Akomɛ onto mɛtɛ etena kavɔnde?

“Anima tshɛ hawovu, kânga w’atshi wa kɔlɔ . . . Vɔ sowaka pondjo pondjo lo dja yahadimala ndo hawovu ndo asui awɔ hawokoke [komɛ].”​—Clément ka l’Alexandrie, ofundji ɔmɔ wa lo ntambe ka hende ndo ka sato tena diaso nɛ.

LO ƐNYƐLƆ ka Clément, wanɛ wasukɛ wetshelo w’ɔnɛ ifɛrnɔ ekɔ dihole diasoyama anto mbutaka dia anima w’onto hawovu. Onde Bible sukɛka wetshelo ɔsɔ? Nyɛsɔ tɔsɛdingole okadimwelo washa Ɔtɛkɛta wa Nzambi lo ambola wayela anɛ.

Onde Adama onto la ntondo aki la demba diahavu? Yema tshitshɛ l’ɔkɔngɔ wa Nzambi tonga Adama, Nde akawotɛ ate: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:16, 17) Adama komonga la demba diahavu.

Kakɔna kakakomɛ Adama l’ɔkɔngɔ wa nde sala pɛkato? Nzambi kombofundɛ dilanya dia nde sowaka pondjo pondjo lo ifɛrnɔ. Koko, ekadimwelo k’ase Asɔnyi ka Bible k’ekila mbutaka kɛnɛ kakatɛ Nzambi Adama ɔnɛ: “Uma l’ulimu a ntumba diangasa l’elundji kaye mbayuyukundjaka mbu ya nde, edja ndu we ambukalula lu kete, ne dia uma loko mbakayosama. We eko ditshu, okone we ayukalula utsha lu ditshu.” (Etatelu 3:19, sho mbɛnganyisha alɛta ango.) Kɛnɛ kakate Nzambi hɛnya dia etenyi kɛmɔtshi kaki Adama kakahombe nsɛna l’ɔkɔngɔ wa nyɔi kande.

Onde ekɔ onto ɔmɔtshi lahavu? Ndoko onto lahavu. Bible mbutaka lo Undaki 3:20 ɔnɛ: “Vo tshe watutshokaka lu dihuli diame. Vo tshe wakatungama uma lu ditshu, okone vo tshe watukalulaka lu ditshu.” Ɔpɔstɔlɔ Paulo akafunde ate: “Uku akayi kolo la kete uma le untu otoi [Adama], la nyoi uma lu kolo; ku nyoi akadiangana le antu tshe ne dia antu tshe wakatshi kolo.” (Romo 5:12) Anto tshɛ salaka pɛkato, ɔnkɔnɛ vɔ tshɛ mvɔka.

Onde wanɛ wambovɔ mbeyaka ndo mbokaka awui? Ɔtɛkɛta wa Nzambi mbutaka ɔnɛ: “Wasena mbeyaka vati: Vo wayuvo. Keli wavo haweyi nduku dikambu.” (Undaki 9:5) Lo tɛkɛta kɛnɛ kakomɛ anto l’ɔkɔngɔ wa nyɔi, Bible mbutaka ɔnɛ: “Ndi atukalulaka lu kete. Ku lushi lako, tukanyi tandi tayulanyema.” (Osambu 146:4) Naka wanɛ wavɔ “haweyi nduku dikambu” ndo ‘tokanyi tawɔ tambolanyema,’ ngande wakokawɔ mboka kandji k’asui wa lo ifɛrnɔ?

Yeso Kristo akɛdika nyɔi la djɔ, koko aha la eongelo kɛmɔtshi kakoka onto mbeya akambo. (Joani 11:11-14) Koko, anto amɔtshi mbeyaka mbuta dia Yeso mbaketsha dia ifɛrnɔ ekɔ dihole dia dja diakashema atshi wa pɛkato. Nyɛsɔ tɔsɛdingole kɛnɛ kaketsha Yeso mɛtɛ lo dikambo dia ifɛrnɔ.