Onde Tekɔ Ɛmɛnyi Wa Lo Tena Tshɛ?
1 Onde sho koka kadimula ɔnɛ ‘eelo’ lo dimbola sɔ? Mɛtɛ, aha ekambi tshɛ wa Jehowa wakayakimɔ le nde mbakoka kamba olimu wa lo tena tshɛ, ko shi sunganaka dia onto l’onto l’atei aso ndjaɔsa oko Ɔmɛnyi wa lo tena tshɛ? Ɔsɔku mbediɔ mɛtɛ.
2 Okristo wa lo tena dimɔtshi hongaka. Lam’akandataka dikambo dia She, Yeso akate ate: “Dimi latutshaka akambu watôngenyangenyaka nshi tshe.” (Joa. 8:29) Paulo, ɔnɛ lakasalaka woho akɔ, akatolake dia sho ‘tshaka akambo tshɛ dia lokumu la Nzambi.’ (1 Kor. 10:31) Lâsɔ onto tshɛ l’atei aso la dia mɛna ɔnɛ nde ekɔ Ɔmɛnyi wa Jehowa wa lo tena tshɛ. Dikambo sɔ diayototshutshuya dimɛna lo ntumu yaso tshɛ.
3 Tɔsɛdingole Etsha: Ɔlɔtɔ aso, ɛtɛkɛta aso ndo lɔkɛwɔ laso koka mɛnya anto akina ɔnɛ tekɔ Ɛmɛnyi wa Jehowa. Sho mbeyaka ohomba wa monga l’ɔlɔtɔ wasungana, ɛtɛkɛta wa pudipudi ndo lɔkɛwɔ l’ɔlɔlɔ lam’asambishaso kana lam’ɔtɔso lo nsanganya y’Akristo. Koko, oyadi la kalasa, l’olimu kana la tɔkɛnyɔ, kɛnɛ tshɛ katshaso pombaka mɛnya ɔnɛ tekɔ lo nɛmiya ɛlɛmbɛ wa Jehowa wa losembwe lo lɔsɛnɔ laso.
4 Yeso akate ate: “Haweyi mbishe usumba weli ladiku dia dikuna. . . . usasi anyu ahete la ntundu ka antu, dia vo kaweyi etsha anyu w’ololo, kawutumbuli Shenyu le l’ulungu.” (Mat. 5:14-16) Dikambo sɔ pombaka mɛnamaka, wonya tshɛ, lo kɛnɛ tshɛ kasalaso. Naka tambɛna ɔnɛ sho bu la diaaso dia sambisha l’ɔkɔkɔ wa dihole dieso kana kɛnɛ kasalaso, sho pombaka ndjambola ɔnɛ: ‘Onde lekɔ lo kambɛ Jehowa lo tena tshɛ kana lo tena dimɔtshi to?’ He tatosokoyamake ndoko lushi dia mbetsha diaaso dia mbutɛ anto akina dikambo dia lokumu l’ɔlɔlɔ la Diolelo diaki Nzambi!
5 Tohɔ dia sho mbishaka Jehowa lokumu ndo mbɔ̂ngɛnyangɛnyaka etena katombolawɔ ɔnɛ “Onde we ekɔ Ɔmɛnyi wa lo tena tshɛ?” ko sho kadimula aha la kandakanda ɔnɛ: “Eelo!”