“Kɛnɛ kakamakombolaka kambokotshama”
Ambeta ɛnɔnyi 15 wakakambaka kadiyɛso Emilia oko ombatshi mboka wa pondjo, koko nde akayotshika nkamba olimu akɔ. Lo ɛnɔnyi weke kambeta ɛnɛ, nde akakane yimba efula lo ɔngɛnɔngɛnɔ w’efula waki la nde lo etena kɛsɔ ko nde ôkombola nyomokamba olimu akɔ nto.
Olimu wa l’emunyi wakakambaka kadiyɛso Emilia wakawɔsɛka wenya efula, ndo dui sɔ diakôkiyanyaka. Lushi lɔmɔtshi, nde akate la ntondo k’ase olimu w’asekande ate: “Dimi nangaka ntatɛ nkamba wenya yema tshitshɛ.” Etena kakoke owandji ande w’olimu dui sɔ, nde akaye dia ndjowombola dia mbeya kana lo mɛtɛ mbakandate ngasɔ. Emilia akoshikikɛ ate ngasɔ mbediɔ. Lam’ele kɔpanyi kakakambaka kadiyɛso kɛsɔ kakalɔmbaka di’ase olimu kambaka wenya efula, nde akahombe ntshɔ dia tɛnana l’owandji w’olimu dia nde mbɔlɔmba lotshungɔ la ntatɛ nkamba wenya yema tshitshɛ. Nde akatshu dia tɛnana l’owandji ande ndo nde akalɔmbɛ Jehowa dia nde mbosha ki ka lo yimba ndo dihonga.
Etena kakawasawolaka, Emilia akawotɛ la dilɛmiɛlɔ tshɛ, koko la dihonga ɔnɛ nde ekɔ lo nanga ntatɛ nkamba wenya yema tshitshɛ. Nde akalembetshiya owandji ande dia nde kambaka la nshi yande ya vakashi dia nkimanyiya anto akina ndo akawotɛ ate: “Dimi lekɔ Ɔmɛnyi wa Jehowa ndo dimi kimanyiyaka anto dia mbeya awui wa lo Bible. Nshi nyɛ, anto efula haweye ntshikitanya ɔlɔlɔ la kɔlɔ ndo wekɔ l’ohomba wa lomba l’oma lo Bible dia vɔ mbɔsa tɛdikɔ t’amɛna. Dimi halokombola dia wenya ami tshɛ mbetaka paka l’olimu ɔnɛ, koko dimi nangaka dia ndeka monga la wenya wa nkimanyiya anto akina lo nyuma. Diakɔ mbakamaye dia ndjokɔlɔmba dia wɛ kitshɛkitshɛmi wenya w’olimu.”
Owandji ande w’olimu akohokamɛ dimɛna ndo akawotɛ ate nde lawɔ nangaka ntatɛ nkamba olimu wa nkimanyiya anto akina. Nde akawotɛ ate: “L’ɔtɛ w’ɛkɔkɔ woshayɛ, lambetawɔ dia kokitshɛkitshɛ wenya w’olimu. Ko onde wɛ mbeyaka dia ndo dikuta mbayokitakita?” Emilia akawotɛ ate: “Eelo, dimi mbeyaka, koko dimi kombolaka mbetɛ lɔsɛnɔ lami ɔsɛlɛngɛ. Oyango ami woleki woke ele, wa ndeka nkamba la wenya ami dia nkimanyiya anto akina lo nyuma.” Owandji w’olimu akawotɛ ate: “Dimi mandolaka wanɛ wayakimɔ la lolango lo nkamba la wenya awɔ dia nkimanyiya anto akina.”
Tolembete dia ndoko ose olimu okina wa lo kɔpanyi kɛsɔ lakalɔmbɛ dia nkitshakitsha wenya ande w’olimu onyake kadiyɛso Emilia. Waketawɔ dia nde ntatɛ nkamba paka nshi nyɛi tsho lo lomingu. Dui dia diambo ko, aha la nde nongamɛ, akandayɛna anɛ ko difuto diande diambodɛ. Kadiyɛso Emilia mbutaka ate: “Kɛnɛ kakamakombolaka kambokotshama ndo dimi koka nyomonga ombatshi mboka nto.”
Shi ndo wɛ lawɔ koka nsala etshikitanu ɛmɔtshi dia wɛ ntatɛ nkamba kana nyomokamba olimu w’ombatshi mboka?
[Efundelo wa l’etei w’odingɔ wa lo lɛkɛ 32]
Owandji w’olimu akawotɛ ate: “Dimi mandolaka wanɛ wayakimɔ la lolango lo nkamba la wenya awɔ dia nkimanyiya anto akina”