ASAWO WƆTƆNƐ L’ƆTƐ A DUI WA LO LOHOSO | WƐ KOKA NSHIHODIA BIBLE
Lande na nshihodia Bible?
“Bible ekɔ dibuku dieyama efula diendana l’ɔtɛmwɛlɔ. Koko dɔ diekɔ dibuku di’oyoyo ndo diele bu ohomba le ase Chine.”—LIN, CHINE.
“Dimi haloshihodia kaanga abuku w’ekila wa l’ɔtɛmwɛlɔ ami wa Hindu. Ko ngande wakokami nshihodia Bible k’ekila?”—AMIT, INDE.
“Dimi nɛmiyaka Bible oko dibuku di’edjedja ndo lakoke wata dia wekɔ lo nsondja kɔpi efula yadiɔ. Koko dimi dimɛ talɛnaka kɔpi kadiɔ.”—YUMIKO, JAPON.
Anto efula wa l’andja w’otondo mbɔsaka Bible la nɛmɔ di’efula. Koko vɔ koka mbeya awui yema tshitshɛ, ndo mbala mɔtshi haweye ndooko dui lo kɛnɛ kendana la kɛnɛ kele lo Bible. Kɛsɔ kekɔ mɛtɛ le miliyɔ y’anto wadjasɛ l’Asie, koko dui sɔ diekɔ nto mɛtɛ lo wedja efula wele Bible kekɔ lo mɛnama woho w’anyanya.
Koko, wɛ koka ndjambola wate: ‘Lande na kahombami ndjasha dia nshihodia Bible?’ Nshihodia kɛnɛ kata dibuku di’ekila nɛ koka kokimanyiya dia nsala awui wayela anɛ:
Monga l’ɔngɛnɔngɛnɔ
Ndɔshana l’ekakatanu wa lo nkumbo
Ntondoya ekiyanu
Mpamia diɔtɔnganelo diayɛ
Nkamba la falanga lo yoho ya dimɛna
Tɔshi ɛnyɛlɔ ka Yoshiko ladjasɛ la Japon. Nde akayakiyanyaka lo kɛnɛ kendana la Bible ndo akɔshi yɛdikɔ ya kiadia lo wahɔ ande ndamɛ. Etombelo akɔna waki la dui sɔ? Nde mbutaka ate: “Bible akankimanyiya dia dimi monga la lɔsɛnɔ lele l’oyango ndo monga l’elongamelo lo nshi yayaye.” Nde kotshaka nto ate: “Handjoyaoka anyanya woho wakamayaokaka ntondo.” Amit, lakatatshi la diko akɔshi yɛdikɔ ya ndamɛ mbadia Bible. Nde mbutaka ate: “Lakaambe efula. Bible ekɔ l’alako w’eshika le oseka onto tshɛ.”
Bible kambonga la shɛngiya y’efula lo nsɛnɔ ya miliyɔ y’anto. Lande na kahayasɛdingola Bible wɛmɛ ndo menda woho wakokatɔ kokimanyiya?