Elui Wambokotshama
1 Oko aki l’eleko ka ntondo, ohamelo wa mamba wekɔ lo salema ɛlɔ kɛnɛ l’etshumanelo k’Akristo. (Etsha 2:41; 4:4) Ɔnɔnyi wetshi, ambeki w’eyoyo 366579 wakabatizama, yɛdikɔ y’anto ndekana 1000 lo lushi! Anto ndekana miliyɔ wakabatizama l’ɛnɔnyi esato wetshi ɛnɛ. Mɛtɛ, Jehowa ekɔ lo tetemala la kotsha elui w’ambetawudi.—Etsha 5:14.
2 Anto w’efula asɔ weke eyoyo, wanɛ wahateye akambo efula wa lo lɔsɛnɔ l’Okristo, wekɔ l’ohomba w’ekimanyielo ndo w’olowanyelo oma le wanɛ wele nge lo mbetawɔ. (Romo 15:1) L’atei w’Akristo wa ntondo, amɔtshi kokoka dia ‘tetemala ko koma etshundju w’anto,’ kânga l’ɔkɔngɔ wa vɔ batizama ɛnɔnyi efula. (Heb. 5:12; 6:1) Diɔ diakɔ diakake Paulo epole ɔsɛkɛ l’akambo wahomba Akristo pama lo nyuma lo mukanda ande wakandafundɛ Ase Hɛbɛru. Naa akambo akɔ, ndo ekimanyielo kakɔna kokoki mbishama?
3 Onga la Mbekelo y’Ɔlɔlɔ ya Wekelo: Lo ndjela wetshelo waki Paulo, di’onto monga ombeki w’ɔlɔlɔ nde pombaka mbeka l’etete, mboholaka awui wekande, ndo kamba la “mbu ya nde ya wulu” yatosha ɔlɔngɔswamelo waki Jehowa. (Heb. 5:13, 14; enda lo Tshoto y’Etangelo ya lo Falase ya Loseketanya 15, 1993, lɛkɛ 12-17.) Lo sawolaka l’eyoyo asawo wa lo nyuma ndo lo kahanaka la wɔ mbɔkɔ y’akɛsɔ y’akambo wa mɛtɛ yakatashola lam’akatekaka shamɛ, tayowasha mɛtɛ saki ka vɔ monga la mbekelo y’ɔlɔlɔ ya wekelo. Ondo sho kokaka mbelɛ onto leke oyoyo tena la tena dia ndjosala la so wekelo aso w’onto ndamɛ kana wa lo nkumbo.
4 Ɔtɔka lo Nsanganya Tena la Tena: Ɛnyɛlɔ kaso ka kɔlamelo ndo ɛtɛkɛta aso w’ekeketshelo wotami la ngandji ayokimanyiya ase etshumanelo weke eyoyo dia vɔ mbewɔ dikambo dikina diakate Paulo diendana la—“mbekelo” kele l’amɔtshi ka mbetshaka nsanganya y’Akristo. (Heb. 10:24, 25) Tâkimanyiya dia vɔ mbeya ɔnɛ nsanganya mbawasha diaaso dia vɔ sawolaka l’etshumanelo lo nyuma. Tɔsɛ yɛdikɔ dia sala tshɛ dia vɔ ndjaoka ɔnɛ wambolongɔma l’atei w’anangɛwɔ.
5 Tɛ Jehowa Awui Ayɛ la Wɛkamu Tshɛ: Dia nɛmbia wɛɔdu wa demba ndo dikɔmɔ dia lonto laso, sho pombaka nyanga ekimanyielo ka Jehowa lo dɔmbɛlɔ, lo mbotɛ tokanyi taso t’oma ka tshina di’otema ndo ekiyanu wele laso l’atei otema. Eyoyo pombaka mbeya ɔnɛ lam’asɛngasɛngawɔ Jehowa dia nde mbâkimanyiya, oko atotɛ Paulo dia sho sala, vɔ la dia tetemala aha mpekɔ. (Heb. 4:15, 16; 10:22) Lo kɔndɔlaka kɛnɛ kakatɛnyi shamɛ lo dikambo sɔ, tayokeketsha mbetawɔ kele lawɔ k’ɔnɛ Jehowa mbokaka alɔmbɛlɔ w’oma ka tshina di’otema.
6 Omba Etena ka Sambisha: Paulo akɛnya nto ɔnɛ lo ‘kimɔka olambo wa lotombo le Nzambi nshi tshɛ’ sho keketshanaka lo nyuma. (Heb. 13:15) Onde sho kokaka sɛngɔla opandjudi ɔmɔtshi weke oyoyo dia nde mbɔtɔ l’ekongelo kaso k’esambishelo ka lomingu la lomingu? Ondo sho kokaka ndjalɔngɔsɔla kâmɛ la nde dia sambisha kana sɛdingola yoho mɔtshi y’esambishelo yende atasalaka.
7 Elui wambokotshama toshaka ɔngɛnɔngɛnɔ wa woke. Naka tayoyasha lo ndowanya ndo lo keketsha ase etshumanelo weke eyoyo, kete tayowakimanyiya dia vɔ monga la mbetawɔ ka nge kahombama dia vɔ ‘nshimbɛ anima awɔ.’—Heb. 3:12, 13; 10:39.