Esambishelo ka lo lobingu
ETENA kakinde l’osomba wa Atɛna, ɔpɔstɔlɔ Paulo akatshɔka lushi tshɛ lo lobingu dia tosambisha anto lokumu l’ɔlɔlɔ lendana la Yeso. (Etsha 17:17) Paulo akasɔnɛ dia tosambisha lo lobingu nɛ dia lɛkɔ mbaketshaka ase Atɛna wenya efula.
Suke l’ɛnɔnyi 2 000 l’ɔkɔngɔ diko, Ɛmɛnyi wa Jehowa wekɔ lo sambisha lo lobingu dia dianganya lokumu l’ɔlɔlɔ la Diolelo diaki Nzambi. Lande na? Nɛ dia anto efula kokaka tanema lo ahole asɔ. Ɛlɔ kɛnɛ, anto efula sombaka diangɔ diawɔ lo lobingu. L’ɔkɔngɔ wa vɔ kondja lotshungɔ oma le kanga makashinyi ɔmɔtshi, Ɛmɛnyi wa Jehowa ɛmɔtshi wakakitsha abuku walembetshiya Bible lâdiko dia mɛsa.
Ɛnyɛlɔ, lo makashinyi ɔmɔtshi wa l’osomba wa New Jersey, lo wodja wa États-Unis, wakakitsha ekanda ɛmɔtshi wakɛnyaka woho wa monga la mbekelo y’ɔlɔlɔ lo nkumbo. Etombelo akɔna wakayala? Lushi ɔtɔi loto, vɔ wakakahanya abuku 153 lo ɛtɛkɛta esamalo.
Womoto ɔmɔtshi akasukana lo dihole diakawakitsha ekanda akɔ akahokamɛ la yambalo tshɛ etena kakolembetshiyaka Ɔmɛnyi wa Jehowa ɔmɔtshi awui wa lo mukanda akɔ. Nde akasuya dia ekɔ ohomba efula mbidja Nzambi lo lɔsɛnɔ laso la lo nkumbo. Wakawosha ekanda wayela ɛnɛ: Etshama oma le Ombetsha a Woke, Sheke y’ɔngɛnɔngɛnɔ wa lo nkumbo, ndo Les jeunes s’interrogent — Réponses pratiques.
L’ɔkɔngɔ a midi, pami kɛmɔtshi akete suke la dihole diakawakitsha ekanda etena kakandalange mbɔtɔ lo makashinyi waki suke la lawɔ. Yambalo yande yakakotwama otsha lo dibuku Les jeunes s’interrogent. Kadiyɛso kakemala lam’aki ekanda akɛnyi dia pami kakɔ akangɛnangɛna dibuku diakɔ. Nde akawombola ate: “Onde ekɔ dibuku dimɔtshi diambokɔngɛnyangɛnya?” Nde akasuya l’ɔtɛ ndo akatshume lohita lo dibuku Les jeunes s’interrogent. Kadiyɛso akawosha dibuku diakɔ. Pami kakɔ akate dia nde aki l’ana w’apami asato. Etena kakawatetemalaka la sawola, nde akate dia nde tosawolaka la wɔ mbala ɔtɔi lo lomingu. Anande ahende wa nondo waya l’ɛnɔnyi dikumi l’ɛmɔtshi. Etena kakandendaka dibuku diakɔ, nde akate dia nde koka kamba la awui wele lɔkɔ lo ɛkɛtshanyelo awɔ ɛmɔtshi wa lo nkumbo. Kadiyɛso akawɛnya ndo dibuku Sheke y’ɔngɛnɔngɛnɔ wa lo nkumbo ndo akoshikikɛ dia nde la wadɛnde wayotana alako amɔtshi w’eshika wendana la woho wakokawɔ mbɔsa tɛdikɔ lo nkumbo. Pami kakɔ aki la lowando l’efula, akakimɔ woshasha ande ndo aketawɔ di’onto ɔmɔtshi ndjowendaka.
Ngande wakayaoke Ɛmɛnyi wa Jehowa ɛsɔ l’ɔtɛ w’esambishelo kakawasale lo lobingu? Kadiyɛso kɛmɔtshi akate ate: “Dimi lakangɛnangɛna yoho y’esambishelo shɔ. Ɔsɔ aki mɛtɛ dikambo di’ɔngɛnɔngɛnɔ le mi!” Kadiyɛso kekina akate ate: “Jehowa akate dia lokumu l’ɔlɔlɔ layosambishama polo lo tokoma ta nkɛtɛ. Ɛlɔ kɛnɛ la Paramus l’osomba wa New Jersey, lokumu l’ɔlɔlɔ lɔnɛ lambosambishama le anto watɛkɛta ɛtɛkɛta wotshikitanyi. Aki mɛtɛ dui dia diambo dia monga l’atei w’anto wakasale esambishelo kɛsɔ. Onto tshɛ lakasale esambishelo kɛsɔ aki l’ɔngɛnɔngɛnɔ. Ndoko onto la l’atei aso lakalange kalola la ngelo la dikɔlɔ.”
Onde wɛ kokaka sambisha lokumu l’ɔlɔlɔ lo toho totshikitanyi? Yoho y’esambishelo yoleki kamba la so ele esambishelo ka lo luudu la luudu. (Etsha 20:20) Koko, onde wɛ kokaka ndjadjɛ oyango wa sambisha lo lobingu?