Onde wɛ amboyalɔngɔsɔla dia mamɛ dietawɔ diayɛ?

ONDE wɛ ambohomanaka la okakatanu wakayaoke dia wɛ pombaka mamɛ mbetawɔ kayɛ? Tɔsɛdingole kɛnɛ kakakomɛ Susana, kadiyɛso kele l’ɛnɔnyi 16 ka lo wodja wa Paraguay. Etena kakawekaka awui wendana la lɔkɛwɔ lo kalasa kawɔ, onto ɔmɔtshi akate ɔnɛ Ɛmɛnyi wa Jehowa hawetawɔ Daka di’Edjedja, Yeso kana Mariya. Amɔtshi wakate nto ɔnɛ Ɛmɛnyi wa Jehowa wekɔ tetawɔ etawɔ ndo anto wakombola mvɔ lo dihole dia vɔ mbetawɔ sakemɛ. Kakɔna kotoyosala la ntondo k’awui asɔ?

Susana akalɔmbɛ Jehowa ndo akemɛ lonya. Vɔ waki suke la tomba oma lo kalasa, ɔnkɔnɛ nde akalɔmbɛ ombetsha awɔ dikimɔ dia ndjosha sawo dimɔtshi lo kɛnɛ kendana la dietawɔ di’Ɛmɛnyi wa Jehowa. Ombetsha aketawɔ. Lo mingu hiende yakayele, Susana akalɔngɔsɔlaka sawo diakɔ lo kamba la biukubuku Les Témoins de Jéhovah : Qui sont-ils ? Quelles sont leurs croyances ?

Lushi lakandahombe mbisha sawo sɔ lakakoke. Susana akalembetshiya lande na kelamɛso Ɛmɛnyi wa Jehowa. Nde akalembetshiya nto elongamelo kaso lo dikambo dia nshi yayaye ndo lande na kahatetawɔ okaloyelo wa dikila. Oma lâsɔ, nde akalɔmbɛ ase kalasa dia mboka ambola. Ambeki efula wakemɛ anya. Ombetsha akâmbe lo mboka woho wakakadimolaka ombeki wa dikɛnda ɔsɔ ambola lo kamba l’Afundelo.

Ombeki ɔmɔtshi akate ate: “Mbala kakamatshu lo Mbalasa ka Diolelo kɛmɔtshi, dimi kɔmɛna kânga lohingu ɔtɔi.” Ombetsha akalange mbeya lande na. Susana akadia Osambu 115:4-8 ndo Etumbelu 20:4. La diambo tshɛ, ombetsha akate ate: “Lande na kele ɛtɛmwɛlɔ aso ndola tɔɔ la pingu etena kele Bible tonaka dikambo sɔ?”

Sawo dia ambola la ekadimwelo sɔ diakatetemala l’edja ka minitɛ 40. Etena kakambola Susana ambeki dia kana vɔ nangaka menda bandɛ vidɛo Pas de sang : la médecine relève le défi, vɔ tshɛ wakakadimola ɔnɛ eelo. Ɔnkɔnɛ, ombetsha akalɔngɔsɔla ekongelo ka sawo dikina mbishama lushi lakayele. L’ɔkɔngɔ wa vɔ menda bandɛ vidɛo kɛsɔ, Susana akalembetshiya esakelo wahawakambe la dikila wetawɔ Ɛmɛnyi wa Jehowa ɛmɔtshi. Lo kɛnɛ kendana la dikambo sɔ, ombetsha akate ate: “Dimi kombeyaka dia ekɔ esakelo efula wahawakambe la dikila kana wahɔ waya lo sakemɛ aha la dikila. Onde esakelo ɛsɔ wekɔ paka wa Ɛmɛnyi wa Jehowa?” Lam’akokadimola Susana ate kema, ombetsha akate ate: “Mbala kayaye, lam’ayɔkɔkɔla Ɛmɛnyi wa Jehowa lo lokuke lami, dimi layosawola la wɔ.”

Susana akalɔngɔsɔla sawo dia minitɛ 20 koko diɔ diakayɔsaka wenya wa tango 3. Lomingu ɔtɔi oma lâsɔ, ambeki akina wakasha asawo dia sukɛ dietawɔ dia l’ɛtɛmwɛlɔ awɔ. L’ekomelo k’asawo asɔ, ambola efula wakonyiyama, koko ambeki wakashaka asawo asɔ komonga l’akoka wa mamɛ dietawɔ diawɔ. Ombetsha akawambola ate: “Lande na kenyu kema l’akoka wa mamɛ dietawɔ dianyu oko wakasale Susana k’osekanyu k’Ɔmɛnyi wa Jehowa?”

Okadimwelo waki ɔnɛ: “Vɔ mɛtɛ mbekaka Bible. Koko sho hateke.”

Ombetsha akakadimɔ le Susana ndo akawotɛ ate: “Nyu mɛtɛ mbekaka Bible ndo salaka la wolo dia kamba la kɛnɛ katatɔ. Nyu sunganaka mandɔma.”

Ondo Susana akakoke tshikala ki. Koko, lo mbɔsa yɛdikɔ ya nɔngɔsɔla kanyi yaki l’ambeki akina, nde akayele ɛnyɛlɔ k’ɔlɔlɔ ka yana ya yimato y’ose Isariyɛlɛ yahawodi lokombo yakatɔlama lo lɔhɔmbɔ oma le ase Suriya. Yana ya yimato shɔ yakadjasɛka lo luudu laki Namana, owandji w’alembe laki la hemɔ ka sudi demba tshɛ. Yana ya yimato y’ose Isariyɛlɛ shɔ yakatɛ nkumɛnde ka womoto ate: “Utunduyala khumemi ayali lasuki l’umvutshi weli la Samariya, tshiki ndi ûtokonoya sudi kandi!” Yana ya yimato shɔ kotona dia sambisha akambo wendana la Nzambi ka mɛtɛ. Dui sɔ diakayokonyaka dia nkumɛnde Namana ndjokoma ɔtɛmɔdi waki Jehowa.​—2 Khum. 5:3, 17.

Woho akɔ wâmɛ mbele, Susana kokoka tona dia mbewoya akambo wendana la Jehowa ndo la ekambi ande. Lo mbɔsa yɛdikɔ ya mamɛ dietawɔ diande etena kakadiadjama tâmu, Susana akakitanyiya didjango dia l’Afundelo nɛ: “Nyukidia Kristu uku Khumadiondjo lu etema anyu. Nyutayalongosodi dia nyu mbeya lama nkaluya diui le untu tshe lanyumbula, dia elungamelu keli l’etema anyu. Keli nyutshi okone la memakana la [dilɛmiɛlɔ di’efula].” (1 Pet. 3:15) Onde wɛ ekɔ suke dia mamɛ dietawɔ diayɛ ndo mbɔsa yɛdikɔ ya sala dikambo sɔ etena tshɛ kakondjayɛ diaaso?

[Osato wa lo lɛkɛ 17]

Dihomɔ nɛ koka kokimanyiya dia mamɛ dietawɔ diayɛ