Tɔkɛndɛkɛndɛ Lo Woho Wosunganyi La Lokumu L’ɔlɔlɔ

¹ Oko weso Ɛmɛnyi wa Jehowa, sho nangaka tombola lokombo la Jehowa. Sho mbeyaka shate lɔkɛwɔ laso, ɛtɛkɛta aso, ɔlɔtɔ aso ndo ekombɔ kaso k’ɔtɛ kokaka monga la shɛngiya lo woho wɔsa anto akina ɔtɛmwɛlɔ a mɛtɛ. Dikambo sɔ mɛnamaka djekoleko lo nsanganya yaso. Sho pombaka ndjashikikɛ ɔnɛ kɛnɛ tshɛ katama ndo kasalema lɛkɔ sunganaka la lokumu l’ɔlɔlɔ ndo tombolaka Jehowa.​—⁠Fil. 2:⁠4.

² Tosambu efula talangawɔ l’andja ɔnɛ l’akambo w’ɔlɔtɔ ndo wa ekombɔ k’ɔtɛ hetawɔma le Akristo. Ekambi wa lokumu l’ɔlɔlɔ pombaka ndjalama ɔlɔlɔ lo dikambo sɔ. Sho kokaka mbala lo Tshoto y’Etangelo ya Mam’ɛkɔngɔ la Tange 1, 1989 (lo Falase), lɛkɛ 20 ɔnɛ: “Naka kema ohomba ndɔta ahɔndɔ w’oshinga wolo, ahɔndɔ aso pombaka ndjâla pudipudi, dimɛna ndo aha okakatanu. Sabata yaso pombaka ndjâla ɛlɔlɔ ndo amɛna lo asho. Woho akɔ wâmɛ, sho pombaka ndjâla pudipudi ndo ndɔta ahɔndɔ wakoka ndo w’ɛlɔlɔ lo losanganya tshɛ, mbidja ndo lo wekelo wa dibuku.”

³ Okomelo wa la wonya ekɔ djembetelo ya dilɛmiɛlɔ ndo ya yambalo yoye oma lo ngandji. Tena dimɔtshi akambo wahatakanyiyisha mbeyaka tokonya l’ɔkɔngɔ lo losanganya. Koko okomelo wa l’ɔkɔngɔ wa tena tshɛ mbeyaka mɛnya ɔnɛ hatɔshi nsanganya oko ekongelo k’ekila ndo ɔnɛ sho mɔnyɔlaka ɔkɛndɛ wele laso w’aha futanya anto akina. Tena efula, wanɛ wakoma l’ɔkɔngɔ mbekolaka timba t’ampokami akina ndo mbashimbaka dia vɔ kondja ɛlɔlɔ tshɛ watomba oma lo losanganya. Okomelo aso wa la wonya mɛnyaka woho walɛnyaso tokanyi ndo nsaki y’anto tshɛ wele lawɔ.

⁴ Ngandji ka onyaso pombaka tosokoya dia sho mbidja yimba di’aha ndjâla kiɔkɔ y’ekola anto yimba lo nsanganya. Tɛkɛta tɔhɔtɛhɔtɛ, ndɛ, tɔma bazɔka, shisha akatshi wa mikanda ndo tombatomba tshanana otsha lo komba kokaka shimba anto akina dia vɔ mbidja yimba tshɛ lo losanganya ndo nanyaka nɛmɔ diele lo dihole di’ɔtɛmwɛlɔ wa Jehowa. Hasungana di’onto sala elimu w’endana la etshumanelo kana sawola l’anto akina onyake naka nde ekɔ la dikambo dimɔtshi di’esadi esadi diahomba anangɛso mumɔ oma l’ahole awɔ. Naka aha ɔsɔku, kete anto tshɛ pombaka mbidjasɛ ndo nonga di’ɔlɔlɔ awɔ ndo wa nkumbo kawɔ. Akambo wa lɔsɛndji kema la dihole lo Mbalasa ka Diolelo nɛ dia “ngandji  . . . hatshi akambu wa fumbosonyi.”​—⁠1 Kor. 13:​4, 5; Ngal. 6:⁠10.

⁵ Lokombo la Jehowa mandɔmaka ndo tombɔmaka nto oma lo lɔkɛwɔ l’ɔlɔlɔ l’anaso lo nsanganya. Ekɔ ohomba dia ambutshi mbâdjaka asho. Pombaka keketsha ana dia vɔ nonga ndo mbisha kɔmatɛrɛ. Ambutshi efula sɔnaka dihole diokokiwɔ tombaka esadi dia tokokɛ anawɔ wa totshitshɛ aha la futanya anto akina tshanana.

⁶ Paulo akasha dako nɛ ate: “Nyɔkɛndɛkɛndɛ lo woho wasungana la lokumu l’ɔlɔlɔ.” (Fil. 1:​27, NW) Omalɔkɔ, tosale tshɛ dia monga la loshilambo ndo nɛmiyaka anto akina lam’ɔtɔso lo nsanganya. Naka anto tshɛ wayokamba kâmɛ, kete ‘wayokeketshanya, onto l’onto oma lo mbetawɔ ka onyande.’​—⁠Romo 1:⁠12.