Ekeketshelo k’oma “l’enyo w’akenda”

Lo Ngɔndɔ ka dikumi l’ahende 2009, Tuminadi ta lâdiko ta lo wodja wa Russie takashimbe olimu w’Ɛmɛnyi wa Jehowa, wakahɔtɔla Ɛmɛnyi wa Jehowa wa l’osomba wa Taganrog Mbalasa ka Diolelo ndo wakate di’ekanda awɔ 34 tshutshuyaka anto l’ɔtɔmbɔkwɛlɔ. Yɛdikɔ shɔ yakadjama lo sitɛ k’Ɛtɛrnɛtɛ k’Ɛmɛnyi wa Jehowa kâmɛ la foto y’Ɛmɛnyi wa Jehowa wakendanaka la dui sɔ, mbidja ndo ana w’akɛnda.

Ngɔndɔ ngana l’ɔkɔngɔ, ase kɔmite ka filialɛ k’Ɛmɛnyi wa Jehowa wa la Russie, wakalongola mukanda ɔmɔtshi wakatome nkumbo kɛmɔtshi k’Ɛmɛnyi wa Jehowa ka l’Australie l’osomba wa Queensland, l’ɔkɔngɔ wa vɔ mbeya yɛdikɔ yakawɔsɛ anangɛso wa la Russie. Mukanda akɔ wakataka ɔnɛ: “Anangɛso la akadiyɛso wa ngandji le, anaso Cody nde la Larissa wakanandema efula lo menda mbetawɔ kele l’anangɛso wa la Russie lo tena di’ehemba. Vɔ mbofundji mikanda ɛnɛ ndo sho lawɔ tambonyotomɛ weshasha ɛmɔtshi dia nyu mbisha ana wa la Taganrog dia vɔ mbeya ɔnɛ kânga mbewɔ etale, ana w’akɛnda wele la kɔlamelo wakambɛ Jehowa l’ahole akina wekɔ lo ndjakiyanya ndo vɔ lawɔ dikambo diawɔ. Vɔ wambâtomɛ mɔyɔ wa ngandji k’onto l’ɔnango.”

L’ɔkɔngɔ wa vɔ nongola weshasha akɔ, ana wa la Taganrog wakafundɛ nkumbo ka l’Australie dia mbasha losaka. Dia mɛnya lowando lawɔ l’ɔtɛ w’ekeketshelo k’oma “l’enyo w’akenda” kɛsɔ, ɔnangɛso ɔmɔtshi lakamba lo Bɛtɛlɛ ka la Russie akafundɛ Cody nde la Larissa ate: “Ohonyokanyiya woho wayaoka anangɛso l’akadiyɛso oyadi epalanga kana akɛnda etena kahɛnyahɛnyamawɔ l’ɔtɛ wa dikambo diakiwɔ kosala. Anangɛso ndo akadiyɛso wa la Taganrog kosala ndoko dui dia kɔlɔ, koko wakâhɔtɔla Mbalasa kawɔ ka Diolelo ndo dikambo sɔ diakâkiyanya efula. Aki dui di’ekeketshelo le wɔ dia vɔ mbeya ɔnɛ anto amɔtshi wa lo wedja ekina wekɔ lo ndjakiyanya dikambo diawɔ. Losaka la mamba lo ngandji ndo lo yimba yanyu ya lokaho.”—Osa. 8:2.

Lo mɛtɛ, tekɔ lo nkenga nkumbo k’onto l’ɔnango ka l’andja w’otondo ndo ngandji kokanaso tokimanyiyaka sho tshɛ dia ndɔshana l’ekakatanu ndo l’ehemba. Etena kakayangaka ase tuminadi dia mbeya ekanda akɔna w’Ɛmɛnyi wa Jehowa watshutshuya lo lohetsho, anaso w’akɛnda wakɛnya woho wayakiyanyawɔ dikambo di’anto akina, lo mbekola wekamu tshɛ wendana la nkoho y’alemba ndo lo mɛnya mɛtɛ k’ɛtɛkɛta wa Yeso wata ɔnɛ: “Oma lo dikambo nɛ, anto tshɛ wayeya dia nyu nyekɔ ambeki ami naka nyayokana ngandji lam’asanyu.”—Jni. 13:35.

[Esato wa lo lɛkɛ 32]

Ana wa la Russie wele lo (lɔmɔsɔ) wakalongola weshasha w’oma le ana wa l’Australie wele lo (l’omi)