Onde wɛ akeyaka?
Ngande wakakondjaka anto wa lo nshi y’edjedja “eshinga . . . wa tilili” watɛkɛtama mbala efula lo dibuku di’Etumbelu?
▪ Lo ndjela ɔkɔndɔ wa lo Bible, luudu la dipɛma ndo asoko wa tabɛrnakɛlɛ, mbuta ate dihole diakatɛmɔlaka ase Isariyɛlɛ w’edjedja, wakasalema “l’eshinga wa linene w’ololo, w’edima, w’engingi, la wa tilili.” (Etumbelu 26:1; 38:18) “Ahondo w’ekila” w’ɛlɔmbɛdi wakasalemaka nto la “eshinga . . . wa tilili.”—Etumbelu 28:1-6.
Eshinga wa telele wakeyamaka nto oko kermès, mbuta ate eshinga wa mbêla kana w’ɛndɔndɔ. Wakasalaka eshinga ɛsɔ l’edo wa tofumbɔfumbɔ ta wadi ta lo dioho dia waa coccidés. Tofumbɔfumbɔ tɔsɔ tele bu la nsala sɛnaka lo ɔlɔdu watondja osongo welɛwɔ Quercus coccifera, wa la Moyen-Orient ndo wa l’Omamu wa Mediteraneya. Ekele wa tofumbɔfumbɔ ta wadi tɔsɔ taki l’ɔtɔngu wa beela. Etena kele tofumbɔfumbɔ tɔsɔ la ekele, tɔ tekɔ la woke wele oko djowalowa ya tshitshɛ yelɛwɔ pois. Tɔ kakatɛka l’akatshi kana lo totahe ta totshitshɛ t’osongo ɔsɔ. Oma lâsɔ, naka anto tinda l’anya ndo timinola, tofumbɔfumbɔ tɔsɔ tondjaka ashi wa beela wetɛ dihɔndɔ telele. Ombewi ɔmɔtshi w’ɛkɔndɔ w’ose Rɔma, Pline l’Ancien akate dikambo dia eshinga wa telele ndo akawadia l’atei w’alangi wakaleke nɛmɔ lo nshi yande.
Afundji akɔna w’Afundelo w’Akristo wa lo Grɛkɛ wakikɔ lo Pɛntɛkɔsta 33 T.D.?
▪ Mɛnamaka dia ondo apami asamalo l’apami enanɛi wakafunde etenyi k’Afundelo kɛsɔ mbaki lawɔ.
Lo ndjela ɔkɔndɔ wa Etsha wa Atumami, Yeso akadjangɛ ambeki ande ate: “Tanyumoki uma la Jerusalema, keli nyukungi daka dia Papa.” (Etsha 1:4) Ɔkɔndɔ akɔ wâmɛ mɛnyaka di’anto akina wakayofundaka Bible l’ɔkɔngɔ, mbuta ate Mateo, Joani ndo Petero wakakitanyiya didjango sɔ ndo wakasangana “kame lu dihuli otoi,” l’ambeki akina. Anango Yeso vɔ lawɔ waki lâwɔ. (Etsha 1:12-14; 2:1-4) Ahende l’atei awɔ, Jakɔba nde la Jude (Judasi) vɔ lawɔ wakayofundaka abuku ahende wa lo Bible wɔlame nkombo yawɔ.—Mateu 13:55; Jakoba 1:1; Jude 1.
Lo Evanjiliɔ ande, Mako akatɛkɛta di’ombeki ɔmɔtshi w’ɔlɔngɔlɔngɔ wakalawɔ l’otsho wakawande Yeso. Mɛnamaka dia nde akatɛkɛtaka dikambo diande ndamɛ lam’ele l’etena kɛsɔ ambeki akina tshɛ wakalawɔ Yeso. (Mako 14:50-52) Ɔnkɔnɛ, mɛnamaka dia Mako mbaki ombeki wa samalo ndo mbokɛmaka dia ndo nde mbaki lo Pɛntɛkɔsta.
Afundji akina ahende wambotshikala w’Afundelo w’Akristo wa lo Grɛkɛ ekɔ Paulo nde la Luka. Lo Pɛntɛkɔsta 33 T.D., ko Paulo atakome ombeki wa Kristo. (Ngalatiya 1:17, 18) Mɛnamaka dia Luka komonga lawɔ, lam’ele nde ndjanyɛka ndamɛ oma l’ɔnɔngɔ wa “wane waki emenyi” w’olimu waki Yeso.—Luka 1:1-3.
[Osato wa lo lɛkɛ 20]
Tofumbɔfumbɔ takawakambaka latɔ dia nsala alangi
[Efundelo wɛnya kanga]
Courtesy of SDC Colour Experience (www.sdc.org.uk)
[Osato wa lo lɛkɛ 20]
Petero asha sawo lo Pɛntɛkɔsta 33 T.D.