ASAWO WƆTƆNƐ L’ƆTƐ A DUI WA LO LOHOSO
Waa na wele Ɛmɛnyi wa Jehowa?
“Aya ɛnɔnyi efula weyami Mike. Nde ekɔ Ɔmɛnyi wa Jehowa ɔmɔtshi. Koko ɔtɛmwɛlɔ ande mbidjakami l’okandokando. Ele Jehowa? Lande na kele Ɛmɛnyi wa Jehowa hawosale waa fɛtɛ? Onde Mike akayashaka l’ɔtɛmwɛlɔ?”—Becky, Californie, États-Unis.
“Etena kakatatɛ asukanyi ami mbeka Bible kaamɛ la Ɛmɛnyi wa Jehowa, lakayambola nte: ‘Naa kitshimudi ya lokombo Ɛmɛnyi wa Jehowa? Ande lokombo l’oyoyo lele la ɔtɛmwɛlɔ ɔsɔ!’”—Zenon, Ontario, Canada.
“Dimi la wadɛmi takafɔnyaka dia Ɛmɛnyi wa Jehowa wakayaka dia ndjotosambisha lam’ele sho takikɔ anto wa kɔlɔ nɛ dia sho kotshɔka l’ɔtɛmwɛlɔ. Ndo takafɔnyaka ɔnɛ lam’ele ɛtɛmwɛlɔ wa weke wa watshɛso komonga la kɛnɛ kakatayangaka, yaato y’ɔtɛmwɛlɔ ya Ɛmɛnyi wa Jehowa kokoka monga la tɔ.”—Kent, Washington, États-Unis.
“Dimi kombeyaka mɛtɛ waa na wakiwɔ ndo kakɔna ketawɔwɔ.”—Cecilie, Esbjerg, Danemark.
Ondo wɛ ambowaɛnaka watasambisha lo luudu la luudu kana lo ahole wa lo sɛkɛ, watakahe ekanda walembetshiya Bible ndo weka l’anto Bible ofele. Ondo wɛ ambolongolaka periodikɛ kɛnɛ oma le ɔmɔtshi la l’atei awɔ. Koko, wɛ koka ndjambola dia mbeya waa na wele Ɛmɛnyi wa Jehowa mɛtɛ. Ondo tokanyi tayɛ mbɔtɔnɛka la tokanyi tɔmɔtshi tɔtɛkɛtshiso la diko.
Ko naka wɛ ekɔ la ambola wa ngasɔ ndo ekɔ lo ntshimba wɔɔngɔ, lende akokayɛ ntshɔ dia ntana ekadimwelo? Ngande wakokayɛ mbeya dietawɔ diele la Ɛmɛnyi wa Jehowa, oma lɛnɛ aya falanga yasalawɔ olimu awɔ ndo ahole awɔ w’ɔtɛmwɛlɔ, ndo lande na katawasambisha lo mvudu yanyu ndo lo sɛkɛ?
Cecilie lakatatɛkɛtshi diande la diko mbutaka ate: “Lakadia awui efula wendana la Ɛmɛnyi wa Jehowa l’Ɛtɛrnɛtɛ. Lakoke vate vate efula ndo lakahokamɛ asawo efula wendana la woho wawakanɛwɔ kɔlɔ. Etombelo waki la dui sɔ ko lakikɔ la kanyi ya kɔlɔ efula lo dikambo di’Ɛmɛnyi wa Jehowa.” L’ɔkɔngɔ diko, nde akayosawolaka la Ɛmɛnyi wa Jehowa vɔamɛ ndo akakondja ekadimwelo w’eshika lo ambola ande.
Onde wɛ nangaka nkondja ekadimwelo w’eshika lo ambola ayɛ wendana la Ɛmɛnyi wa Jehowa? Sho kokeketshaka dia wɛ ntshɔ lo kiɔkɔ y’oshika, mbuta ate le Ɛmɛnyi wa Jehowa vɔamɛ, wanɛ watondja periodikɛ kɛnɛ. (Tukedi 14:15) Sho nongamɛka dia asawo wayela wayokokimanyiya dia wɛ mbeya waa na weso, kɛnɛ ketawɔso ndo wɛ ayoshihodia olimu wakambaso.