Onde ɛlɔmbwɛlɔ k’oma lo Bible kekɔ ohomba ɛlɔ kɛnɛ?

ANTO AMƆTSHI MBUTAKA ƆNƐ NDOOKO. Pami kɛmɔ kele dɔkɔtɛlɛ akɛdika okambelo wa la Bible dia nyanga ɛlɔmbwɛlɔ la okambelo wa la dibuku dimɔ di’oma l’ɛnɔnyi wa 1920 dia mbetsha wetshelo wa shimi lo kalasa. Onto ɔmɔ lɔnyɔla Bible kokaka ndo ndjambola dia kana ekɔ onto ɔmɔ lakoka mbɔsa dibuku dimɔ diendana l’ɔrdinatɛrɛ w’edjedja dia nyanga ɛlɔmbwɛlɔ lo ɔrdinatɛrɛ wa nshi nyɛ. L’ɛtɛkɛta ekina, anto amɔ mbɔsaka dia Bible kambeta loowe ndo kaya bu ohomba.

Lande na kakoka onto tshɛ la l’atei aso nkamba la dibuku di’edjedja sɔ dia nyanga ɛlɔmbwɛlɔ lo andja wasɛnaso nshi nyɛ wambohama awui wa tshulatshula? Ndo nto, sitɛ y’Ɛtɛrnɛtɛ yaheyama mbadia tomaka mesajɛ lushi tshɛ dia mbisha anto alako ndo ɛlɔmbwɛlɔ keke katomba. Dikongelo dia lo televiziɔ mbishaka alako w’oma le waa nomb’ewo, wanɛ washana ɛlɔmbwɛlɔ lo lɔsɛnɔ ndo afundji. Ndo bibliɔtɛkɛ wekɔ lo nsondja lokema l’abuku dia nkimanyiya anto ndo wekɔ lo nkondja miliyara y’adɔlara.

Lo menda awui weke katomba asɔ watanema nshi nyɛ, lande na kele ekɔ ohomba nyanga ɛlɔmbwɛlɔ lo Bible dibuku diakafundama ambeta ɛnɔnyi ndekana 2 000? Onde wanɛ wɔnyɔla Bible koka monga la shadiya dia mbuta ɔnɛ nkamba la dibuku di’edjedja sɔ dia nyanga ɛlɔmbwɛlɔ ekɔ oko onto lakamba la dibuku dia shimi kana dibuku diendana l’ɔrdinatɛrɛ diambeta loowe? Lo mɛtɛ, ekanelo ka yimba ka ngasɔ kekɔ kɔlɔ. Awui wa siansɛ ndo wa tshulatshula tshikitanaka esadi esadi, ko onde ehomba w’eshika wendana l’anto tshikitanaka? Anto wekɔ lo ntetemala nanga monga l’oyango lo lɔsɛnɔ, monga l’ɔngɛnɔngɛnɔ ndo lotui tshitshi lahombama, diɔtɔnganelo dia dimɛna lo nkumbo ndo angɛnyi w’eshika.

Kaanga mbayatɔ edja, Bible kotshaka ehomba ɛsɔ ndo ekina. Tɔ mbutaka dia tɔ kakasambiyama oma le Otungi aso. Tɔ toshaka ɛlɔmbwɛlɔ l’awui tshɛ wa lo lɔsɛnɔ ndo tokimanyiyaka dia ndɔshana l’ekakatanu tshɛ wahomana la so lo lɔsɛnɔ. (2 Timɔte 3:16, 17) Kɛnɛ koleki tshɛ ele, tɔ kekɔ l’alako watshikala pondjo ndo alako wa lɔkɔ hawetaka loowe pondjo! Bible tɔamɛ mbutaka ɔnɛ: “Ɔtɛkɛta wa Nzambi wekɔ la lɔsɛnɔ.”​—Hɛbɛru 4:12.

Onde kɛnɛ kata Bible kekɔ mɛtɛ? Onde tɔ kambeta loowe ko kana tɔ mɛtɛ kekɔ dibuku dioleki ohomba diele l’alako w’eshika wele ohomba le so ɛlɔ kɛnɛ? Oyango wa numɛlɔ kɛnɛ ka Tshoto y’Etangelo, mbuta ate numɛlɔ kɛnɛ ka ntondo ka lo numɛlɔ ya laande, ele wa kokimanyiya dia wɛ ntana ekadimwelo lo ambola asɔ.