Etena kele Akristo wekɔ lo fufɔma oko eponga
YEMA tshitshɛ la ntondo ka nyɔi kande, Yeso akatɛ ambeki ande ate: ‘Nyolonge, Satana akalɔmbɛ dia nyofufola oko eponga.’ (Luka 22:31) Kakɔna kakandalange nembetshiya oma l’ɛtɛkɛta ɛsɔ na?
Lo nshi ya Yeso, wonelo w’eponga akɔsaka wenya efula ndo akalɔmbaka dia mbidja welo. Ntondotondo, amunyi wakatshumanyaka asudu w’eponga oma lo ekambɔ. Oma lâsɔ, vɔ wakakitshaka asudu w’eponga lo nkɛtɛ ya kolo ko pondjaka etamba lâdiko kana wakɔsaka nyama yokelekiwɔ dia yɔ takotolaka ɛngɔ kɛmɔtshi ka wotsho kokitshishawɔ lâdiko di’asudu akɔ w’eponga dia mbasusola. Yoho shɔ mbakawasusolaka eponga lo nshi shɔ. Oma lâsɔ, akambikambi wakɔsaka eponga ɛsɔ ko mbapupola. Etondo wakakakɔka la nkɛtɛ ndo fufudi yakafumbɔka la lɔpɛpɛ. L’ekomelo, vɔ wakafufolaka nto dimɛna dimɛna etondo wakakwɛ lo nkɛtɛ dia minya diangɔ dia kɔlɔ tshɛ diele lɔkɔ.
Dia kotsha ɛtɛkɛta waki Yeso, Satana akalɔsha aha la mpekɔ ambeki wa Yeso wa lo etena kɛsɔ ndo nde ekɔ lo tɔlɔsha ɛlɔ kɛnɛ. (Ef. 6:11) Lo mɛtɛ, aha okakatanu tshɛ wahomana laso mbaya mbala kakɔ ɔtɔi oma le Satana. (Und. 9:11) Koko Satana mongaka suke dia kamba la ehomɔ tshɛ kende la tɔ dia ndanya olowanyi aso. Ɛnyɛlɔ, nde koka totshutshuya dia sho monga la nsaki ka lomombo, dia sho sɔna tɔkɛnyɔ ta kɔlɔ kana dia sho ndjakimɔ l’awui wa mindo wa dieyanelo. Nde koka nto kamba la asekaso wa la kalasa kana wa l’olimu ndo la ewotɔ aso wele bu ambetawudi dia vɔ tɔsɛngiya dia sho mbɔtɔ kalasa y’efula kana nyanga elimu wa falanga efula. Ndo nto, Satana kokaka kamba la ɔlɔshamelo wɛnama dia ndanya olowanyi aso otsha le Nzambi. Lo mɛtɛ, ekɔ toho tokina takamba la Satana dia tofufola.
Ngande wakokaso shika tanga la ntondo ka otunyi a wolo ɔsɔ? Hatokoke sala dikambo sɔ oma lo wolo aso hita. Satana toleka wolo, koko sho mbeyaka dia Jehowa ndeka Satana wolo la fwa. Naka sho ndjaɛkɛ tshɛ le Jehowa, mbɔlɔmba l’otema ɔtɔi dia nde tosha lomba ndo dihonga dia mbikikɛ ndo naka sho ndjaɛkɛ tshɛ lo ɛlɔmbwɛlɔ kande, kete nde ayotokeketsha dia sho shika tanga la ntondo ka ɛlɔshamelo waki Satana.—Osam. 25:4, 5.
Etena keso lo ehemba, sho pombaka monga la dikoka dia ‘tshikitanya ɔlɔlɔ la kɔlɔ’ ndo mbewɔ dia minganyiyama la nkeso yaki Satana. (Heb. 5:13, 14) Jehowa kokaka tokimanyiya dia sho monga la dikoka sɔ. Oma lâsɔ, sho pombaka sukɛ kɛnɛ kele ɔlɔlɔ, oyadi kakɔna kakoka tokomɛ. Naka sho ndjela ɛlɔmbwɛlɔ kaki Jehowa, kete weho akɔ tshɛ nde ayɔtshɔkɔla yɛdikɔ yambotɔsa la dihonga tshɛ dia sala kɛnɛ kele ɔlɔlɔ.—Ef. 6:10.
Satana mbeyaka pemba dia tofufola oko eponga. Koko oma lo wolo wa Jehowa, sho kokaka shika tanga la ntondo kande, ndo tshikala nge lo mbetawɔ. (1 Pet. 5:9) Diakɔ diatoshikikɛ Ɔtɛkɛta wa Jehowa ɔnɛ: ‘Nyɔlɔshane la Diabolo, ko nde ayolawɔ etale oma le nyu.’—Jak. 4:7.