‘Akambo wakandasale wamboyela’
THEODORE JARACZ, laki ɔtɔi ɔmɔtshi wa l’Olui-walɔmbɔla w’Ɛmɛnyi wa Jehowa akashidiya esakelo kande ka lowango ka la nkɛtɛ la pindju ka Lushi la sato, Ngɔndɔ ka samalo 9, 2010. Nde aki l’ɛnɔnyi 84 ndo akatshike wadɛnde Melita lele l’ɛnɔnyi 53. L’atei w’anto akina wakandatshike mbele ndo kadiyɛnde lele la ana asato, ɔtɔi la pami la ahende wa wamato.
Ɔnangɛso Jaracz akôtɔ Ngɔndɔ ka divwa 28, 1925 la Pike County, Kentucky lo wodja w’États-Unis, nde akayakimɔ le Jehowa ele l’ɛnɔnyi 15, lo Ngɔndɔ k’enanɛi 10, 1941. Ɛnɔnyi ehende l’ɔkɔngɔ, etena kakinde l’ɛnɔnyi 17, nde akɔshi olimu w’ombatshi mboka wa pondjo ndo lâsɔ mbakandatatɛ olimu wa lo tena tshɛ wokambinde suke l’ɛnɔnyi 67.
Lo 1946, etena kakinde l’ɛnɔnyi 20, ɔnangɛso Jaracz akɔtɔ lo kalasa k’esambele ka Ngiliyadɛ. L’ɔkɔngɔ wa kalasa kɛsɔ, ɔnangɛso Jaracz akatomama oko omendji weteta la Cleveland, Ohio, ɛtshi kɛmɔtshi ka nkɛtɛ ka lo wodja w’États-Unis. Lo 1951, nde akatomama lo filialɛ ka lo Australie dia tɔlɔmbɔla olimu lo wodja ɔsɔ. Annuaire des Témoins de Jéhovah 1983 wakɛnya dia ɔnangɛso Jaracz “akakeketsha efula anangɛso wa lo wodja ɔsɔ oma lo ohetoheto waki la nde lo mbidja awui wa teokrasi ndo oma lo woho wakandashaka ɛnyɛlɔ k’ɔlɔlɔ l’olimu w’esambishelo.”
Etena kakandakalola lo wodja w’États-Unis, ɔnangɛso Jaracz akatotshukaka Melita Lasko lo Ngɔndɔ ka dikumi l’ahende 10, 1956. Vɔ wakatatɛ lɔsɛnɔ lawɔ l’atshukanyi etena kakinde omendji weteta lo kambɛ la wolo tshɛ etshimbedi ndo adistrikɛ l’ɛtshi ka woke ka nkɛtɛ ka lo wodja w’États-Unis. L’ekomelo ka 1974, ɔnangɛso Jaracz akelamɛ dia tokamba oko ɔtɔi ɔmɔtshi wa l’Olui-walɔmbɔla w’Ɛmɛnyi wa Jehowa.
Tayotetemalaka mbohɔ ɔnangɛso Jaracz oko okambi wa kɔlamelo wakayakimɔ le Jehowa ndo wakayashaka l’otema ɔtɔi l’elimu wa teokrasi. Nde aki omi lakokaka wadɛnde ngandji ndo lakakotshaka ehomba ande ndo nde aki pami kaki la lonyuma l’ɔlɔlɔ laketshaka wahɔ w’anto akina la ntondo ka wahɔ ande hita. (1 Kor. 13:4, 5) Woho wakandayashaka la otema ɔtɔi le anto akina akɛnamaka lo nsaki k’efula kaki la nde ka salɛ anto tshɛ akambo la losembwe ndo la kɛtshi. Lâdiko dia lâsɔ, ngandji kande kaha l’ekomelo ndo woho wakandayashaka le anto akina akɛnamaka l’ohetoheto waki la nde l’olimu w’esambishelo.
Kânga mbeso la kandji efula lo woho wambotoshisha ɔnangɛso Jaracz laki l’etete efula l’olimu ndo laki ɔtɔi ɔmɔtshi wa lo nkumbo ka Bɛtɛlɛ ndo lo nkumbo kaso ka l’andja w’otondo k’onto l’ɔnango, tekɔ l’ɔngɛnɔngɛnɔ l’ɔtɛ w’olimu ande wa kɔlamelo wakandakambɛ Jehowa lo edja k’ɛnɔnyi akumi. Tekɔ l’eshikikelo dia ‘nde akatshikala la kɔlamelo polo lo nyɔi ndo ambolongola dɛmbɔ dia koso dia lɔsɛnɔ.’ (Eny. 2:10) Têkɔ nto l’eshikikelo dia ‘akambo wakandasale wamboyela.’—Eny. 14:13.