Toyele Ɛnyɛlɔ Kaso lo Ndjalaka Amɛmbi w’Osase
1 Yeso akate lo dikambo diande ndamɛ ate: “Dimi lekɔ osase w’andja.” Lo ndjela lokolo lande, ambeki ande waki ndo vɔ la wɔ “osase w’andja.” (Mat. 5:14, NW) Oko akinde “osase w’andja,” Yeso akakoke mbuta ɔnɛ anto tshɛ wawoyela wayoyala l’“osase wa lɔsɛnɔ.” (Joa. 8:12, NW) Dikambo sɔ tetɛka amɛmbi w’osase wa lo nyuma, ndo hatohombe tshikɛ ndoko ɛngɔ diaaso dia tɔ mbisha kana nima osase ɔsɔ.
2 Ɔlɔngɔswamelo wa Jehowa tolowanyaka dia sho ndjâla amɛmbi w’osase w’eshika. Naka sho ndjela alako ndo ɛlɔmbwɛlɔ wakondjaso lo nna ndo lo nna, kete tayokoka ngamula anto wa weoho tshɛ mɛtɛ kendana la Diolelo. (1 Tim. 4:6) Ndjâla la dionga di’ɔmɛmbi w’osase halembetshiya tsho ɔnɛ tɛkɛta dia mɛtɛ etena tshɛ kakondjama diaaso, koko ndo nama dia ndjalaka nshi tshɛ la lɔkɛwɔ lasungana l’Akristo. Ɔsɔku mbakasalaka ɛnyɛlɔ kaso. Sho wanɛ wele ambeki ande, sho nangaka mɛnya lo lɔsɛnɔ laso la nshi tshɛ ɔnɛ le so, Lokristo ekɔ eongelo ka lɔsɛnɔ. (Ef. 5:9; Tito 2:7, 8, 10) Sho pombaka sala akambo w’ɛlɔlɔ lo sɛkɛ dia anto akina tshutshuyama dia tombola Nzambi.—Mat. 5:16.
3 Wakalɔmbɛ Ɔmɛnyi ɔmɔtshi wakatasambishaka lo soko la soko dikambo dimɔtshi diahatasalemaka. Kanga ngelo nde la wadiɛnde waki la hemɔ, koko wakahombe totshika falanga lo eombelo. Vɔ wakalɔmbɛ Ɔmɛnyi dia kana nde kokaka tatshikɛyɔ. Nde aketawɔ ko vɔ wakawosha ndekana 2000 $ US l’anya. Lam’akandakalola, nde akambola wadi l’omi ate: “Lande na kakanyetawe mbishami falanga dimi onto lahanyeye na?” Vɔ wakokadimola vate: “Sho mbeyaka ndo anto tshɛ dieyaka, ɔnɛ paka Ɛmɛnyi wa Jehowa ato mbakokaso diholɛ etema.” Ande ɔlɔ wahombaso mboka dia mɛna ɔnɛ woho wayashaso l’alako wendana la dionga di’ɔlɔlɔ wele lo Bible tokondjiyɛka lokumu la ngasɔ lo lotombo la Nzambi lee!
4 Ombetsha ɔmɔtshi wa omoto akalembetshiya ambeki ande lande na aki yana ya yimato mɔtshi y’ɛnɔnyi esamalo yaki Ɔmɛnyi wa Jehowa kosalaka asango wa halloween [difɛstɔ di’Asanto tshɛ]. Nde akate ɔnɛ nde akangɛnangɛnaka ombeki ande efula, nɛ dia nde komboka wɔma wa ndjatshikitanya la wɔ l’ɔkɔkɔ wa kɛnɛ kakandetawɔka. Nde akakotsha ɔnɛ, lam’etawɔ onto ɛngɔ kɛmɔtshi l’etete tshɛ, nde pombaka ndjâla la dihonga dia mamɛ kanyi yande. Ko dikɔlɔ diakɔ, ombetsha akasɛdingola kɛnɛ ketawɔnde ko nde akɛnyi dia nde kondjala la dihonga dia ngasɔ. La wedi a pindju, nde akate ɔnɛ, oma k’ɛlɔ, nde hasɛngɔlaki ambeki ande nto dia vɔ sala difɛstɔ dimɔtshi; la tshina diande di’otema, nde akatone ndo afɛstɔ amɔtshi wa l’atei awɔ!
5 Ekambi wa Jehowa keketshamaka l’ahole tshɛ dia vɔ ngamula osase awɔ. Lɔkɛwɔ l’ɔlɔlɔ l’ɛlɔngɔlɔngɔ la kalasa mambiaka asekawɔ wɔtɔ la wɔ ndo embetsha awɔ heyama. Ɛmɛnyi waya epalanga wele la dihonga di’ɔlɔlɔ efula komiaka asukanyi awɔ lo vɔ mandola losango la Diolelo. Esambishelo ka tshakitudi kakokaso sala lo waaso efula, kotolaka anto w’etema ɛlɔlɔ wakombola mbeya awui efula lo kɛnɛ kendana la Nzambi. Shambu ya ndjâla l’etete ndo la losembwe l’olimu aso ekɔ woho okina w’esambishelo. Aha la tamu, oyadi lo dihole diakɔna dieso ndo oyadi kakɔna kasalaso, sho kokaka kotola yambalo y’anto oya lo mɛtɛ.
6 Lo mbahɛka asho l’ɛnyɛlɔ kaso ka kokele, tayotetemala la ndjalowanya, sho wanɛ wele ambeki ande. Naka sho ndjela lokolo lande, kete tayonga l’eshikikelo k’ɔnɛ osase aso wayongamwɛka anyaso.—Mat. 5:15; 1 Pet. 2:21.