“Nyosale Kɛnɛ Tshɛ Kokokinyu Sala”
1 Lam’akatayakimɔ le Jehowa, takôlake dia mbosha kɛnɛ koleki ɔlɔlɔ le so. Diɔ diakɔ diakakeketsha ɔpɔstɔlɔ Petero Akristo dia vɔ sala kɛnɛ tshɛ kokokiwɔ sala dia shikikɛ diokanelo diasawɔ la Jehowa. (2 Pet. 1:10) Sho nangaka mɛtɛ sala kɛnɛ tshɛ kokokiso sala dia ngɛnyangɛnya Jehowa lo mbokambɛ oma ko kakianɛ. Dui sɔ alangadiɔ nembetshiya na? Lo yɛdikɔ yataleke tɔtɔmɛ diokanelo diasaso la Jehowa ndo yakanaso yimba lo kɛnɛ tshɛ kambondotosalɛ, otema aso tosokoyaka dia sho salaka nshi tshɛ la wolo aso tshɛ l’olimu ande. Sho nangaka nyomɔlɔngɔsɔla olimu aso dimɛna efula ndo, naka kokaka, nyomofudia olimu akɔ.—Osam. 34:8; 2 Tim. 2:15.
2 Ɔnangɛso ɔmɔtshi leke ɔlɔngɔlɔngɔ lakalange nyomoleka kamba efula l’esambishelo akɛnyi dia wekelo wa Dui dia Nzambi akafudiaka lowando lande le Jehowa ndo akawoshaka ohetoheto wa mamba. Dui sɔ diakôsokoya lo nde nɔmba olimu w’ombatshi mboka. Kadiyɛso kɛmɔtshi kakôkaka wolo tɛkɛtsha anto wahandeye akakambe l’asawo amɔtshi wele lo dibuku Comment raisonner ko kema edja nde akamɛ pomɔ lokolo l’ɔlɔ l’esambishelo kande. Nde akayokoka mbeka Bible la wadi l’omi amɔtshi waketawɔ akambo wa mɛtɛ.
3 Nyɔngɛnɛngɛnɛ lo Kɛnɛ Kokokinyu Sala: Amɔtshi l’atei aso wekɔ l’ekakatanu wa wolo wele oko: demba bu dimɛna, wekamu w’ase nkumbo, wola kana diɔnyɔ diele l’anto wa lo mbilo kawɔ. Akambo akina efula wasalema lo nshi y’ekomelo nyɛ kokaka mbidja wekamu l’olimu aso. (Luka 21:34; 2 Tim. 3:1) Onde dui sɔ mɛnyaka ɔnɛ sho kema la kɔlamelo lo dɔkɔlɔkɔ diaso diakatatshibɛ Jehowa? Kema, naka sho salaka tshɛ kokokiso sala l’olimu ande.
4 Hasungana dia sho ndjalombosha shamɛ lo ndjaɛdika la kɛnɛ kele anto akina l’akoka wa sala. Lo yoho yotshikitanyi, Afundelo tokeketshaka dia ‘onto l’onto mbɛdika olimu ande ndamɛ.’ Naka sho ndjasha tshɛ lo ndjela akoka aso shamɛ, kete tayetawɔma le Jehowa ndo tayonga l’ɔngɛnɔngɛnɔ oma lo dikambo sɔ.—Ngal. 6:4; Kol. 3:23, 24.
5 Nyɛsɔ todje yimba lo ɛtɛkɛta waki Petero ndo ‘tosale tshɛ kokokiso sala kele katoyotanemi lo asho wa Nzambi aha la vadi, aha l’ɛkɔmɔ ndo lo wɔladi.’ (2 Pet. 3:14) Dionga dia ngasɔ diayotosha lotui tshitshi ndo wɔladi wa lo yimba wokokiso kondja paka oma le Jehowa ndamɛ.—Osam. 4:8.