Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

• Lande na kele ɔnwɛlɔ a wanu wa tshambandeko wekɔ wâle, oyadi onto hadjwe?

Ɔtɛkɛta wa Nzambi tewolaka dimɛna oma lo wâle wa lo nyuma wele la ɔnwɛlɔ a wanu wa tshambandeko. (Tuk. 23:20; Is. 5:11, 12) Yeso akɛnya dia onto lanɔ wanu wa tshambandeko mbohɛka dia tekɔ lo nsɛna lo tena dia kɔlɔ. (Luka 21:34, 35)—7/1, lɛkɛ 6.

• Onde Tukedi 6:30 keketshaka onto dia mbuva?

Kema. Ndo divɛsa dioyedi mɛnyaka dia ɔnɛ lava ekɔ l’onongo lo washo wa Nzambi. Kanga mbele ɔnɛ lava l’ɔtɛ wa ndjala hokoka monga la onongo wele oko ɔnɛ lava la lokaki tshɛ kana l’oyango wa salɛ ɔnɛ lavande kɔlɔ, nde ekɔ la ɔkɛndɛ wa ‘mfuta’ kana kaloya kɛnɛ kakandave. Wanɛ wakombola mbetawɔma le Nzambi hawohombe mbuva oyadi lo diaaso diakɔna tshɛ. (Tuk. 6:31)—7/1, lɛkɛ 13.

• Mbeya dia Jehowa “atendaka utema” pombaka monga la shɛngiya yakɔna le so? (1 Sam. 16:7)

Mbeya dia Jehowa mbidjaka yimba lo otema, mbuta ate lonto la l’etei k’otema, kiɔkɔ ya tokanyi, y’eyango, ndo ya nsaki y’onto pombaka totshutshuya dia nkɛnɛmɔla waonga wayotetɛ anto w’ɛlɔlɔ lo washo wa Jehowa.—7/1, lɛkɛ 17.

• Ngande wakakambaka mama ka yimba k’ose Juda la wenya wakandetshaka kâmɛ la anande?

Mama ka yimba akahombaka nkamba la tena diakandatatshɔka la anande lo lobingu kana diakawayakalolaka dia mbakimanyiya dia mbeya ndo nshihodia atɔndɔ wa l’Afundelo. (Euh. 6:6, 7) Nde akakokaka nto nkɛtshanya la anande wa wamato atɔndɔ wayowakimanyiya dia vɔ monga anto weya nsomba diangɔ dimɛna. (Tuk 31:14, 18)—7/1, lɛkɛ 19.

• Naa atɔndɔ amɔtshi wa lo Bible wakoka nkimanyiya atshukanyi dia mbeya mbidjasɛ l’akila awɔ?

Bible mbutaka lo dikambo dia pami kambotshuka dia nde “ayutshika shi la nyangu, ayumamana la wadendi, ku vo wayuyala dimba otoi.” (Etat. 2:24) Ndo ɔnɛ: “Ote a umuntu eli pami,” mbuta ate omɛnde. (1 Kor. 11:3)—7/1, lɛkɛ 28.

• Onde anto wambovɔ kokaka nkimanyiya wanɛ wasɛna?

Bible nembetshiya l’ɛtɛkɛta wa wɔdu ndo wokɛma esadi dia anto wambovɔ hawokoke nkimanyiya wanɛ wasɛna nɛ dia vɔ “haweyi nduku dikambu.” Eelo, vɔ haweye ndoko dikambo ndo hawokoke nsala ndoko dui lo wahɔ w’onto ɔmɔtshi. (Und. 9:5, 6, 10)—7/1, lɛkɛ 21.

• Ɔhɛmwɛlɔ akɔna washa Bible onto lambovusha olonganyi ande lo kɛnɛ kendana la ndjakakitola l’anto akina?

Kânga mbele kema kɔlɔ di’onto nkombola dia nde ntshikala etena kɛmɔtshi ndamɛ, Tukedi 18:1 mbutaka ɔnɛ: “One latuyatulaka uma le antu akina, atuyangaka paka lulangu landi lutu.” Lo dihole dia nsala ngasɔ, ekɔ dui dia lomba di’onto lambovusha olonganyi ande nyanga ekimanyielo le ewɔtɔ ndo angɛnyi ande wanɛ wayadja lo dihole diande. Lo dikambo sɔ, etshumanelo k’Akristo kekɔ yɛdikɔ ya dimɛna efula. (Is. 32:1, 2)—7/1, lɛkɛ 30.