Yana ya yimato ya lokaho

ATETE edja, yana ya yimato mɔtshi y’ɛnɔnyi divwa yele lo wodja wa Brésil akɔshi yɛdikɔ ya mbatola falanga yakandombe l’ahende, lɛkɛ lɔnɛ dɔlara 18 ndo lɛkɛ lokina dɔlara 25. Nde akadje dɔlara 18 lo shɛtɛshɛtɛ ya adepasɛ wa l’etshumanelo ya lo Mbalasa kawɔ ka Diolelo. Ndo nde akatome dɔlara 25 lo Bɛtɛlɛ k’Ɛmɛnyi wa Jehowa kâmɛ la yɛtshi ya mukanda wakandafunde ɔnɛ: “Lambokimɔ woshasha ɔnɛ dikambo dia olimu wakambema l’andja w’otondo. Nsaki kele la mi ele ka nkimanyiya analengo la akadiyɛmi efula wa l’andja w’otondo dia vɔ nsambisha lokumu l’ɔlɔlɔ. Ngandji k’efula kele la mi otsha le Jehowa mbambotshutshuya dia dimi nkimɔ woshasha ɔnɛ.”

Ambutshi wa yana ya yimato shɔ wakawetsha ohomba wa mbisha lonya l’olimu w’esambishelo ka Diolelo. Vɔ wakɔ̂kɔkɔmiya nto ohomba wa ‘tombola Jehowa la diangɔ diande dia nɛmɔ.’ (Tuk. 3:9) L’ɛnyɛlɔ ka yana ya yimato shɔ, nyɛsɔ sho tshɛ tosukɛke wahɔ wa Diolelo l’ohetoheto tshɛ l’etshumanelo kaso ndo l’andja w’otondo!