Tɔlɔngɔsɔlɛ ambeki wa Bible dia olimu
1 Oweso wa ndjihelo wa wekelo wa Bible ele dia tondja ambeki w’eyoyo, wanɛ wayosangana laso dia mbetsha akina. (Mat. 28:19, 20) Oyango wa wekelo kema paka dia mbisha ewo; vɔ pombaka sokoya anto weka laso dia kamba olimu la mbetawɔ l’etema awɔ ndo mbalɔngɔsɔla dia vɔ mbewoya elongamelo kawɔ le akina. (2 Kor. 4:13) Lo weoho akɔna w’eshika wakokaso mbakimanyiya dia vɔ ndjakotsha dia tolakanya akina na?—2 Tim. 2:2.
2 Olimu ayale oweso le nyu: Omako tatelo lembetshiya hwe dia ɔtɛmwɛlɔ a mɛtɛ nemanɛka la “wotelo wa lo sɛkɛ dikambo dia eko, NW.” (Rom. 10:10.) Lokombo laso lɔamɛ, Ɛmɛnyi wa Jehowa, mbokɛmaka dia sho pombaka mbutɛ anto. Nyokimanyiya ambeki dia vɔ mboka ɔnɛ wetshelo w’ɔsawɔ kema paka dia dikambo di’eko kawɔ keto. Etena kayowokoma vɔamɛmɛ embetsha, wanɛ w’alonga kokaka mbika ndo vɔ lawɔ.—1 Tim. 4:16.
3 Nyovusole kɛnɛ kak’ekama: Woho ɔmɔtshi wa wetshelo w’oshika mendanaka l’ovuswelo wa tena la tena wa kɛnɛ kak’ekama. Evuswelo ɛsɔ kimanyiyaka ombeki dia nde pama lo nyuma etena katashikikala mɛtɛ kakand’eke lo yimba yande ndo l’otema ande. Sho diɛnaka shoamɛmɛ etena kakadimolaso lo wembola w’ovuswelo watanema lo wekelo wa La Tour de Garde. Nyɔlɔngɔsɔlɛ wembola waha okakatanu ndo wa tshena pe wayokadimola ombeki l’ɛtɛkɛta ande ndamɛmɛ.
4 Ovuswelo ayɛ mbeyaka salema oko nyekɔ lo sambisha. Mbola dimbola kana kanyiya dikambo dimɔtshi diasalema tena la tena l’esambishelo. Lo ndjâla oko ɔtɛkɛtshi, sala woho w’ombeki shikikɛ kɛnɛ katande. Andolande lo kɛnɛ k’ɔlɔlɔ kosadinde ndo shande alako wakoka wayowokimanyiya dia nde nyomoleka sala dimɛna mbala kekina. Olowanyelo ɔsɔ ayowɛnya woho wa kamba olimu la kɛnɛ k’ekande ndo ayohamia dikoka diande dia kamba olimu la Bible.
5 Dibuku Comment raisonner: Kodje yimba dia ombeki wakiyɛ ndjâla la dibuku dimɔtshi dia Comment raisonner, ndo etshande woho wa nde kamba ladiɔ olimu. Ɛnyande dia oma lo ekimanyielo ka dibuku diakɔ sho kondjaka alako lo woho wa tatɛ asawo, wa kadimola lo wembola w’endana la Bible ndo wa nɛmbia tamu. Kamba olimu la dibuku diakɔ dia mɛnya woho wa tɛkɛta l’onto okina dia shidiya tamu. Dibuku diakɔ mbeyaka mbokeketsha ndo mbotshutshuya dia nde mbɔsa tɛdikɔ ta mbewoya lokumu la Diolelo.
6 Tɛɛtɛ dikambo di’ohomba wa sanganya: Sanganya ya l’etshumanelo, ndjekoleko losanganya l’olimu la Kalasa k’olimu wa teokrasi, yakasalema dikambo dia tɔlɔngɔsɔla dia olimu wa sambisha. Tokanyi tshɛ ta weke takimanyiya dia mbisha wetshelo w’eshika vuswamaka ndo kambemaka olimu lo bɛnyɛlɔ diasalema oma le apandjudi wambekesanɛ efula l’olimu ndo wakoka. Tɛɛtɛ dikambo di’ohomba wa sanganya ndo sala kɛnɛ kakokayɛ dia kimanyiya ombeki ayɛ dia nde mbɔtɔ lo sanganya yakɔ. Wɔtwɛlɔ wa tena la tena lo sanganya ayowosha ohetoheto wele lande ohomba dia ndjâla ombeki wa Yeso w’oshika.
7 Tɔ̂nyɔlake ohomba wele l’ɛnyɛlɔ kakiyɛ. Osasɔki ayɛ ndo etete kayɛ l’esambishelo mɛnyaka dia wɛ mandolaka mɛtɛ kakayeke. Otshelo ɔsɔ keketshaka onto l’eka layɛ dia nde nyomoleka mɛnya mbetawɔ kande. (Luka 6:40) Kɛsɔ tshɛ mbeyaka kumiya onto l’eke oyoyo dia nde mɛna olimu akɔ oko diɛsɛ ndo dia nde ngɛnangɛna dia mbôkamba.—1 Tim. 1:12.