Akristo Waya Esombe Sambishaka Aha La Mpekɔ
1 Kam’atatshunde anto, mbatawakanyiya dia nongola pasiɔ ndo monga la lɔsɛnɔ laha l’ekiyanu l’edja k’ɛnɔnyi wambâtshikalɛ. Vɔ mbeyaka fɔnya ɔnɛ vɔ wakakambe wolo lo yɛdikɔ yokoki ko lâsɔ aya vɔ momuyaka yema; onyake ko kawolange ngɛnangɛna tsho la lɔsɛnɔ lo nshi yambâtshikalɛ.—Luka 12:19.
2 Sho wanɛ wakayakimɔ le Jehowa dia mbokambɛ, sho mɛnaka akambo lo yoho yotshikitanyi. Sho mbeyaka dia pasiɔ kema l’olimu wa Nzambi. Koko sho mɛnaka akambo la sso di’ɔlɔlɔ lo lɔsɛnɔ, nɛ dia tekɔ nshi tshɛ l’elongamelo ka ‘lɔsɛnɔ la pondjo.’ (Jude 21) Ɛnɔnyi watakondja onto ewo la watandeye akambo fudiaka shɛnɔdi ndo yimba yande, ndo dikambo sɔ kokaka mbokonya onto la lomba efula ndo lahɛngɛnga, lakoka mbɔsa lɔsɛnɔ lande la nɛmɔ di’efula. Waonga asɔ tshɛ wekɔ ohomba efula le okambi wa lokumu l’ɔlɔlɔ.
3 Tshunda osombe kema paka dikambo dia osombe wa lo demba oto. Diɔ mendanaka ndo la dionga di’onto dia lo yimba. Onto lalanga sɛna edja ndo lasala tshɛ dia tshikalaka la yimba ya dikɛnda tsho lo yoho yande ya mɛna akambo mongaka la pawo efula ka kotsha awui asɔ. Akristo waya esombe kokaka ngɔnya nsɛnɔ yawɔ lo pamiaka ewo kawɔ ka lo nyuma ndo lo kiewoyaka anto akina.—1 Kor. 9:23.
4 Akambo Wakasalema Mɛtɛ: Kadiyɛso kɛmɔtshi k’ɛnɔnyi 86 akate ate: “Lam’akanyiyami ɛnɔnyi 60 wambeta tatɛ oma lam’akameke akambo wa mɛtɛ, daka diatokeketsha diakatosha Nzambi diambolola tɔɔ l’otema ami. Mɛtɛ, Jehowa mongaka la kɔlamelo le akanga wa kɔlamelo ndo tokimanyiyaka dia sho ngɛnangɛna efula.” (Osam. 18:25) Ɔnangɛso ɔmɔtshi laya osombe aki l’ɔkɛi efula lo nyɔi ka wadiɛnde ko demba diande diakashingitɔ tshɛ. Nde akate ate: “Koko, oma lo ngandji ka mamba ka Jehowa, lakayongaka la demba dia wolo ndo lakayokoka monga ombatshi mboka wa pondjo l’ɔkɔngɔ w’ɛnɔnyi ehende. Mɛtɛ, lekɔ la lowando le Jehowa, nɛ dia olimu w’esambishelo w’efula ɔnɛ ambombisha demba dia wolo.”
5 Ekɔ dimɛna efula mɛtɛ dia mɛna woho wɔsa anangɛso l’akadiyɛso efula waya esombe tɛdikɔ dia tetemala la sambisha, aha la mpekɔ, edja tshɛ kayowongaka l’alemba a wolo ndo la lokalo! Vɔ mɛtɛ kokaka mbuta ɔnɛ: “Nzambi le, wɛ akambetsha oma ko kiɛndakɛnda, ko edja ndo kakianɛ lekɔ lo mbewoya anto akambo ayɛ wa mamba.”—Osam. 71:17, NW.