Tɔlɔmbɔlɛ Ambeki Otsha L’ɔlɔngɔswamelo Waki Jehowa
1 “Ekɔ losango lasambishama l’ɛtɛkɛta ndekana 200. Ekɔ losango lokɛma lo wedja ndekana 210. Ekɔ losango lewoyama le anto tshɛ, oyadi lo dihole diakɔna diewɔ. Ɔsɔ ekɔ esambishelo koleki woke kahatasalemaka l’andja, ka losango lasanganya miliyɔ y’anto kâmɛ. Aya ɛnɔnyi ndekana lokama wele Ɛmɛnyi wa Jehowa lo kamba olimu ɔsɔ!”
2 La ɛtɛkɛta ɛsɔ mbome ɔkɔndɔ wele lo kasɛtɛ video ka Les Témoins de Jéhovah — Un nom, une organisation. Kasɛtɛ kakɔ kadimolaka lo wembola ɛnɛ: Ɛmɛnyi wa Jehowa ewɔ mɛtɛ na? Ngande wokongewɔ olimu awɔ? ngande walɔmbwama olimu akɔ? ngande wakondjawɔ falanga dia mbokamba? Kasɛtɛ kakɔ mɛnyaka wanɛ wakienda hwe ɔnɛ “Ɛmɛnyi wa Jehowa wa l’andja w’otondo wakayalɔngɔsɔla ndo wakalowanyema dia kimanyiya anyawɔ anto dia vɔ keketsha mbetawɔ kawɔ lo Bible” ndo tɔ mbâkeketshaka dia vɔ mbɔsa ɔlɔngɔswamelo w’Ɛmɛnyi wa Jehowa la nɛmɔ. L’ɔkɔngɔ wa nde menda kasɛtɛ kɛsɔ, ombeki ɔmɔtshi wa omoto akalele l’ɔlɔ ndo la lowando, ndo akate ate: “Ngande wahakoke onto shihodia ɔnɛ ekɔ ɔlɔngɔswamelo waki Jehowa, Nzambi ka mɛtɛ na?”—Enda lo 1 Koreto 14:24, 25.
3 Omoto okina akekaka Bible mbeka ko tshika mbeka ko tshika, koko nde kombetawɔ ɔnɛ Losato l’Osanto ekɔ wetshelo wa kashi. L’ɔkɔngɔ wakawɛnya kasɛtɛ kakɔ nde l’omɛnde. Filmɛ kakɔ kakawambia efula ko vɔ wakakiende la dikɔlɔ diakɔ diamɛ mbala hiende. Lo wekelo wakayele, omoto akɔ akɛnya saki kande ka koma Ɔmɛnyi. Nde akate ɔnɛ, polo ndo l’etena kɛsɔ, yimba yande yaki paka lo dietawɔ diande dia Losato l’Osanto ndo ɔnɛ nde akohɛka menda ɔlɔngɔswamelo aso la wanɛ wawokenga. Kasɛtɛ kakɔ akokimanyiya dia nde shihodia ɔnɛ nde amboshola ɔlɔngɔswamelo waki Nzambi. Nde akalange tatɛ sambisha lo luudu la luudu aha tshimbatshimba. Wakôlembetshiya wanya wahombande takula dia nde koma opandjudi wahatabatizama, ko nde akate ate: “Ɛsɔ takule wanya akɔ.” Nde akamɔ oma l’ɔtɛmwɛlɔ ande, akamɛ la sambisha ndo akakome kanga yewo ya mamba lo konyanya ewo lo wetshelo wa Losato l’Osanto.
4 Anto efula mbeyaka ɔnɛ ambeki wa Bible pamaka efula lo nyuma ndo mbolaka esadi eto dia koma etshundju w’anto etena keyawɔ nganɛ wele ɔlɔngɔswamelo waki Jehowa ndo kɔtɔwɔ lɔkɔ. Djembetelo mɔtshi yɔ nyɛ, l’ɔkɔngɔ w’ambeki 3000 batizama lo Pɛntɛkɔsta, “vo wakakolamela lu wetshelu w’atumami, ndu lu ekesanelu kawo.” (Etsha 2:42) Ekɔ ohomba efula dia sho kimanyiya ambeki dia vɔ sala woho akɔ ɛlɔ kɛnɛ. Ngande?
5 Tokotsha Ɔkɛndɛ Aso: Wanɛ tshɛ wetɛ anto ambeki pombaka mbeya ɔnɛ vɔ wekɔ l’ɔkɛndɛ wa nɔmbɔla ambeki wa Bible otsha l’ɔlɔngɔswamelo waki Nzambi. (1 Tim. 4:16) Wekelo tshɛ pombaka monga nna dimɔtshi di’otsha lo lushi l’ɔngɛnɔngɛnɔ layɛnya ombeki w’oyoyo djembetelo ya ndjakimɔ kande ka la tshondo le Jehowa ndo lo batizama l’ashi. Dimbola dimɔtshi diayowowombola lo wonya wasalema sɛlɛmɔnyi ka batismu diɔ nɛ: “Onde wɛ amboshihodia ɔnɛ ndjakimɔ kayɛ le Nzambi ndo batismu ambokokonya Ɔmɛnyi wa Jehowa wambɔtɔ l’atei w’ɔlɔngɔswamelo walɔmbwama la nyuma k’ekila?” Diɔ diakɔ diahombande shihodia ɔnɛ nde hakoke kambɛ Nzambi naka nde hɔtwɛ l’etshumanelo k’Akristo ka mɛtɛ.—Mat. 24:45-47; Joa. 6:68; 2 Kor. 5:20.
6 Totetemale la mbutɛ ombeki awui w’etshumanelo kaso ndo dia ɔlɔngɔswamelo w’Ɛmɛnyi wa Jehowa wa l’andja w’otondo. Tosalake ɔsɔku lomingu tshɛ, ndo tome oma ko wekelo wa ntondo. Oma k’etatelo, têle ombeki oya lo nsanganya ndo totetemale la mbelɛka.—Eny. 22:17.
7 Tokambe la Dihomɔ Diatoshawɔ: Ekanda woleki amɛna wele laso wa mbeka l’anto Bible lawakawɔ ele biukubuku Kakɔna Katɔlɔmba Nzambi? la dibuku Ewo Katɔla Otsha lo Lɔsɛnɔ la Pondjo. Ekanda ehende ɛsɔ mbikaka epole ɔsɛkɛ l’ohomba wa mbɔtɔ l’etshumanelo. L’ekomelo ka wekelo 5 wa biukubuku Katɔlɔmba, wakafunde ɔnɛ: “Tetemala mbeka awui wa Jehowa ndo kitanyiya adjango ande. Wɔ̂twɛlɔ wa lo nsanganya lo Mbalasa ka Diolelo k’Ɛmɛnyi wa Jehowa kele suke suke la ngelo kanyu ayokokimanyiya dia wɛ sala dikambo sɔ.” Dibuku Ewo keketshaka ombeki tena la tena dia nde mbɔtɔ lo nsanganya. Lo tshapita 5, od. 22, diɔ mbutaka ɔnɛ: “Ɛmɛnyi wa Jehowa . . . kokeketshaka la ngandji tshɛ dia wɛ sangana la wɔ dia tɛmɔla Nzambi ‘lo nyuma la lo mɛtɛ.’ ” (Joa. 4:24) Lo tshapita 12, od. 16 vɔ funda ɔnɛ: “Lam’ayoyotetemalaka la wekelo ɔnɛ ndo monga la mbekelo ka mbɔtɔka lo nsanganya y’Ɛmɛnyi wa Jehowa, mbetawɔ kayɛ kayoleka keketshama efula.” Tshapita 16, od. 20, mbutaka ɔnɛ: “Onga la mbekelo ka mbɔtɔka lo nsanganya y’Ɛmɛnyi wa Jehowa.” Tɔ kotshaka nto ɔnɛ: “Dikambo sɔ diayokokimanyiya dia wɛ shihodia ndo kitanyiyaka ewo ka Nzambi lo lɔsɛnɔ layɛ ndo diayokosha ɔngɛnɔngɛnɔ. Naka wɛ monga ɔtɔi ɔmɔtshi wa l’atei a nkumbo k’Akristo ka l’andja w’otondo, kete dikambo sɔ diayokokimanyiya dia wɛ sukana la Jehowa.” Tshapita 17 nembetshiyaka l’ɔm’ɔmɔ woho wokokiso monga la lotui tshitshi l’atei w’anto wa Nzambi. Lam’ekaso l’anto, tekɔ l’ɔkɛndɛ wa tɛtɛ l’ahole asɔ lam’ayotokoma lo wekelo akɔ.
8 Biukubuku Les Témoins de Jéhovah — Unis pour faire la volonté de Dieu sur toute la terre ekɔ ehomɔ ka dimɛna efula kakasalema dia anto mbekesanɛ l’ɔlɔngɔswamelo wâmɛ wɛnama wakamba la Jehowa lo nshi yaso nyɛ dia kotsha lolango lande. Awui wolembetshiyami l’ɔm’ɔmɔ lɔkɔ wendana la olimu aso, nsanganya ndo ɔlɔngɔswamelo aso wayokeketsha ombadi ayɔ dia nde sangana la so dia tɛmɔla Nzambi. Kam’atatɛso mbeka l’onto Bible, vɔ tokeketshaka dia sho mbosha biukubuku miɔtshi dia nde lawɔ ndjiala. Aha tshikima mbeka la nde oko akatasalaka ntondo.
9 Kasɛtɛ ya video mɔtshi yakatondja la Société yekɔ dihomɔ di’amɛna efula dia nɔmbɔla ambeki otsha l’ɔlɔngɔswamelo waki Jehowa. Ayonga dimɛna nde menda nyɛ: (1) La Société du monde nouveau en action mboholaka filmɛ ka lo 1954 kɛnya yimba y’ɔlɔlɔ, wolo ndo ngandji kahɛtshahɛtsha ɔlɔngɔswamelo waki Jehowa; (2) Unis grâce à l’enseignement divin mɛnyaka wɔladi la kâmɛ katɛnamaka lo nsanganya yaso ya wedja efula la Mputu ka l’Ehotwelo ka Wonya, l’Amɛrika wa la Diko dia Nkushi, l’Afrika ndo l’Asiya; (3) Jusqu’aux extrémités de la terre mɛnyaka ɔnɔnyi wa 50 wa Ngiliyadɛ, Kalasa ka Bible kaki la Société Watchtower, ndo lotumu lakamba wa misiɔnɛrɛ l’olimu w’esambishelo wa l’andja w’otondo; (4) La fermeté des Témoins de Jéhovah face à la persécution nazie kɔndɔlaka ɔkɔndɔ wa kandji efula wɛnya dihonga ndo otshumba wakadje Ɛmɛnyi lam’akawahɛnyahɛnyama efula oma le Hitler; ndo mɛtɛ, (5) Les Témoins de Jéhovah — Un nom, une organisation.
10 Towadje Eyango wa Vɔ Pama lo Dikambo dia Nsanganya: Pombaka sho nembetshiya ambeki ɔnɛ tekɔ l’ohomba wa wetshelo wa lânde washama lo tshimbo ya wekelo wa Bible la ngelo kâmɛ ndo asawo wa l’olui, lo nsanganya ya l’etshumanelo. (Joa. 6:45) Oyoyo pombaka pama l’ewo kande oyadi k’Afundelo kana k’ɔlɔngɔswamelo. Yoho tshɔi ya kondja ewo kakɔ ele wɔ̂twɛlɔ wa lo nsanganya. (Heb. 10:23-25) Oma k’etatelo, têle onto akɔ lo nsanganya ya l’etshumanelo. Anto weke ka ndjasha lo akambo wa mɛtɛ womɛ mbɔtɔ lo nsanganya ntondo ka vɔ monga ndo la wekelo wa Bible esangɔ tshɛ. Ekɔ mɛtɛ dia sho nangaka mbisha ɛnyɛlɔ k’ɔlɔlɔ lo mongaka lawɔ esangɔ tshɛ.—Luka 6:40; Fil. 3:17.
11 Tôlembetshiya nsanganya dimɛna ndo woho wasalemayɔ dia nde mboka ɔlɔ wonya wende lɔkɔ. Anto amɔtshi hawosalangana lam’atshɔwɔ lo dihole dimɔtshi mbala ka ntondo; lâsɔ ekɔ dimɛna tshindɛ ombeki otsha lo Mbalasa ka Diolelo lam’ɔtɔnde lo losanganya mbala ka ntondo. Nde ayoleka mboka ɔlɔ naka tekɔ kâmɛ la nde lam’ayotoweyanya l’ase etshumanelo. Lâdiko dia tshɛ, toyale kanga ngelo k’ɔlɔlɔ: ɔngɛndangɛnda aso la dia ndjaoka ɔnɛ wambôlongola dimɛna ndo monga l’ɔngɛnɔngɛnɔ.—Mat. 7:12; Fil. 2:1-4.
12 Tokeketsha ombeki dia nde mbɔtɔ lo losanganya la lânde la lushi ɔtɔi, la lo losanganya l’otshimbedi kana la distrikɛ kam’ayosalema lɔmɔtshi. Ondo tayotshɔ la nde kâmɛ.
13 Toyange Lowando: Lo dibuku Organisés pour bien remplir notre ministère, lɛkɛ 93 vɔ funda ɔnɛ: “Naka asawo wasawolayɛ l’anto wayasha l’akambo wa mɛtɛ mɛnyaka ɔnɛ wɛ wɛmɛ mbɔsaka ɔlɔngɔswamelo waki Jehowa la nɛmɔ di’efula, kete vɔ wayonga la dionga dia ngasɔ esadi eto, ko dui sɔ diayowakimanyiya dia vɔ pama l’ewo ka Jehowa.” Tɔtɛkɛtake nshi tshɛ awui w’ɛlɔlɔ lo lokombo l’etshumanelo kaso, aha mbuta awui wa kɔlɔ. (Esam. 84:10; 133:1, 3b) L’alɔmbɛlɔ wasalaso wonya wekaso, tɔtɛkɛtɛ dia etshumanelo ndo dia ohomba w’ombeki mbɔtɔka lɔkɔ tena tshɛ.—Ef. 1:15-17.
14 Mɛtɛ sho nangaka mɛna eyoyo wandola l’otema ɔtɔi lo menda lɔngɛnyi l’ɔlɔlɔ ndo ekokelo ka lo nyuma kele laso l’atei w’ekambi wa Nzambi. (1 Tim. 3:15; 1 Pet. 2:17; 5:9) Ɔnkɔnɛ, tosale la wolo aso tshɛ dia nɔmbɔla ambeki wa Dui dia Nzambi otsha l’ɔlɔngɔswamelo waki Jehowa.
[Caption on page 3]
[Caption on page 3]
Ambeki pamaka esadi esadi lo nyuma lam’ɛnawɔ ɔlɔngɔswamelo la washo awɔ vamɛ
[Caption on page 4]
[Caption on page 4]
Tatotshimbatshimbake dia mbelɛ ambeki oya lo nsanganya