko kana kekɔ ka shikaa? Sawo diayela diayokadimola lo ambola asɔ.
[Efundelo wɛnya kanga osato wa lo lɛkɛ 2]
LOHOSO: Emma Lee/Life File/Getty Images