Onde Onto Ɔmɔtshi Ekɔ l’Ohomba w’Ekimanyielo?
1 Wakatɛnya Jehowa oko Onto laya dia ndjotokimanyiya, Eshamelo. Mɛtɛ, sho mbeyaka ɔnɛ sho kokaka mbêta dia ndjotokimanyiya ko nde ayoya dia ndjotoshimbɛ. (Esam. 18:2; 46:1) Tayokoyaka lɔkɛwɔ la Jehowa loludi la kɛtshi lo sukɛka wanɛ wele l’ohomba w’ekimanyielo.
2 Ɛngɔ kakɔna kahomba totshutshuya lo dikambo sɔ na? Anto efula kanaka ɔnɛ kimanyiya onto ekɔ woho ɔmɔtshi wa mɛnya ngandji la kɛtshi. Bible mɛnyaka hwe ɔnɛ sho pombaka mbetawɔ lokanyi lɔsɔ. (Romo 15:1) Ɔpɔstɔlɔ Paulo tokeketshaka dia sho ‘mendaka aha paka akambo aso ato, koko ndo akambo w’anto akina.’—Fil. 2:4.
3 Onto tshɛ kokaka kondja ɔngɛnɔngɛnɔ watomba oma lo salaka ɔsɔku. (Etsha 20:35) Ɔlɔngɔlɔngɔ Timɔtɛ aki ɛnyɛlɔ ka dimɛna efula lo asho w’Ɔpɔstɔlɔ Paulo, lo kɛnɛ k’endana la ‘kanɛ’ anango mɛtɛ. (Fil. 2:20) Ande ɔlɔ dia mɛna ɛlɔngɔlɔngɔ efula ɛlɔ kɛnɛ wɛnya woho akɔ wâmɛ wa yimba l’atei w’etshumanelo lee! Koko, oyadi tekɔ ɔlɔngɔlɔngɔ kana kema, sho tshɛ kokaka sala ɛngɔ kɛmɔtshi etena kɛnaso ɔnɛ onto ɔmɔtshi ekɔ l’ohomba w’ekimanyielo.
4 Onde sho tambokanyiyaka lushi lɔmɔtshi ɔnɛ tayokoka nyomoleka sala dia kimanyiya ase etshumanelo? Onde ɔnangɛso kana kadiyɛso kele lo lopitadi haleke mɛna anto waya dia ndjowenda? Onde osekaso ɔmɔtshi lahayokoka mbeteta hakondja ndoko onto lawetetɛ kana lôkimanyiya la ntumu ya lo luudu? Lo asho wa Yeso, ekambi wa Jehowa wekɔ lo tonga nkumbo kɛmɔtshi kele l’anto wakimanyiyana l’asawɔ. (Mako 3:33-35) Nde akate lo wɛla ande w’ɛkɔkɔ la mbudi ɔnɛ wanɛ wokitshami lo lonya l’omi la Nkumekanga, mbuta ate wambetawɔma le nde, wekɔ lo dihole sɔ nɛ dia vɔ wakakimanyiyaka anango.—Mat. 25:40.
5 Woho wa Mbisha Ekimanyielo Kaso: Kayotosala etena kɛnaso hwe ɔnɛ onto ekɔ l’ohomba w’ekimanyielo na? Lande na ahatɔshi yɛdikɔ dia sala ɛngɔ kɛmɔtshi kayowokimanyiya na? Ondo anangɛso l’akadiyɛso waya esombe wekɔ l’ohomba w’ekeketshelo, koko vɔ bu ndoko l’onto lasuke lawɔ lakoka mbasukɛ, ko kana Okristo weke ɔlɔngɔlɔngɔ mbahombaso kimanyiya. Atshukani amɔtshi weke ka ndjasha lo mɛtɛ mbeyaka ndja lo Mbalasa ka Diolelo l’anawɔ etena kele opandjudi weka la nkumbo kakɔ bu lâwɔ. Atshukani asɔ wayɔngɛnangɛna mɛtɛ naka onto ɔmɔtshi ayowakimanyiya lo kokɛ anawɔ.
6 Lo yɛdikɔ yatahame ngandji kaso lo akambo a mɛtɛ ndo lo ɔlɔngɔswamelo waki Jehowa, mbatataleke mboka ase etshumanelo akina ngandji ndo sho mbakanɛka. Ɔpɔstɔlɔ Paulo tokeketshaka dia sho dihola etema aso lo dikambo sɔ. (2 Kor. 6:11-13) Yeso akake epole ɔsɛkɛ lo dikambo di’ɔnɛ ntondotondo ele lam’okanaso ngandji l’asaso mbayotɛnya ɔnɛ tekɔ ambeki ande w’eshika.—Joa. 13:35.
7 Ɔnkɔnɛ etena kɛnaso ɔnɛ onto ɔmɔtshi ekɔ l’ohomba w’ekimanyielo, ngandji k’oma ka tshina di’otema kele laso otsha le anangɛso ndo le etshumanelo lo tshɛ ayototshutshuya dia sho mbɔsa tɛdikɔ ntondo ndo mbisha ekimanyielo kaso lo woho ɔmɔtshi kana okina. (Ngal. 6:9, 10) Lam’adjanaso yimba ɔsɔku l’asaso, mbashinganyaso amama aso wa ngandji ndo mbakeketshaso kâmɛ kaso. (1 Kor. 10:24) Mɛtɛ tayosha lonya lo kɛnɛ k’endana la kimanyiya anto tshɛ wele l’etshumanelo.