“L’ɔtɛ wa yana ya hiami y’ɛnɔnyi divwa”
ETENA tshɛ kakayaka Ɛmɛnyi wa Jehowa lakande, Wiesława, lodjashi lo sidɛ ka wodja wa Pologne akâkawoyaka losaka la loshilambo tshɛ oma lâsɔ ko nde mbatɛ dia nde hangɛnangɛna sawola la wɔ. Lushi lɔmɔtshi, Samuel, yana ya hiami y’ɛnɔnyi divwa la nyango wakatshu laka mama kɛsɔ. Mbala kɛsɔ, Wiesława aketawɔ dia mpokamɛ losango l’oma lo Bible ndo akalongola periodikɛ kakatɛkɛtaka dia paradiso ka la nkɛtɛ.
Lam’ele Eohwelo ka nyɔi ka Yeso Kristo aki suke la salema, Samuel akakombola mbelɛ mama kɛsɔ oya lo diaaso dia lânde sɔ. Ɔnkɔnɛ, nyango akotshindɛ dia vɔ tembola mama kɛsɔ nto ndo mbosha dikatshi dia leeta. Lam’akandɛnyi yana shɔ yakalɔtshi dimɛna, Wiesława akawatɛ dia vɔ mbokonga yema, ko nde akɔtɔ lo luudu dia tengola ahɔndɔ. Etena kakandakalola, nde akahokamɛ Samuel, aketawɔ dikatshi dia leeta diakandawosha ndo akambola ate: “Kandje dimɛ, kana kandje ndo la omɛmi?” Oma lâsɔ nde akakotsha ate: “Kânga omɛmi halangi ndja, dimi layoya. L’ɔtɛ ayɛ mbayomoya Samuel.” Ɔnkɔnɛ, dia ngɛnyangɛnya Samuel, mama kɛsɔ akaye lo Eohwelo oko wakandalake.
Etena kakashamaka sawo dia Eohwelo, Samuel akadjasɛ suke la nde ndo akawɛnyaka avɛsa wakadiemaka. Dui sɔ diakawambiya efula. Nde akangɛnangɛna losanganya la Eohwelo woho w’anyanya lo woho wele ndo awui w’eshika wakatama lo ɛtɛkɛta wa wɔdu. Nde akangɛnangɛna nto woho wakawolongola la wangasanu tshɛ ndo dionga di’ɔlɔlɔ diaki la ase etshumanelo otsha le nde. Oma k’etena kɛsɔ, Wiesława akatamanya nanga awui wa lo nyuma ndo akatatɛ ndjaka lo nsanganya y’Ɛmɛnyi wa Jehowa mbala la mbala. Atete edja, nde akate ate: “Lekɔ la sɔnyi lo woho wakamatonaka nyohokamɛ ntondo etena kakanyayaka lakami. Koko lambonyotɛ dia paka l’ɔtɛ wa yana ya hiami y’ɛnɔnyi divwa mbakamahokamɛ losango lanyu l’oma lo Bible, mbuta ate l’ɔtɛ wa Samuel.”
L’ɛnyɛlɔ ka Samuel lodjashi lo wodja wa Pologne, akɛnda akina w’Ɛmɛnyi wa Jehowa tombolaka Nzambi oma l’enyɔ awɔ, oma l’ɔlɔtɔ awɔ ndo oma lo lɔkɛwɔ lawɔ l’ɔlɔlɔ. Naka wɛ ekɔ dikɛnda, kete wɛ lawɔ kokaka monga l’akoka wa kimanyiya anto wele l’etema w’ɛlɔlɔ dia ngɛnangɛna awui wa lo nyuma w’eshika.