Totokome Wekamu wa Mbeya Mbala la Funda

¹ L’ɔnɔnyi w’olimu w’etshi, suke l’anangɛso ndo akadiyɛso 972 wakêke woho wa mbala la funda lo mbilo k’otondo kalɔmbwama oma le Mbalasa kaso. Etombelo ɛsɔ, kânga mbashawɔ ɔngɛnɔngɛnɔ, hawokoke totshutshuya dia mɛna ɔnɛ ambokoka. Mɛtɛ, heye mbala la funda tôngaka nshi tshɛ wekamu le okambi wa Jehowa tshɛ.

² Ahombaso sala dia ntokomɛ wekamu ɔsɔ ndo nyomoleka kimanyiya apandjudi dia vɔ mbeya mbala ndo funda na? Ntondotondo, sho pombaka mbeya ɔnɛ: Jehowa mbatolangaka nshi tshɛ dia ekambi ande wakondja wâhɔ oma lo walelo. Ɔsɔ kele dikambo diakakomela akanga wa kɔlamelo tshɛ oko: Abarahama, Isaka, Jakɔbɔ, Yɔsɛfu, Mɔsɛ, wodja w’otondo w’Isariyɛlɛ ndo Akristo wa ntondo. (Enda lo Auxiliaire, lɛkɛ 899, l’ɔtɛ a dui “Lecture”.) Ndo nto, mako kakianɛ polo ndo l’andja w’oyoyo, sho pombaka momba ndo dianganya diewo.

³ Dia ndɔshana wolo l’ohomba wa mbeya mbala ndo funda, etshumanelo k’otondo, ndo olui wa dikumanyi lo woho wa lânde, pombaka mbetsha kalasa ya walelo l’ofundelo la ntondo. Emendji w’eteta wakakondja alako lo dikambo sɔ. Sho nangaka kamba kâmɛ lawɔ dia sho ntokomɛ tshɛ kâmɛ wekamu wa walelo l’ofundelo. Tɔ̂shi tɛdikɔ tshɛ tele ohomba dia mbeka mbala la funda. Têkɔ l’ekanda wakalɔngɔsɔla “ɔhɔmbɔ wa kɔlamelo ndo wa kɛsɔ.” Lo tshumanelo dimɔtshi, vɔ mbɔsaka etena ka Kalasa k’Olimu wa Teokrasi dia nɔmbɔla kalasa ka walelo l’ofundelo. L’ɔkɔngɔ wa sawo No. 1 l’atshina w’akambo w’oma lo Bible ndo lam’atatshu ambeki akina otsha lo wa kalasa yotshikitanyi, anto wa lo kalasa ka walelo l’ofundelo tshumanaka lale ombetsha awɔ dia mbeka mbala la funda. Lo ndjela alako wa kalasa k’Olimu wa Teokrasi, paka wanɛ weya mbala ato mbokokiwɔ mbisha sawo dia sala lo Kalasa k’Olimu wa Teokrasi. Yɛdikɔ shɔ keketshaka wanɛ waheye mbala la funda dia vɔ mbidja weolo dia ndjafundja kombo lo kalasa l’ɔkɔngɔ wa vɔ kotsha lo kalasa ka walelo l’ofundelo.

⁴ Mbeya funda la mbala ekɔ ɔlɔlɔ efula aha paka dia kamba olimu aso dimɛna koko ndo dia lɔsɛnɔ layɛ la lushi la lushi. Sho tambotshungɔ oma lo fumbe k’ohotohoto ndo ɔsɔku sho kokaka ndjalesha shɔamɛ aha paka kongɛka nshi tshɛ oma le anto akina. Sho kokaka mbahɛ asho l’ekimanyielo k’oma le onto l’onto ndo l’ekimanyielo ka spirito ka Jehowa dia ntokomɛ wekamu wa mbeya mbala la funda. Naka tayosala ɔsɔku, kete ohamelo aso wayɛnama, lo dikambo dia panda kakiso ndo dia panda ka wanɛ watɔlɛso losango la Nzambi.​—⁠1 Timote 4:​13-16.