Daniel la tshapa yande ya losanganya la woke

YESO akahangwɛ ewandji w’ɛtɛmwɛlɔ wakayaɔsaka oko anto w’ɛlɔlɔ wakomala etena kakawɛnyi ana w’akɛnda watombola Nzambi lo sɛkɛ. Yeso akawambola ate: “Nyu nyatali nyati: We akaluwanya diandu l’enyo wa ana w’ashashi la waloma?”​—Mateu 21:15, 16.

Yana mɔtshi y’ɛnɔnyi esamalo yelɛwɔ Daniel, lele lo etshumanelo kɛmɔtshi ka l’Allemagne kasala nsanganya lo ɔtɛkɛta wa russe ekɔ ɛnyɛlɔ kɛmɔtshi kɛnya dia akɛnda wakatetemala tombola Jehowa polo ndo ɛlɔ. Nde akatshu la nyango la enondo ande la womoto lo losanganya lɔmɔtshi la woke lakasale Ɛmɛnyi wa Jehowa l’osomba wa Duisburg. Ɔsɔ aki mbala kawɔ ka ntondo ka mbɔtɔ lo losanganya la woke la ngasɔ. Awui tshɛ waki eyoyo le wɔ, ɛnyɛlɔ: ɔtɛlɛ wakawahange, lemba la woke l’anto lakaye lo losanganya lɔsɔ, ndjela losanganya lɔsɔ nshi shato, batismu ndo dramɛ. Ko ngande wakayalɔmbɔla Daniel lo losanganya lɔsɔ? Nde aki la lɔkɛwɔ l’ɔlɔlɔ.

Lushi l’ɔtɔi l’ɔkɔngɔ wa losanganya, mbuta ate lam’akawakalola lakawɔ, nde aketɔ la y’osose y’efula dia ntshɔ otsha lo kalasa kawɔ ka matɛrnɛlɛ. Ko kakɔna kaki lo dikɔti diande na? Tshapa yande yakɛnyaka dia ndo nde mbaki lo losanganya lɔmɔtshi la woke. Nyango akawotɛ ate: “Losanganya lamboshila. Ɛlɔ wɛ kokaka minya tshapa yayɛ oma lo dihɔndɔ.” Koko Daniel akate ate: “Dimi nangaka onto tshɛ mbeya lɛnɛ akamatshu ndo mbeya awui wakamateka lɛkɔ.” Ɔnkɔnɛ, nde akalɔtɛ la ofunu tshɛ tshapa yande lushi l’otondo la kalasa kawɔ. Etena kakawombola ombetsha awɔ dikambo dia tshapa yakandalɔtɛ, nde akɔkɔndɔlɛ woho wakete losanganya.

Lo sala ngasɔ, Daniel aki lo ndjela ɛnyɛlɔ ka nunu di’ana w’akɛnda wakatombola Jehowa lo ntambe yetshi.