“Laki oko evudu shakote lo lohoso latɔ”

NDEKANA apandjudi 10 000 wakadiangana lo wodja w’États-Unis dia nsala esambishelo ka laande l’edja ka nshi divwa lo Ngɔndɔ k’enanɛi ndo ka divwa 1929. Vɔ wakakahɛ anto abuku ndo tobukubuku oko 250 000. L’atei w’apandjudi asɔ mbaki ndo ambatshi mboka (colporteurs). Lofulo lawɔ lakadɛ esadi esadi. Bulletina ɔmɔtshi akate dia “dui diambo diakasalema” ele lofulo l’ambatshi mboka lakalodiama lo asato lam’asa 1927 la 1929.

Otsha l’ekomelo ka 1929, awui wendana l’ekondjelo wakafukutana l’États-Unis. Lo Ngɔndɔ ka dikumi 29, 1929, lofunge la mamba lakɔtɔ lo tshunda diendana l’awui w’okanda dia la New York (Bourse de New York). Waa bankɛ, ahole walongawɔ waa nyama ndo waa izinɛ wakadihama. Anto efula wakashisha elimu awɔ. Lo 1933, wakonolaka anto 1 000 lushi tshɛ oma lo mvudu yawɔ l’États-Unis l’ɔtɛ wakiwɔ kofuta falanga yakawasɔmbɛ dia ndjisomba.

Ngande wakakoke ekambi wa lo tena tshɛ nsambisha l’etena ka paa kɛsɔ? Luudu l’etshimbi mbakawakimanyiya. Lam’ele ambatshi mboka kofutɛka mvudu, mvudu y’etshimbi yakaakimanyiyaka dia nkamba olimu w’ombatshi mboka kaanga mbakiwɔ komonga l’ekondjelo k’efula.b Lo nshi ya nsanganya ya weke, anangɛso wakakambaka la mvudu y’etshimbi oko ɛtɛlɛ. Lo 1934, Bulletin ɔmɔtshi akalembetshiya woho wakahombe luudu l’etshimbi lɔsɔ salema, mbuta ate lakahombe monga l’ɛlɔnda w’ashi, nkuku, mbeto ndo mashinyi wadiya djungudungu.

Ambatshi mboka waki l’ekondjelo wakatatɛ nsala mvudu y’etshimbi. Victor Blackwell mbutaka ate: “Oko waki Nɔa komonga la diewo dia laande dia nsɛla waato a luudu, dimi lawɔ bu la diewo dia laande dia nsala luudu l’etshimbi.” Koko nde akayosalaka luudu l’etshimbi.

Avery nde la Lovenia Bristow waki la luudu lawɔ l’etshimbi ndo Avery mbutaka ate: “Laki oko evudu shakote lo lohoso latɔ lo yoho yakamatɛngɔlaka la luudu lami.” Bristow nde la wadɛnde wakakambe olimu w’ombatshi mboka vɔ la Harvey ndo Anne Conrow waki vɔ lawɔ la luudu l’etshimbi lakawasale la papier goudronné. Bɛtshi dia papier goudronné diakakɔka la nkɛtɛ mbala tshɛ kakawatetetaka la luudu lawɔ. Avery mbutaka ate: “Luudu laso l’etshimbi lakatshikitana la mvudu nkina tshɛ.” Nde mbutaka dia Conrow nde la wadɛnde l’anawɔ ahende mbaki nkumbo kaamɛ kaki “l’ɔngɛnɔngɛnɔ w’efula.” Koko Harvey ya wadi aki Conrow mbutaka ate: “Sho kopombaka ndooko ɛngɔ ndo Jehowa akatokokɛka etena tshɛ kakatookambɛka.” Conrow nde la wadɛnde wakayɔtɔka Kalasa ka Ngiliyadɛ ndo l’ɔkɔngɔ diko wakayaatomaka oko waa misiɔnɛrɛ la Pérou.

Battaino nde la wadɛnde wakakambe olimu w’ombatshi mboka kaamɛ. L’ɔkɔngɔ wa Giusto mbeya dia Vincenza ka wadɛnde ambotshɔ diemi, vɔ wakakonya mutuka awɔ wakasalema lo 1929 oko luudu “lakɛnamaka oko ɔtɛlɛ wa dimɛna” lo mbɛdika la tidu t’apɛma takawadjasɛka ntondo. Kaamɛ la yana yawɔ ya yimato, vɔ wakatetemala nsambisha ase Italie wakadjasɛka l’États-Unis.

Anto efula wakahokamɛka lokumu l’ɔlɔlɔ, koko ase wola ndo anto waki kokakambaka elimu kokimɔka akuta lo ekanda wakawalongolaka, koko vɔ wakawashaka weho wa diangɔ tshɛ diaki la wɔ lo dihole di’akuta. Ambatshi mboka ahende wakafunde weho wa diangɔ 64 diakawalongola oma le anto wakɛnya nsaki l’esambishelo. Diangɔ diakawafunde lo listɛ lawɔ diakafɔnaka la diangɔ diasondjawɔ lo makashinyi wa lo shamba.

Fred Anderson akasambisha olongi wa dongalonga wakakombola dia nkondja ekanda aso lo mengɔnya l’akalashi wakawosha nyango. Etena kakandakome lale olongi wa dongalonga okina, pami kɛsɔ akatɛ ɔnangɛso ate: “Dimi keema l’akalashi wakoka kimanyiyami dia mbadia ekanda anyu.” Etena kakandalɔtɛ akalashi w’osekande, nde akadia ekanda ndo nde akakimɔ woshasha l’ɔngɛnɔngɛnɔ tshɛ l’ɔtɛ w’ekanda ndo w’akalashi wakawawosha.

Herbert Abbott akatetetaka la losasa lo mutuka ande. L’ɔkɔngɔ wa vɔ mbosha nkɔkɔ shato kana nyɛi etena kakinde l’olimu w’esambishelo, nde akayitɔlaka lo lobingu, akatoyisondjaka ko akasombaka esasɛ wa mbidja lo mutuka ande. Nde akafunde ate: “Lo tena dimɔtshi, sho komongaka la dikuta, koko sho kombetawɔka dia dui sɔ toshimba dia sho nsambisha. Etena kakiso l’esasɛ wa mbidja lo mutuka, takatshɔka l’esambishelo tele la mbetawɔ ndo la wɛkamu le Jehowa.”

Kɛnɛ kakakimanyiya ambatshi mboka diaha ntshika nsambisha lo tena dia paa dia ngasɔ aki woho wakawayaɛkɛka le Jehowa ndo wakawayashikikɛ diaha nkɔmɔ. Kam’akatombe Maxwell nde la Emmy Lewis oma lo luudu lawɔ l’etshimbi etena kakalɔka mvula ka wolo, osongo wakakɔ laadiko dia luudu ko lɔ lakahembɔ l’ahende. Maxwell mbutaka ate: “Dui sɔ kotodjɛ wekamu dia sho nsambisha ndo kanyi ya ntshika nsambisha kotoyɛ lo yimba nɛ dia taki l’anto efula wa nsambisha.” Diɛsɛ l’ekimanyielo k’angɛnyi awɔ, Maxwell nde la Emmy wakalɔngɔsɔla luudu lawɔ l’etshimbi.

Ɛmɛnyi wa Jehowa wa nshi yaso nyɛ wekɔ lo nkɛnɛmɔla yimba yaamɛ ya ndjahombia etena kahomana asekawɔ l’ekakatanu. L’ɛnyɛlɔ k’ambatshi mboka wa lo nshi y’edjedja asɔ, tamboyashikikɛ dia ntetemala nsambisha lokumu l’ɔlɔlɔ polo l’etena kayota Jehowa ɔnɛ ambokoka.