Awui wambetaka
‘Losango loleki dimɛna lahatokaka anto’
ETENA kakandoke diewoyelo diakashama oma lo dihole diakawalamaka dihomɔ dia Ta dia ntondo dia l’andja w’otondo diakangana mɛtrɛ 18 la osomba wa Saskatoon, Saskatchewan, la Canada, ɔnangɛso George Naish akambola ate: “Awui akɔna watawɔ asɔ?” Wakôkadimola ɔnɛ wekɔ lo nsondja dihomɔ diakawɔ aradiyo diakawakambaka la diɔ dia mbika totshoto takawashishimaka atunyi lo Ta dia ntondo di’andja w’otondo. Ɔnangɛso Naish akayotaka l’ɔkɔngɔ diko ate: “Takɛnyi dimɛna nsomba dihomɔ sɔ dia mbika aradiyo l’oyango wa sambishaka lɔkɔ.” L’ɔkɔngɔ w’ɔnɔnyi ɔtɔi, mbut’ate lo 1924, takake aradiyo welɛwɔ CHUC ndo wakatatɛ nkamba olimu. Ɔsɔ aki aradiyo wa ntondo wakatatɛ ntɛkɛta di’akambo w’ɔtɛmwɛlɔ lo wodja wa Canada.
Lam’ele Canada mbele wodja woleki woke l’Erɔpɛ, yɛdikɔ yakɔsama dia mbika aradiyo lɛkɔ l’oyango wa sambishaka. Florence Johnson lakakambaka lo aradiyo waki la Saskatoon, mbutaka ate: “Diɛsɛ la nsango yakewoyamaka lo aradiyo aso, anto efula wakiso komonga l’akoka wa nsambisha lawakawɔ wakeye akambo wa mɛtɛ. Ndo lam’ele aradiyo waki weke kasalema, anto efula wakalomɔlomɔka dia mpokamɛ akambo wakawasambishaka lɔkɔ.” Oma lo 1926, Ambeki wa Bible (lokombo lakelamɛka Ɛmɛnyi wa Jehowa lo nshi shɔ) wakonge la aradiyo awɔ vɔamɛ l’esomba ɛnɛi wa lo wodja wa Canada.a
Emisiɔ akɔna wotoyokombola pokamɛka lo aradiyo ɛsɔ tshɛ? Mbala efula, elui w’amembi wakembaka la dihomɔ diawɔ dia mishiki esambo wa Diolelo. Ndo nto, anangɛso wakashaka asawo ndo wakasalaka ɔkɛtshanyelo w’awui amɔtshi wa lo Bible. Amy Jones, lakalɔmbɔlaka nde lawɔ ɔkɛtshanyelo mbutaka ate: “Etena kakimi l’esambishelo, ndjaka dimi nsambisha onto ɔmɔtshi nganɛ, ko nde mbutɛmi ate: ‘Ahaa, lakoke dui diayɛ lushi lɔmɔtshi lo aradiyo.’”
Ambeki wa Bible waki la Halifax, Nouvelle-Écosse wakalɔmbɔlaka awui wa lo aradiyo lo yoho yaki anto wa lo nshi shɔ kosalaka, vɔ wakashaka asawo wendana l’awui amɔtshi w’oma lo Bible ko nɔmba ampokami dia vɔ mbaelɛ lo telefɔnɛ dia mboka ambola wendana l’awui akɔ. Ɔnangɛso ɔmɔtshi akayofundaka ate: “Takambe hakoke lo menda woho wakangɛnangɛna anto dui sɔ. Sho kokoka nkadimola l’oseka leeta la lo telefɔnɛ tshɛ nɛ dia ndjeta yaki efula ka mamba.”
L’ɛnyɛlɔ k’anto wa lo nshi y’ɔpɔstɔlɔ Pɔɔlɔ, anto efula waketawɔ losango l’Ambeki wa Bible ndo akina kombetawɔ. (Etsha 17:1-5) Eelo mɛtɛ, anto efula wakangɛnangɛna losango laso. Ɛnyɛlɔ, etena kakoke Hector Marshall watɛkɛta dia dibuku Étude des Écritures, nde akalɔmbɛ dia vɔ mbêla tɔvɔlimɛ tosamalo. Nde akayotaka l’ɔkɔngɔ ate: “Lakafɔnyaka dia abuku asɔ wakakoke kimanyiyami dia mbetshaka Lushi la lomingu l’ɔtɛmwɛlɔ ami.” L’ɔkɔngɔ wa nde nshidiya mbadia vɔlimɛ ya ntondo, Hector akɔshi yɛdikɔ ya ntomba oma l’ɔtɛmwɛlɔ ande. Nde akayongaka osambisha wele l’ohetoheto polo ndo lo nyɔi kande lo 1998 ndo nde akatetemala kambɛ Jehowa la kɔlamelo tshɛ. Lo ɛstɛ ka Nouvelle-Écosse, lushi ɔtɔi l’ɔkɔngɔ wa vɔ mbisha sawo diaki l’ɔtɛ a dui ɔnɛ: “Le Royaume, l’espérance du Monde” lo aradiyo, owandji w’asɔlayi welɛwɔ MacDonald akatɛ ɔnangɛso ɔmɔtshi ate: “Anto wa lo disɛnga dia Cap-Breton wakahokamɛ losango lakawasha loyi laki oko losango lahawatokaka l’ɛtshi kawɔ ka nkɛtɛ.”
Koko, ewandji w’ɛtɛmwɛlɔ wakomala efula. Aseka Mupɛ amɔtshi wa la Halifax wakatshu dia tohandjola aradiyo waki Ambeki wa Bible. Lam’ele vɔ wakasɛngiyama oma le ewandji w’ɛtɛmwɛlɔ, lo 1928 emboledi wa lɛɛta wakɔshi yɛdikɔ yaha aradiyo w’Ambeki wa Bible ntetemala nkamba olimu. Anangɛso l’akadiyɛso wakatondja jurnalɛ yaki l’ɔtɛ a dui ɔnɛ Ele kanga aradiyo? (lo Angɛlɛ), l’oyango wa mɛnya woho wambowasalɛ akambo aha la losembwe. Koko, emboledi wa lɛɛta wakatone dia nyomosha Ambeki wa Bible lotshungɔ la vɔ ntetemala mbewoya nsango lo aradiyo awɔ.
Onde dui sɔ diakakɔmɔla ndjui y’ekambi wa Jehowa waki la Canada? Kadiyɛso Isabel Wainwright akate ate: “L’etatelo, akɛnama oko atunyi wambodja otshumba. Koko lakeyaka dia Jehowa hatetawɔ di’emboledi toshimba dia sho nsambisha lo radiyo. Ɔnkɔnɛ, kɛsɔ akahombe totshutshuya dia sho nkamba la toho tokina t’esambishelo dia mbewoya anto nsango ya Diolelo.” Lo dihole dia vɔ mpika ɔnɛ paka lo aradiyo mbahombawɔ sambishaka, Ambeki wa Bible wa la Canada wakatatɛ ntshɔ dia tosambisha anto la wakawɔ. Koko lo nshi shɔ, aradiyo wakakambaka olimu wa dimɛna efula wa mbewoya anto ‘losango lahawatokaka.’—Ɔkɔndɔ ɔnɛ mbɔsama l’awui wambetaka wa lo wodja wa Canada.
[Nɔte ka l’ɛse ka dikatshi]
a Dia ndeka nsambisha efula, anangɛso wa lo wodja wa Canada wakasombe aradiyo ekina l’esomba ekina wa lɛkɔ.
[Osato wa lo lɛkɛ 31]
[Esato wa lo lɛkɛ 32]
1) Aradiyo waki la Edmonton, Alberta 2) Ɔnangɛso ɔmɔtshi alɔngɔsɔla dihomɔ di’aradiyo wa la Toronto, Ontario
[Esato wa lo lɛkɛ 32]
3) Aradiyo welɛwɔ CHUC wa la Saskatoon, Saskatchewan
[Efundelo wa l’etei w’odingɔ wa lo lɛkɛ 32]
“Sho kokoka nkadimola l’oseka leeta la lo telefɔnɛ tshɛ nɛ dia ndjeta yaki efula ka mamba”